مســـــــاء الورد كعادتي لااحب المقدمات ولاهي تحبني .. بيننا نفس الظاهر .. الموهيم
مثل ماانتوا عارفين اننا الآن في إجازة وموسم زواجـــات ..وعروس وطقطقه ووناسه وفلّة حجاج
.. و الطقــاقات قايمن عزّهن ماشاءالله ..مايشوفون الناس ولابطرف خشم .
وبصراحه احنا يالحريم اهم مقوّمات نجاح الزواج .. هي " الطقـــاقه " بلامُنافس .. ومن ثم يليها فخامة الفندق او القصر ومن ثم التقديم سواء الحلى او البوفيه .......الخ
مره من المرارير العام الماضي حضرت زواج احد اقاربي.وكانوا جايبين طقاقه إنما إيييه خطيييره ..طقها رهيييييب ..تخرش اللي ماينخرش.والمنصّه امتلت.. من هالحريم اللي يرقصون طربانين!!!!؟؟؟؟؟!!!!!
وكان العرس شي.. والله العظيم يوم طقّوا سامري (ياهل السامري لاتوجعوني ...) .ان بعض العجايز ماقدروا يمسكون انفسهن وقاموا يطلعون إبداعاتهم وينسّفون شيالهم .. يالبّى قلوبهن ..
ونافسونا على المنصّه ..هههههههههههه ياحليلهم عجايز 2009 ولاتسألوني عن الضحك والوناسه ذاك اليوم .. بجد وناسه .. ودي احط مقطع للطقاقه موضي حق ياهل السامري, عشان تعذرون ذا العجايز ..الله يوسّع صديراتهن بالعافيه ...
وهالسنه وحده من قريباتي بتتزوج .. ووصتني اني انسّق مع الطقاقه واتفق معاها لأنها مشغوله ..قلت اوكي ..
واقوم اخذ كم من رقم لـ هالطقاقات .. وأولهم ذيك اللي في زواج قريبي ... اسم الطقاقه "موضي".. اكيد تعرفونها .. وهي علم على رأسه نار من كثر ماهي مشهورة .
وأدق عليها وانا بصراحه خااايفه اول مره اكلم طقاقه..المهم يوم ردّت : قلت آلو ... قالت نعم ...؟؟
قلت انتي الطقاقه موضي .. قالت انا سكرتيرتها أي خدمه ..؟ << اكشششخ حاطه سكرتيره مره وحده ..!
الله يالدنيا..!قلت طيب ممكن أكلمها .. قالت عندك موعد ..؟ قلت لاوالله ماقدّمت معروض للحين ..... قامت ضحكت ضحكه تجيب الهم والغم .. وقالت: هذي القوانين ياحبيبتي ..قلت طيب ممكن هالمره بس أكلم عمتك موضي ..؟
قالت طيب بس ترا هالمره نخليكي تكلمينها والا المفروض الاتفاق يكون عن طريقي انا يالسكرتيره ... قلت طيب أي اوامر ثانيه ..؟!!
المهم جلست شوي وجت العمّـه توها شكلها توهاصاحيه من النوم .. وانا داقة عليها العصر ..!! شكلها سهرانه ليلتها في عرس ..
الموهيم .. ردت علي من غير نفس بصوتها الأبح .. نعم ؟؟ قلت ببراءه أهليييين .. انتي الطقاقه موضي.. ..؟؟ قالت : " الفنّــــــــانه " لو سمحتي ..!!! واحس ودها تخنقني لحظتها ..
عاد انا خفت تستنزل علي .. او تحقد ثم ماتجي زواج قريبتي ..
وقمت ارقّع .. قلت اييه فنانه وست الفنانات كمان ..بالله وش ام كلثوم عندك ..ولاشي..
.؟ قامت تضحك شوي بضحكه تجيب المغـص وحسيت طاح الحطب ..قلت اشوى رضت .الحمدلله.الموهيم قلت الله يعافيك زواج قريبتي بعد شهر وودنا تجين تطقين فيه..
قالت بس انتوا تأخرتوا المفروض لو بغيتوني تتصلون وتحجزون قبل شهرين لأن الحجز يكون فُل ..بعدها ...!! قلت فول والا عدس مالنا شغل بتجين يعني بتجين ..العروس ماتبي الا انتي << والله اعلم من اللي يبيها : )
قامت تضحك بضحكتها المعهوده اللي تجيب مغص في الركبه وقالت يعني مصمّمين .. قلت جداً .. قالت اجل لحظه شوي اشوف دفتر المواعيد..
قالت متى عرسكم ..؟ قلت لها في هاليوم الفلاني... و من يقال لكم ..؟<<سلامات الأخت بتخطب ..؟ قلت آل فلان ..... .. قالت والنعم والله ...
طيب وين عرسكم فيه .. قلت لها المكان الفلاني ..قالت حلو ... انا ترا يهمني المكان كثير .. ومستحيل اطلع في قصور او فنادق أي كلام ...<< تتكلم من جدّها هذي..؟ :
قالت : خلاص اوكي في هاليوم من حسن حظكم مافيه شي ..
