السلام عليكم
التجديد الظاهر ينعكس داخليا على نفسيتك و يغيرهآ
غير ان كل سنة تكبرين وتعرفين ستايلك واللي يناسبك اكثر واكثر
وبما ان تونا داخلين السنة الجديدة وان شاء الله تكون سنة خير
علينا كلنآ ويتحقق كل اللي نبيه فيهآآ..
فحبيت اسوي هالموضوع انصحك تقرينه
وحاولت اخليه خفيف وسريع ومختصر..
طبعا اللوك يقسسم لـ 3 اشياء/
- الشعر
- الميك اب
-اللبس
واول شي نبدآ فيه الشعر ../
-لآزم تنتبهين لنقطة مهمة حلوو التغيير بس اللي يناسبك يعني ملامحك يناسبها الشعر القصير نوووعي بالقصات القصيرة لا تحاولين تطولينه ..او اذا ملامح وجهك يناسبها الشعر الطويل غيري بالقصات الطويلة ولا تجربين القصير..لان بالنهاية الهدف من النيولوك هو التغيير للاحلى مو للأسوأ ..وبعض اللمسات ممكن تغير جذريا بالشكل مهما تشوفينها بسيطة.
بعض البنات للاسف يغيرون لمجرد التغيير شافت فنانة او شخصية مشهورة قاصة هالقصة او الصبغة اليوم اللي بعده مقلدتها بغض النظر اذا يناسبها او لا ..
اذا يناسبك القصات القصيرة
بس اللي هي تكون قصيرة مرااآ .. وشفنا مشاهير مثل اشلي سيمبسون و ايما واتسون وغيرهم قاصينها..
تناسب اللي ملامحهم ناااعمة مرراا و اللي تكون بنيتهم "ضئيلات" تقريبا او معتدلة..وتكون رقبتهم نحيفة او طويلة شوي
بعضهم طوولوا الغرة وبعضهم قصووهآآ..بعضهم حلقووا الجزء الخلفي مثل الصورة الثانية بالسطر الثاني وبعضهم خلووه
يعني انتي و مزآجك واللي تبينه ...
اما الشعر الطويل طبعا انتهت موضة 2009 واللي استمرت لنص 2010 اللي هي شعر طويل
يوصل لنهاية الظهر ..الحين كل الشعر الطويل يوصل لمنتصف الظهر وبس..يعني قصرووه شووي وطبيعي اكثر
ويفي سترايت .. مراا و تحسينه ..هي موضة دارجة مراا وموضة الشعر اللي للكتف بعد دارجة..
طبعا الطبقات او القصة المتدرجة للشعر رآآجعة تعطي شكل فريش اكثر..
بالنسبة للألوآآن/
-حاليا دارجة 3 الوان وبتلاحظون هالشي بين البنات او حتى لو فتحتي اي مجلة وشفتي
* الاشقر الفاااتح مراا -يميل للابيض- ..
طبعا احسه يناسب الاوروبيات ونااددر تلقين عربية يناسبها هذي الدرجة
ولا تنسين لو بتصبغينها تنسقين لون حواجبك معها لان مراا يطلع قبيح الشكل لو الحواجب غامقة و الشعر فاتح..
*الاسود الحالك..
اللي يكون مراااا غامق يعني الاسود في اسود بلمعة بنية وفي اسود حالك اللي يكون اسود بلمعة سوداآ
انتبهوا في كثير بنات لون شعرهم الطبيعي اسود وما يناسبهم الاسود الحالك يعني مو تقولين شعري اسود معناه
خلاص تناسبني هالموضة لان كثير بنات سمر صبغووه وغمقهم بزيادة وبنات بيض صبغوه وطلعوا كانهم شبح يعني انتبهي
اذا يناسبك او لا ..من اللي صبغووه بالعالم العربي اكثر شي الكويتيات ..امل العوضي-عبير الوزان ..
*البني الغامق ..
يكون بني غامق بس يميل للرمادي اكثر من الاحمر ..يعني بني طبيعي ..وغامق مراا
كثير مشاهير صابغينه حاليا ..بيونسي ومن العالم العربي منى امرشا
الميك اب ../
بختصر عليك المشوآآر اهم الموضات الدارجة حاليا
الشآدو يعتمدون عالالوان الترابية او الحيادية اكثر..
موضة 2010 استمرت الى الآن مافي تغيير
باستثناء انتهت موضة الارواج الغامقة و السودآ ..وموضة البرونز انتهت للاسف!
<<من عشاق البرونز
والعدسآآت تعطي نظرة مختلفة . .. جربي الالوآن الطبيعية و غيري فيهآآ
افضل ماركة تقدم الوان طبيعية هي "فريش لوك" وموجودة بكل الدول طبعا ..واسعارها معقولة..
موضة 2009 و 2010 العدسات الرمادية ..وموضة الـ2011 هي العدسات الخضراء-العسلية-البنية..
