السلام عليكم,,كيفكم خواتي ,,بدخل بالموضوع مالي بالمقدمات لاني واصله حدي واكتب لكم وانا بنفجر ,,
زوجي من تزوجته لنا الحين تقريبا 11 سنه وعشر شهور وماتغيير ابد ابد ,,اول ماتزوجنا كان يصرف بالهبل وكنت جاهله بالامور هذي ومايجي على بالي ودائم على بالي ان هو رجال ويعرف يتصرف ,,! بحكم اني تربيت في بيئه مثل كذا الوالد الله يحفظه واخواني ,,بعد كم سنه بديت افهم واحس يوم صرنا نشوف الراتب من اول يطير وخصوصا باول طفل ,,مع اني مو من النوع اللي يصرف او يطلب كثير,,لاني استحي بس كنا عند الوالد مبسوطين ولله الحمد وبنعمه..من كثر مايلعب بالفلوس ولاعنده حسن تصرف ابدا مره باول سنتين لي معاه كان في مسابقه برمضان في قناه معروفه اسمها حروف والوف وواضح انها نصبه كان زوجي يصدق ويشارك فيها باستمرار اللي بالهاتف وقالي شاركي يمكن نفوز بمبلغ وقالي اتوقع صدق شوفي الناس يتصلون بعدين صرت اشارك يوم وصل فينا كل مايجاوب يقول تاهلت وصار يبالغ في نفس الوقت يشارك اكثر من مره انا شفت اني خلاص اكتفيت قلت له خلاص ياخي احس اننا بالغنا قال لا انا بتصل وبشارك يمكن من كثر م****رك ونتاهل نفوز وتركته بعد فتره تفاجات انه الفواتير وصلت لجوالتنا حول 12000 قلت شفت ماستفدنا شي ولافزنا واخر شي نسدد وماقدر يسدد وخلاها وطلع لنا شرايح سوا ,,وجلسنا على هالحال
الين حملت بعد اربع سنوات بطفلي الثاني
وصرت اتعب لان عندي طفل تعبان من ذوي الاحتياجات الخاصه وقلت بقدم على شغاله بفلوس اعانته وقدمنا وبعد كم شهر جات وجلست شهر وطردتها لانها كانت تسوي مشاكل بيني وبين اهل زوجي وتجسس علينا انا وزوجي وتعلم علىمشاكلنا وهواشنا عندهم وتعلم الشغالات عننا كل شي المهم انا يوم صرت نفاس
جاني خير ولله الحمد قلت لزوجي خلنا نبدا حياه جديده بدون ديون وقال خلاص قلت له بنجمع من راتبك كل شهر 1000 ومن حق الهدايا النفاس بعطيك كلها وفعلا بدينا نجمع وكل شهر يعطيني 1000 وكان يطلعها من الخزنه يوميا ويعدها وقلبه بيتقطع ان بيعطها الاتصالات صرت اقول شفت كيف لما الواحد يغلط ويتسرع وماينتبه للتصرفاته المهم سددنا هو بس كان يسوي نفسه انه معاي حق وكذا ويوم من الايام فاجاءني وصار يوديني السوق ويخليني اشتري كل شي خاطري فيه انا في البدايه فرحت فكرت بسبب الدين اللي خلصناه بس برضو دخلني الشك مايرفض لي طلب بعدين عرفت ان السالفه فيها ان ووقفت فورا عن طلب او شراء اي شي ..وقلت لامي وخواتي وهم شكوا في الاخير سالته بوقت كنا رايقين قالي بعدين بقولك وكنا في السياره وطول الوقت ودي اعرف وخفت شوي
بعدين جى يوم وسالته وقالي جتني صدمه قويه ..قالي اخذت قرض من البنك 45 الف قلت له ليه وش السبب قالي يوم جات الشغاله ماقدرت اصرف عليكم بغيت انجن وعرفت انه عذر اقبح من ذنب
ومن هالسالفه صار بيننا فتور ومانقرب بعض بتاتا بس كلامنا اشياء ضروريه للعيال او اغراض البيت جلسنا على هالحال اكثر من سنتين
بعد كذا صار ياخذ فيز ولايهتم تدرون لو يحتاج ريال بس يروح يطلب الفيزا 5000 ريال بدون مبالغه وتطير بسرعه مع العلم اني ماسافر ولاعمري طلعت الا لديره اهلي غير الدوام اللي وعدني اذا داومت شفتات بعطيكم وبعطيكم وكلها وعود ماشفنا ريال واحد ,,الحين يوم شافني جديه وقلت ياتعيش مثل الناس وتصرف علينا وتتحرك مثل هالعالم والا انت في طريق مع عيالك واانا بطريق وكل مره هالسالفه اقولها ولافي فائده يوعد ويرجع يخلف بنفس الوقت ..وكل شي من ورااي..تدرون مره طلبته اندومي بريال قال والله ماعندي وعطيته يجيبه لي عشا قبل لايروح الدوام عشاي بفلوسي يانااس وكل شي ترى بفلوسي ماعندي مالي الا انطم,!
