يابنات ادلو وادعولي والله ياخذ حقي من مشغل رولاود انعد شعري وطاح

العناية بالشعر

احب اكتب تجربتي مع هذا المشغل
قبل عرس اختي بكم يوم رحت رولاود اصبغ شعري
عشان العرس ورحت هذا المشغل من مدح البنات في النت المهم شلت نفسي ورحت من الساعه 3 الظهر عشان اخلص بدري المهم اول مارحت قابلتني وحده على الاستقبال قلت لها كم الصبغه قالت وش اللون قلت ابي اشقر رمادي وياليتني ما طلبته:sm1: قالت ادفعي 800 ريال قلت طيب صبغه ليش غاليه ردت هذا سعرنا قلت يالله ودفعت طبعا راح تقولو مغفله وانا عاذرتكم
انتظرت الى الساعه 8 وبعد طول انتظار نادوني وحطت شي مثل البلياج على شعري قلت وش ذا قالت هذي صبغه قلت ليش مثل البلياج قالت ذي صبغه من تركيا قلت يالله المهم انها وزعت الصبغه بطريقه بشعه قطعت شعري بالمشط وتشده بكل قوه وانا اقول توجعيني قالت شوي بس قلت اصبري وقع الفاس في الراس بدأ شعري يشب نار والله العظيم من الحراره اني بغيت اموت قلت لها شيلي الصبغه قالت لا شوي هي حاره شوي ماعاد استحملت وغسلتها الا شعري صار ابيض قلت انتي ساحبه لون قالت لا صبغه صار شعري مرعب وفروة شعري زي النار قالت ياللهوحطت بعدها صبغه ثانيه وبدت تمشط شعري مثل المره الاولى وكان الالم اكثر ماعاد تحملت قلت ليه كذا يوجعني المهم لعبت فيني لعب ساعتين ونص وهي تلعب في شعري
بعدها رحت البيت وانا اتالم من فروت راسي قلت لبنتي شوفي شعري يوجعني يوم ناظرت شعر :eek:صاحت قالت فروة راسك كلها دم:eek:

شلت نفسي ورحت المستشفى الدكتور انجن يوم شاف فروة راسي قلت اكتب لي تقرير طبي وماقصر عطاني تقرير طبي
ورحت اشتكت عليهم في البلديه
تحذير من هذولا التركيات الي فيه اقسم بالله قمة النصب والاحتيال نصيحه لوجه الله لا يسير فيكم مثلي
شعري تساقط وقربت اصلع وحقي الى الان ما خذته ادري اني مغفله بس ماكنت ادري انهم نصابات الله لا يوفقهم ويوريني فيهم يوم تشوف الدم في شعري وتقول اصبري الصبغه حاره
على فكره رحت مشغل ثاني عشان عرس اختي قالت انتي مسحوب لون شعرك قلت الكوفيره تقول مو سحب قالت لا سحبته وصار شعري كنه سلك تقطع وتساقط وقربت اصلع خاصه من وسط الراس حياتي تغيرت من ذاك اليوم وتعلمت درس ان اللي يمدحونهم في النت هو الكوفيرات نفسهم انتبوا لا توقعون في الي صار لي والله اني ما كتبت هذا الموضوع الا احتساب الاجر من عند الله واحمي بنات بلدي من هذولا المرتزقه التركيات الاستغلاليات اللهم ارني فيهم عجايب قدرتك
ودعوا ربي يشفيني

ويابنات لا تقوولون يمكن فروة راسك تعبانه والا حساسه والله اني دايم اصبغ داليا وبالبيت ودار الجمال ومشاغل واجد ولاعمري صار فيني زي كذا

الله يرزق كل وحده تدعيلي ويحقق امنياتهااللهم امين
37
5K

يلزم عليك تسجيل الدخول أولًا لكتابة تعليق.

تسجيل دخول

غلامرمر
غلامرمر
حسبنا الله ونعم الوكيل الله يرفع عنك اختي...
وماتشوفين شر والله يجازي كل ضالم
om dahom
om dahom
اذا تقصدين اللي بالبديعة انا من زمان قصيت عندهم على مدح وحده بس والله ماشفت شىء قصيت شعري مره وبعد هالقصه ماادري شفية طول كثير على ماطال وكمان مشغل انتى وهي والله رحت على مدح البنات كنت بصبغ وشكلها حسبي الله عليها سحبت اللون لان شعري خف وطلع فيه شيب كثير وماكان فيه شىء من الاول
الريم اللعوب..
حسبي الله عليهم الله لا يسامحهم
لا تسكتين بيضرون غيرك مثل ما ضروك
و انشري كلامك فالمنتديات
Blue hawwa
Blue hawwa
لا حول ولا قوة إلا بالله ..
والله بعض الناس صار فيهم استهتار بطريقة مقززة ..

الله لا يسامحهم ويعجل بشفائك إن شاء الله أختي ..
ومثل ما قالوا البنات لااااا تسكتين عن حقك .. وانشري كل شي في المنتديات عشان الحذر ..
حياتي علمتني
حياتي علمتني
الله يوفقكم يابنات على دعواتكم لا تحرموني امانه وبالنسبه للشكوى اشتكيت البلديه بس ماعطوني وجه لا حياة لمن تنادي الله ينتقم منهم