اللبس ../
غيري ستايلك ..اذا انتي تحبين البنطلونآآت و الليقنقز جربي خامات متنوعة و اهتمي بالديتيلز
والفساتين الميني .. جربي الوان مختلفة وغيري منها
جربي تطقمينها من اكثر من طريقة واكثر من ستايل ..واعرفي اللي يناسب شكل جسمك و يجممله..
حلو نلبس اللي يعجبنا بس الاحلى يطلع يناسبنا ..
انسي اللون الاسود من خزانتك ..للاسف كثير ناس معللقين عليه ..جربي الوان ..
الوآن هالسنه الدارجة .. اللون الجملي - اللون الاخضر الزيتوني -الابيض -الكحلي-التايقر -البيج - بني ..
ستايلات هالسنه ..انتهت موضة البوهيميان و الجمب سوت.. موضةالاربعينات هي اللي دارجة و راحت موضة الاشيا الواسعة او الفلات والحين رجعت موضة الاشياء المخصرة اكثر..
و الأكسسوريز دارجة الاكسسوارات الذهبية ..
ولا تنسين السكارفات -احزمة - تغير 180 درجة من اللوك ..جربي تنووعين بالستايلات ولا تعللقين على نمط واحد..
اهم شي ../
- لا تكررين اخطاءك بالستايل لعام 2010 راجعي ستايلك واكتشفي عيوبك ..
ومافي مانع تسالين صديقاتك او احد معك عن ستايلك وتقبلي آراءهم وحاولي تصححين من الاخطاء..
-تابعي آخر خطوط الموضة اول باول ولا تقلدين احد ..
- سوي يوم بالاسبوع مثلا كل جمعة او كل خميس او اي يوم فاضية فيه ..او عالاقل يوم بالشهر
تسوين فيه ماسكات للبشرة و الشعر واهتمي فيهم..
-تذكري ان الثقة احلا واجمل صفة..مهما تلبسين ومهما تغيرين بشكلك الثقة تحلي ابسط الاشياء
دايما خلي الابتسامة صفتك و الثقة معك ..و مو لازم الكل يعجبهم ستايلك اهم شي انتي عاجبك وواثقة فيه..
تقبلي نفسك مثل ما انتي و غيرك بيتقبلك ..
-جربي اشياء جديدة ولا تخافين من التغيير ..ومهما واجهتك مشاكل غير متوقعة مثلا لون الصبغة او
شكل القصة او اي شي ..لان كل شي له حل بس رووقي وبتلقين كل شي بسيط وتافه..
-لاتنسين الهدف الاول والاخير هو تجديد شكلك وروحك بنفس الوقت ..استمتعي بكل لحظة وانتي تسوين هالنيولوك
و لا تعتبرينه مهمة او وواجب .. ومو ضروري يكون عندك مناسبة او حفلة علشان تسوينه ...
- حلو الواحد يكون له ستايل يعبر عن هويته بس التغيير ضروري ..في ناس اشوفهم من 10 سنين وهم نفس الميك اب والشعر واللبس
انا اللي اشوفهم طفشت ..مدري كيف يتقبلون نفسهم بالمراية كل يوم ..حلوو التغيير ..
- بنفس الوقت لا تبالغين ..بعض البنات الله يصلحهم التجديد فيهم يوصل لعمليات التجميل ..تغيير ملامحها على الموضة!!
شدعوة!!
خير الاامور اوسطها ..
-بعض الكوفيرات بيتفلسفون على راسك بكلام ..انتي مالك دخل افضل حل تجيبين لها صورة وتقولين ابي مثلها
لان بعضهم بالشرح ما تفهم و غصب تبي تقص على كيف امها ..فافضل شي تجيبين صورة محددة عن اللي تبينها
وحتى الصبغة جيبي صورة للصبغة وطابقيها بكتالوج الصبغات ..
لا تنسين ../
" بعض النآس ما يتقبلون الاختلاف و عقولهم متحجرة.. يحبون يكون "امعات" يكررون كل شي يشوفونه
وما يعرفون شي اسمه "ابتكار" ..لا تكونين منهم ..كوني مميزة بستايلك بشخصيتك
خليهم يقلدونك بدل ما تقلدينهم..خلي ستايلك يعبر عن تفكيرك..شخصيتك..هويتك "
"لآ تخآفين من التغييرآت الجذرية ..و لو ما تجربين ماراح تعرفين ...وكل شي قابل للتعديل او الاصلاح
في حال حدوث خطأ او نتيجة غير مرغوبة ..لو ماجربتي الاسوآ ما عرفتي الاجمل"
"المبالغة في الشي تفسده .. دايما اهتمي بالموازنة وخير الامور اوسطها وتقبلي جمالك وحاولي تجددينه
وكل عام وانتم اجمل
لاتنسوني من الشكر اذا فادكم موضوعي واذ مافادكم اقرو واطلعو
ودمتم ياجمل حوائيات
يلزم عليك تسجيل الدخول أولًا لكتابة تعليق.
الصفحة الأخيرة
وموضوع يستااهل النقل
وبصراحه انا ناويه اغير اللوك
وموضووعك لفت انتباهي لاموور كثييير
بس قريبه من افكااري
يعطيك العااافيه يااعسل