صبرت وصبرت وكلمت ابوي واخواني وكانوا يشفقون على حالي وعيالي ويعطون كم ريال اصرف نفسي فيها وابوي طفش من زوجي يقول ميانفع معاه كم مره بالشهر تجونا بسبب هالمشاكل والحين صرت انا اللي اصرف انا اللي ادبر الفلوس وربي وجهي يضيع من كثر ماطلب سلفيات ونجلس بكم شهر مانسددها مانقدر الراتب يطير باسبوع بسبب الفيز والقرض مع قرض السياره ,,قسم بالله بدون مبالغه ريال واحد ماعندنا وتمر ايام نموت جووع وللحين نعاني من سلفيات الناس واحس بتانيب ضمير وفي اليوم الواحد افكر فيها 100 مره صرت اقطع شعري من التفكير والاحراج ..واخرها امس طلبت من اختي 200 نصرف فيها اعمارنا لين نهايه الشهر هذا اذا ماطارت بعد ساعه وقسم بالله كل شوي ابكي مصخها صارت يعتمد علي في الصرف مع اني مو موظفه واهلي ينقهورن منه بس مايبنون لي عشان لاتكبررالمشاكل بيننا ويعطوني كل ماجيتهم احس اني انقهر زوجي بارد ومايهتم ويشوف الدعوه عادي
وبعت كل ذهبي عشان اسدد ديونه واصرف على البيت مايمديني اشتري جوال الا بعد اسبوع بعته ماتهنيت فيه والحين عندنا طفل ثالث وعمره 3 سنين وماضافه بدفتر العائله بسبب المخالفات وصلت ل4000
ولا بعد توه مسوي مخالفه جديده مهمل بمعنى الكلمه قطع اشاارات على الكيف وكم مره بغى يصير لنا حاادث لانه يسرع والسياره خربانه وتحتاج تعديل وميزانيه كبيره ,,والحين كسر علي سقف المطبخ توه جديد ماله كم شهر وتوهق قلت له صلح السقف قبل لايجون العمال يركبون المطبخ ومانقدر تسوي السقف بعدين او تتكسر الدوالايب الجديده
بصراحه جنني يقول وش تبغيني اسوي ماعندي شي صار ينتظر مني ادبر الفلوس وربي كل هذا وميبين بعينه او يقول هذا الوقت اللي اعدل فيها امور بيتي وامسك زمام الامور واريح زوجتي ولاقصرت ابد وهي ماتقدر وقسم بالله تعبت يداوم ليل نهار طلعه مايطلعنا تمشيه مانعرفها فلوس الاعانه حقت الطفل يطيرها صرفيات للبيت وترى مو من كثر اكلنا او صرفياتنا استغرب منه صرت انا اللي اهتم انا اللي اصرف انا اللي بوجه المدفع لبغيت اتسلف وربي صرت اكررهه واحقد عليه كل شي عاادي عنده ظروفنا الماديه صعبه ويخرب ويهمل ولانقدر نسوي شي حتى لو بمبلغ بسيط مانقدر وربي طفشني المشكله مايطلع ولايروح ولايجي جالس عند التلفيزون برامج الكوره او نائم اوبالدوام بس
ولاهو من النوع االلي يشتري ملابس ويكشخ ياما فشلني يطلع وملابسه وسخه وعاادي نروح مستشفى اتفشل منه لحيته ماحلقها والشعر وش كثره والثوب مسود على خفيف كل هذا بسبب الفلوس لو عنده كان يكشخ بس صعب عليه لانه هو اللي مضيعنا ومضيع نفسه تدرون ماياكل من برى وهو نفسه فيه بسبب الفلوس ماعنده ,,العيد اللي راح واللي قبله ماشريت شي للعيد عشان عيالي وقلت له البس انت هالسنه عشان بنروح لاهلي انا مو لازم على الاقل انت بتطلع عند ابوي واخواني والشباب يقول خليها نطلع فيها هناك رحنا هناك وماشفت لاطلع ولاتمشيه ولاغيره بصراحه انقهر اشوف الرجال بكل مكان مع زوجاتهم مرتبين ولابسين زين وانا زوجي يسد نفسي مليت وربي مليت لو اقول لكم عنه كل شي بتنجنون ,,انسان راعي كلام ويعتمد على الحرمه ,,
