البخيلات الحسودات اللي يحاسبون خدمهم ع الريال يدشون بس !!

السلام عليكم ورحمة الله وبركاته

لفت انتباهي في احد المواضيع ان وحده تستشير البنات عادي اشتري لخدامتي شامبو وصابون ولا اخليه من معاشها تشتريه ...

ليش تستشيرينهم وهم منزلين من السماء عشان تتبعين كلامهم

ولا من زين الاقتراحات ... وحده تقول حتا الببسي اذا شريت لها تركض تجيب لي ريالين ... اعتقد الببسي بريال ونص ع الاقل يالبخيله يالحسوده ياللي ملشفتي خير اخذي نفس قسمته 

هذي مسكينه جايه من غربه والله حطها تحت يدج وبحاجه لكل ريال بدال ماتتصدقين فيها جايه تستشيرين عشان كم ريال يالبخيله

وبدال ماتستشيرين المريضات المشفح اللي هنا ادخلي على مواضيع معاملة الرسول عليه الصلاة والسلام مع اللي يشتغلون عنده واحاديثه واتبعيها ولاتتبعين اراء وجيه الفقر اللي حاطين روسهم بروس الخدم وعيونهم ع معاشاتهم من كثرها

وين تبون التوفيق ودفعة البلا ووين تبون الرزق ووين تبون القبول من الله سبحانه ومن البشر مدري وش قلوبكم ولا مخوخكم 

انا ولله الحمد عندي اكثر من خدامه ومن تجيني اشتري لها كل اغراضها من و الى 

وحتا وجبات المطاعم والحلويات وكل شي ناكله لها حق ومثلها مثلنا بدون نقصان

وحتا اذا دخلت الجمعيه اقولها اخذي اللي تبين وهم مساكين لو خذت خذت صابونه ولا شامبو مهوب من كثر اغراضهم 

وحتا الكروت اهديلها من فتره لفتره 

والحمدلله والشكر لله بطريقتي هذي خيري قاعد يزيد ووتناثر علي انعامه من كل صوب لاني احتسبتها اجر لي ودفعة بلا عنا 

وهذي طريقتي مع خداماتي وهم ثنتين والثالثه في الطريق ولهم عندي سنين ومايبون غيري ويحبوني ويحبون عيالي وكسبتهم بطيبي معهم

وخدم امي واخواني وخالاتي كلهم نفس الطريقه والمعامله والحمدلله ماشفنا منهم مكروه

اتقوا الله في المساكين اللي حدتهم الدنيا وجارت عليهم واغتربوا عشان لقمة العيش

لاتصيرون انتو والزمن عليهم 

والدنيا دواره ولو دامت لك ماراحت لغيرك

وياليت تقبلون كلامي وترجعون النظر في اسلوبكم ومعاملتكم