ملف تفاعلي " موهوبات بلا وظيــفه " .. حياكم الله

بسم الله الرحمن الرحيم ..

اخواتي الغاليات في منتدى عالم حواء .. السلام عليكن ورحمة الله وبركاته ..

هذا أول موضوع لي في هذا المنتدى الرائع الذي استفدت منه كثيرا ولكن للأسف لم أفد أحداً .. فـ قررت كتابة هذا الموضوع حتى تعم الفائدة على الجميع ..

سأكتب الموضوع بالعاميه .. حتى " ناخذ راحتنا أكثر " :)

" راح أغير العالم بإذن الله " .. جملة دااااايما نسمعها كثير من ناس يمكن يكونون عاديين بنظرنا لكنهم يملكون الطموح والموهبه ..


" إذا أردت أن تصبح عظيماً ومميزاً .. ففكـر بجنون " ..

التفكير المجنون موجود .. والمواهب كثيره .. والطموحات لا حد لها .. وثمة مشاريع عديدة يتم التفكير بها تبدأ وتنتهي على الورق فقط !!

ليش ؟

بسبب تشتت الأفكار .. وعدم توفر رؤوس الأموال .. وكوننا نساء " يعني ان هناك مجالات كثييييره ممكن تكون المرأه بارعة فيها لكن المجال للرجال فقط " .. وووغيرها من العوائق التي تغلق علينا الكثير من الأبواب ..

من هنا .. جاءت فكرة هذا الموضوع ..

أخواتي .. الفكرة أن كل وحده جالسة بالبيت لا شغله ولا مشغله وتشوف عندها مواهب ممكن تنفعها تكتبها في هذا الموضوع .. أي موهبه ولا تستصغرون أي موهبة تملكونها ..

لأني بصراحه _ مثل كثثثير منكم _ خلصت دراستي ودايما افكر ماهي معقوله بجلس كذا انتظر الوظيفه !! طيب واذا الوظيفه ماجات الا بعد 10 سنين .. وش بكون استفدت من هالـ 10 سنوات ؟ وهل ممكن بهالـ 10 سنوات اسوي شي يغنيني عن انتظار الوظيفه وحتى عن قبولها اذا جت ؟

وأنا أتكلم هنا عن المواهب الي بدون شهادات .. يعني انتي تملكين موهبه وبارعه فيها حتى لو ماعندك شهاده اكتبيها هنا .. لان الوظايف الحين تبي شهادات فقط والموهبه مكنسلينها !!

والهدف .. ممكن انتم تشوفون مشروع يناسبني ويناسب موهبتي وهالمشروع انا ماشفته ولا فكرت فيه .. عرفتوا ؟

يعني مثلا انا بكتب اني اجيد كذا وكذا لكن للأسف أفكاري مشوشه ومااعرف وين ممكن استفيد من كل ماأملكه ؟ فـ تجي أي عضوه يكون عندها مشروع شافته أو سمعت عنه أو فكرت فيه لكن ماعندها الموهبه الي تساعدها لإتمام المشروع فـ تكبتها .. وهكذا كل عضوه تشارك بهالموضوع لازم تبدأ بتفكير يغير حياتها ..

وممكن كذا عضوه يشوفون ان مواهبهم ممكن تستغل مع بعضها البعض .. فـ يسوون مشروع مشترك بينهم ..

وبكـذا ماراح نترك الموضوع إلا وحنا مغيرين حياتنا وطريقة تفكيرنا بإذن الله ..

بسم الله ابدأ ..

1 .. انا خريجة أدب انجليزي .. لدي قدرة على عمل تحضير لدروس اللغة الانجليزية من الصف السادس وحتى الثانويه العامه .. وايضاً عندي قدرة على تلخيص مواد الكلية " تخصص أدب انجليزي " ..

2 .. مصممة فوتوشوب " والايميج ريدي " + سويش ماكس + عروض تقديميه " باور بوينت " + موهبه بسيطه بإنتاج أفلام " سويت افلام عائليه بسيطه " ..
عندي رغبة قويه للتوجه لمجال الإعلانات ..

3 .. كتابة القصائد والكلمات " الاجتماعيه والترفيهيه وغيرها " ..

4 .. وقت فراغ كبيييييييير وجلوس على النت .. :icon30:

وفيه فكرة حبيت اخذ رايكم فيها ..

أمي عندها خبره كبيييره بالطب الشعبي للنساء والاطفال .. ولها سمعتها .. فكرت اني اسوي كتاب اكتب فيه كل شي تعرفه للنساء والاطفال وبعض الامراض وابيعه .. لكن ترددت مادري ليه !! فـ ياليت تعطوني رايكم ..

يلا بنات انتظر مشاركاتكم .. من اليووووم ورايح ولا وحده تقول ماعندي شي اسويه ولا طفشت ولا فلانه توظفت وعلانه تزوجت .. وليه هذي احسن مني وهذي محظوظه ووو العبارات السلبيه الي نقولها دايم ..

ومالمرء إلا حيث يجعل نفسه ** فـكن طالباً في الناس أعلى المراتب ..

وآخر شي أحب اقوله لكم .. لا تنسون يابنات اننا حنا محاسبين عن " شبابنا فيمَ أبليناه " حرام تروح سنين عمرنا ننتظر وظيفه " ويمكن ماتجي بعد " وحنا نملك قدرات هائله ممكن نبدأ فيها من الصفر ..

يقول الرافعي رحمه الله :

إذا لم تزد شيئاً على الدنيا .. كنت زائداً عليها ..

أعذروني إن كان هناك خطأ أو تقصير فقد كتبت الموضوع دون مراجعه ..

في انتظار مشاركاتكن :26: