مشكلة زوجي والجوال اه يالقهر

السلام عليكم ورحمة الله وبركاته


مدري من فين ابدا مشكلتي .. احس اني عايشة بدوامه ووحدة وقلق وخوف من المستقبل
انا تزوجت من سنتين وعندي طفلة ..
مشكلة مع زوجي انه 24 ساعة والجوال بيده ما يخليه من يده لا وقت اكل ولا وقت نوم ولا وقت سفر ولا وقت تسوق
بكل مكان والجوال بيده
لارحنا السوق ماسكه .. لا سافرنا نغير جو ماسكه لدرجة كرهت اروح معاه اي مكان اجلس لوحدي مقابل الجدران وهو بس ماسك بذا الجوال
حتى وهو بالسيارة ماسكه .. حتى واحنا على السفرة والاكل وهو مشغول بالجوال
تكلمت معاه باسلوب حلو وان الجوال ماخذ كل وقته ولاعاد تجلس معي ولا تشوف احتياجاتي والا احتياجات البيت والا بنتك
يقول يالا سولفي .. وجلس اطلع له سوالف من شرق ومن غرب بس ما يتفاعل معي بس يديني كم كلمة على قد السالفة ويرجع يسمك الجوال ..
وانا صراحة هالحال ضايقني مرة احس اني عايشة لحالي وكل شي فوق ظهري ..
حتى بذكرى زواجي حجزت لنا في فندق 5 نجوم وطلبت من الفندق يرتبوا حفلة وعشاء هابي مون .. وكنت بس انتظر اليوم الزاوج حتى افاجئه فيه
بس للاسف ندمت ندم عمري اني سويت له شي .. تخيلوا يابنات طول اليوم هذا وهو جالس على الجوال يحاول يجاملني بكلمه والا ثنتين ويرجع على الجوال .
ولاسهر معي ولا شي نام من بدري اخذ حاجته ونام وانا جلست اهري بنفسي ومن الصباح صحينا افطرنا بالمطعم ورجعنا الغرفة جالس على الجوال اه يالقهر


احس زوجي ما يحبني ولا يبيني او انه مغصوب علي .. وانا احبه وشاريته واهلي يما نصحوني انه مايحترمني وانه ما يصلح لي بس انا مابي اخرب بيتي وابي بنتي
بس احس فيه شي غلط بحياتنا زوجي ما يقدر لي اي تضحيات قدمتها له نص البيت اانا فارشته ومساعدته فيه عشان ما اضغط عليه بشي والا ارهقه
لان ظروفه المادية صعبوة فاظطر احيان اني اقضي اغراض البيت من عندي واقضي لنفسي ولبنتي عشان ما اضغط عليه وعشان ابي حياتنا تكون مستقرة ونعيش بسعادة
بس وضعه كذا دايم على الجوال او طالع وصلني لمرحلة اني افكر بالطلاق ..
لاني ما تحمل الوحدة هذه .. ابي اعيش باسرة مترابطة ..

تكلمت معاه وكنت معه حازمة وقلت له انت متزوج الجوالوالا متزوجني ... ماتعطيني من وقتك ولا شي نجلس نسولف زي كل الناس
وانا بطبعي انسانة اجتماعيية احب الناسو احب السوالف .. وهو ما يجلس معي .. يمكن لو احسب الوقت الي يجلس معه فيه ما يتعد ربع ساعة باليوم
مرررة مليت وتعبت وطفشت معقولة هذا حال كل المتزوجين .. احس بالنقص لمن اشوف اخواني والا اخوانه المتزوجين كيف مهنين زوجاتهم
والا لمن نطلع مول والا مكان واشوف كل واحد ماسك بيد زوجته وزوجي ماسك بيد جواله ..
مررررة نفسيتي تعبت ..
ولا تكلمت معه بحزم وزعلت قلبها علي زعل وصار حتى الاكل ياكل لحاله ويقضي يومه بس نوم واول ما يصحى يطلع لاخوياه لاخر اليوم الساعة 10 او 11 يجي وينام
ويصحى اليوم الثاني الساعة 5 ونفس الحال يا يطلع او يجلس على جواله ..
اتمنى عليكم تفيدوني وش اسوي بالحال ذا ..
مع العلم الوضع ذا زوجي هو عليه من يوم تزوجنا يمكن اول 3 شهور بس كان شوي يفضى لي مع ان الجوال كان دايم بيده بس على الاقل يقفله ويجلس يقابلني يشوف خاطري ..
الحين مررررررررررة .. احس بالوحدة والغبنة ..
شوروا علي