قلت طيب كم المبلغ ..؟ قالت ليه ماتدرين ..؟ قلت لا والله ماادري.. لو ادري ماسألتك ..؟
قالت كالعاده 80,000 ريال ..!! <<
..!!وأكمَلَت وبما انكم انتوا في الرياض وانا في جده ... يبيلكم تحجزون لي تذاكر طياره انا والفرقه اللي معاي .. يمكن 10 طقاقات ..وكمان تحجزون لنا في فندق راقي.. مثل الفورسيزون او الفيصليه ..فنادق أي كلام مانقدر نسكن فيها ..<< ماهي سهله والله ,,!!
وكمان توفرون لنا سواق بسيارة كبيره عشان ينقلنا من الفندق إلى القاعه..
انا لاتسألوني بعدها ...... قلت إيييييه يجيب الله مطر.. وابكلمك بعدين ..ان شاءالله ..
كلمت قريبتي ... وحكيت لها الحكايه كلها ..وقلت انا اغسل يديني من الموضوع بكلوركس طالما الدعوى فيها إسراف وبذخ لهذي الدرجه اسمحيلي يالغاليه.....
اجل هالطقاقه <<عفوا " الفنّــانه "الشكوى لله من خاف سلم " ...: ) اجل تبي الحبيبه 80,000 ريال غير التذاكر ماادري كم تصير ؟؟
بس لنقل 5000 وغير السكن في الفورسيزون حضرتها يعني الليله بـ 1500 للشخص .. وهم 10 طقاقات.. كم يصير ..؟ يعني 10,000 بالقليل ..يعني باختصار صرفياتها 100,000 ريال ..! عشان ليله وحده .. !!
والمشكله ماتجي حضرتها الا بعد الساعه 11 .. وتروح الساعه 3 يعني 4 ساعات بس ..
والله ثم والله مع ان اسعارها غاليه وخياليه .. بس ياعليها زحمممممه بشكل موطبيعي ..ومطلوبه بشكل ماتتصورون وقايم عزها بين الحريم ..
طيب خلونا نحسب في الشهر كم تحصل ..؟ 80,000X 30 =2400000 .....!!
بالله كم تصير ...... << بليز احد يقبصني عشان اصحصح .... مو مصدقه ...!!!!!!!!
معقووووووله مليونين واربعمية الف في الشهر ....!!
والله ولاأططلــق وزيره .. وش كونداليزا رايس عندها..؟؟
على طاري كونداليزا الآن عرفت وش السبب في انها عاقدة حواجبها وقبلها متسخّطه مسيكينه..
اثرها غايرة من بنات فصيلتها .. وتبي تحصّل شهره وقريشات مثلهم ..
شكلها تقول انا مالي ومال امريكــا وخنبقيكــا هذاهو راح الأبرص بوش.. وطاح كرتي معه .. لو اني صايره طقاقه واحصل ملايين وانا اغني موب احسن ..؟
والله عاد تبون الصدق ترا مو كونداليزا رايس اللي مقهوره بس .. شوفوا المنتديات اغلب هالبنات العاطلات ودهن يصيرون طقاقات بس العادات والتقاليد تمنعهن .. وانا احيانا خيالي يشطح بي ..ودي في الأحلام السعيده اني آخذ ربحها بس معاذ الله ان اشتغل مثلها .. اعتقد لو بس اهلي يوصلهم بس اني افكر تفكير بهالموضوع كان " فـــكُّ رقبـه "...!
على فكره ..ترا سمعت من مصادر موثوووقه ان كونداليزا رايس عزّمت خلاااااااص انها بتجي هنا السعوديه و بتصير طقاقه .. <عارفه عننا ان السعوديات خفيفات ونخق على الطق ..والا في امريكا مااحد معطيها وجه
وهذي هي كونداليزا رايس قاعده تستعد تحفظ الأغاني الخليجيه وتجمع كلمات الطقاقات ..بتغنيها بالانجليزي ماحقرت عمرها الزم ماعليها تجمع هالقريشات .. "وهذي بروفا لها "..
ويـا معـيـريـس عـيـن الله تـراك. . الـقـمـر والـنـجـوم تـمـشـي وراك
LOLOLOLOLOLOLOLOLOLOLOLOOOSH
( لو لو لو لو لو لو لولو لو لو لو لو لولو لو لو لووووووش ) هذي زغرووووططططططه
KoooooolloooollooooS SHHSSHH
لاويقولون بعد تتدرب على الرقص ..حتى تصير فرقتها كامله متكامله .!!!
بالتوفيــــــق يالكونداليزا ...
.............................
ياعــــالم أمانه مو قهررر .. احنا يالبنات اللي عندنا شهــادات و دراســـات عُليا .. ماتقبل بناإلا المدراس الأهليه .. أما الحكوميه في المشمش ..
ورواتبنا في الشهر مع الكرف والشغل والتعب والأعمال الشاقه مايجي إلا 2000 ريال ..فقط..! << في الشهر لاحظوا مو في الليله مثل الطقاقه ..!
وهذي الطقاقه تجي وتغني وتوسع صدرها بس 4 ساعات في اليوم وتجي يوميتها 80,000 بالراحه ..! وفي الشهر مليونين واربعمية الف << آآآه يالقهر
اييييييييييه .. الله يالدنيا .. انقلبت الموازين ..
.................
ختاما ..شاكره لكم حسن استماعكم لفضفضتي .....
تقديري واحترامي للجميـــــع
موضوع عجبني وحبيت انقله!!!!!!!!!
يعني:منقوووووووووووول