البقرة أحسن من الراجل

البقرة أحسن من الراجل


الست مبروكة : :dozey:
أهلي جوزوني من 30 سنة من واحد أكبر مني ب 20 سنة , عمري وقتها كان 15 سنة و هوه 35 سنة , في 3 سنين خلفنا 3 بنات و بدأت الخناقات و كل يوم يعمل معايا عراكة و يقول : انتي بطنك جلابة بنات بس !
وجه في يوم قاللي : أنا جات لي فيزا للكويت , و بدأ يجهز أوراقه و الفلوس للسفر .. و في الفترة دي عرفت إني حامل و بشرت زوجي اللي ما فرحش و قاللي : يعني هتجيبي إيه .. أكيد بنت برضه !
و سافر و انتظرت و لم يصلني أي مكتوب يطمني .. و شهر ورا شهر .. و سنة ورا سنة .. ولا حس ولا خبر ..
استغليت البقرة اللي سابها لي بأعمل من اللبن زبدة و قشدة و أبيع .. و أعمل عيش و أبيع ..
و جوزت البنات و كل واحدة في بيتها .. و العجيبة إن اللي سابه ف بطني طلع ولد .. و أهو دلوقتي ما شاء الله جدع ملو هدومه و متعلم ف سنة أولى ف المعهد الزراعي بالأقصر .. و يارب أشوفه كده مهندس قد الدنيا ...
- و ليه ما فكرتيش تتجوزي مع إنك كنتي صغيرة ؟
- جواز إيه و هباب إيه ! خدت إيه من الجواز غير البهدلة ..يعني أتجوز واحد يسود عيشتي و يمكن يطمع في البقرة اللي حيلتي من الدنيا !!
- يعني البقرة ولا الراجل ؟
- طبعا البقرة ! , على الأقل ليها فايدة باحلبها و ابيع خيرها و ما بتنكدش على حد وفي حالها .. وباخد منها اللي أنا عاوزاه ! البقرة كمان موش عينها زايغة لكن الراجل مالوش أمان ! :S_45: