على ضفاف الطلاق ,, كل شئ باذن الله لكن رأيكم يهمني

حبايبي بادخل في الموضوع دايركت

أنا صار لي قرابة 6 سنوات متزوجة,, ومن أيام الملكة وانا شاكة ان الآدمي اللي انا ماخذته مدمن مخدرات ,, وكنت باتطلق من وقتها لكن ربي ما اراد و عارضت امي الطلاق وحسستني ان الناس وش بتقول وكذا ؟؟؟ وانا خبرتي قليلة بالحياة مع ان عمري وقتها 24 سنة-يعني كبيرة- لكن القسمة والنصيب
هذا غير ان اخوي الله يهديه أكد لي انه مو مدمن --وهو قالها على اساس سؤاله ولان زوجي أكبر نصاب -اذا جا بيتنا يصلي في المسجد من النصب- وهذا الشي اللي اخوي ندمان عليه الآن
لكن زي ما قلت القسمة والنصيب والقضاء والقدر


المهم بعد سنة ونصف من الزواج ثبت انه مدمن واشترطت عليه العلاج أو الطلاق ,, وراح جدة لمستشفى الامل وتهنينا بالعلاج لمدة شهر بالكثير ورجع للتعاطي

وقبل سنة من الان صارت بيني وبينه مشكلة طوييييييييييييييييلة عرييييييييييييييضة وصلت للأهل وقرت الطلاق,, بعدين تراجعت واشترطت العلاج بالذات ان عندي طفلين منه ,, فتمسكت بالعلاج وليس الطلاق عشانهم - كنت على طول اتخيل اشكالهم وهم كبار وبعمر المدرسة وأبوهم مدمن في الشوارع-

المهم تعالج في مستشفى الامل -علاج مكثف -ورجع شخص ثاني ,, وتهنينا بالعلاج لمدة سنة ,, لكن التفكير السئ والشخص الغير سوي يبقى سئ وغير سوي

لأني بهذه الفترة بدأت أشك انه رجع للتعاطي -وطبعا شكي من واقع خبرة في اعراض الادمان - يعني يقين وليس شك

هذا غير اني بغيت استخدم جواله عشان احط شريحتي فيه -لما جوالي خرب علي بنص الليل- فلما اخذت جواله ومن باب الفضول قلبت فيه ,, لقيته مسجل بمنتدى طلبات الزواج ومراسلته وحدة من جنسية عربية -وللأسف عجزت أفتح الرسالة , لانها تجي إشعار بالرسالة وانها من فلانة وكذا واذا أردت فتحها ادخل ع الموقع

--- طبعا انقهررررررررررت وبكيت من القهر- يعني وقفت معك بأزمتك وإدمانك رغم ان اخواني كانوا مفضلين الطلاق وقالولي الأشكال هذه ما تنعدل لكن انا فضلت الرجعة عشان عيالي-أرحمهم بشكلللللل فضييييييييييع وما ابغاهم يكونوا اقل من غيرهم وعايشين مع ام فقط ,,,

----هذه مشكلتي البائسة ,, انا استخرت ودعيت ربي يختارلي ولا يخيرني لانه العليم الخبير الرحيم بي وباولادي

وبعد الله أطلب رأيكم ؟؟؟
انا مقتنعة بالطلاق تماما -بالذات اني ولله الحمد موظفة يعني ما اشيل هم الحاجة للناس- لكنني في نفس الوقت تضعف شخصيتي كثير وتنعدم ثقتي بنفسي لو اتطلق-لاني جربت هذا الشي بمشكلتي السابقة معه واللي قرت فيها الطلاق بعدين تراجعت -وقتها قلت ثقتي بنفسي وصرت حساااااسة جدا ,,


الشي الثاني اللي اخاف منه : اني ما ألقى زوج مناسب الا متزوج -بالذات ان عندي طفلين - انا لو اتطلق اكيد ابغى استقر واستقل مو اتطلق واقعد ببيت أهلي على طول - واكيد الكل يدري ببيت الاهل وزحمة الاخوات وكل ما وحدة جات تولد يقعدوا الصغار يتهاوشوا والشغلات هذي ,,-مع العلم ان بيت ابوي الله يشفيه ويحفظه واسع وهو الله يخليه يوقف معي ومع اولادي بقوة- لكن اللي يضايقني أمي أحسها رغم حبها لاولادي لكنها اذا شافتهم قاعدين عندها على طول تصير عصبية معهم وهالشي يضايقني ولا احب اناقش امي من باب البر فيها وبنفس الوقت أتعب نفسيا عليهم ( يعني أب مدمن وكمان أحد يغثهم ) -هذا غير اهمية الزوج في نفسيا وكذا ,وكمان للمشاوير :pinklove:

- عشان كذا أفضل الزواج , ولا اتخيل اني اعيش بقية عمري مطلقة ؟؟؟


انتظر تعليقاتكم من جميع النواحي ,, وفوق كل ذي علم عليم