سامحوني طولت ولكن وربي من القهر اللي فيني تعبت نفسيا راح شبابي ماتهنيت فيه بكره بيكبر الطف التعبان ل وبنحبس معاه مررره
نفسي وامنيتي اروح مكه والمدينه مانقدر قلبي متعلق فيها ماعمري رحتها ..وش اسوي الناس تغيرت والعالم واخوانه اللي اصغر منه تزوجوا بعده بكم سنه وماشاء الله عايشين مرتااحين الله يهنيهم وحتى خواتي واخواني لان عندهم ازواج ناضجين وعاقلين وزوجاتهم ماتعبوا من هالناحيه متطمنين لان ازواجهم مريحينهم وقايمي بواجباتهم,,
هذا حتى وجهه مغسول بمرق صار عادي لو طلبت من خواتي واخواني مايقول عيب,,وجالسين كلنا واخوانه عند اهله بشقه مستقله ببلاش يعني مافي ايجاروللعلم وقفت معااه وضحيت كثير وسدد الفيز كلها
فوق 20000 من اعانه الطفل ,,وياليته يحن عليه ويطلعه ويمشيه
المشكله اقل وحده اطلع وماتشرط واتساهل كثير بطلباتي وانط كثيير واقدر كثيير ومانفع ,,وقسم بالله احيان اكون جوعانه ونفسي بوجبه ماقدر انا وعيالي نطالع بحسره وقهر ملابس انا اتصرف واشتري لهم
ملابس شتويه مطلبته للعيال واذا طلبته احسه يتضايق كانه يقول لاتطفشيني وانتي تعرفين ماعندنا شي ,,! وحتى يوم نقلنا بشقه حقت اهله ماقدر ياثثها اثثنا الاساس من موكيت وغرفه نومي من فلوس اعانه الطفليعني حتى فلوس اعانه طفله ماسلمت من يده ,,ودائم ابكي على هالموضوع واذا لمحت له يعصب ويقول انت ومالك لابيك,,!
لا انا ولا وعيالي انبسطنا مثل الاوادم صرت اهدي نفسي واقول اني احسن من غيري انكتموا بالبيت مايفكر يرفه عننا ,,حاولت حاولت احس خلاص تعبت تعبت زهقت منه مادري وش اسوي اكثر من كذا صرت احيان ماطيق خلقته اليوم انفجرت ابكي وهو نايم مادرى عني
تكفون ادعوا له احس بديت اكرهه لان كل يوم حالنا يزيد اسوا بعد ماقول هانت الحمدلله احس الايام تمر وماسدننا شي للناس ولاقدرنا نعيش الراتب يانصرف فيه اغراض البيت اونطلع فيه ومافيه اغراض البيت
ارجوكم لاتزيدون همي ترااني تعبانه جسديا ونفسيا ولاوحده تتكلم وهي مو عارفه ظروفي وكيف عشت من اول يوم بزواجي ,,
حاسه مخنوقه وخانقتني العبره وقلت افضفض بس ,,
سامحوني يالغاليات كثرت عليكم ,,
سكوتي اتعبني ,,! @skoty_ataabny_1
عضوة جديدة
يلزم عليك تسجيل الدخول أولًا لكتابة تعليق.
ميراج222
•
يا قلبي والله حزنتيني وش اقول لك المشكلة عندك اطفال
لو ما عندك كنت طلبت منك تروحي للبيت اهلك
لكن يا اختي مدام انتي تعرفي الزوج مو قد المسؤوولية ليش تجيبو اطفال
الوحدة لازم قبل تجيب الطفل تشوف اولا الزوج هل هو يقدر المسؤولية ولا
بس الحين خلاص
نصيحتي ادعي وربي يسهل امرك يارب
ويسخر لك زوجك
لو ما عندك كنت طلبت منك تروحي للبيت اهلك
لكن يا اختي مدام انتي تعرفي الزوج مو قد المسؤوولية ليش تجيبو اطفال
الوحدة لازم قبل تجيب الطفل تشوف اولا الزوج هل هو يقدر المسؤولية ولا
بس الحين خلاص
نصيحتي ادعي وربي يسهل امرك يارب
ويسخر لك زوجك
الله يفرج همك اكثري من الإستغفار والدعاءالله يفرج همك اكثري من الإستغفار والدعاء
الصفحة الأخيرة
اكثري من الإستغفار والدعاء