أسهل باب لدخول الفردوس الآعلى ! { وعلى فكرة إحنا نعملها كل يوم أكثر من مرّة }

منقول


بسم الله الرحمن الرحيم
السلام عليكم ورحمة الله وبركاته

أخباركم حبوبات يآعساكم طيبآآآت
يآرب .....
----< يا حبي لهالسمايلي من جد أنا .

المهمز حبيباتي مره من المراير
جتنا داعية للمدرسة وقامت
تكلمنا عن الصلاة !!
ما أنكر إننا في البداية قلنا خييير!
وش دعوى في أحد ما يعرف وشلون يصلي ؟
وإحنا كباااار
---< ثالث ثنوي
بس تدرون وش ؟؟
إي والله طلعنا مو بس ما نعرف وشلون نصلي؟
لاآآآآآع إلا جاهلات كمان .....!

والله يآ بنات هي ندم وحسره على عمرنا إلي راح وإحنا
نصلي وما نصلي بنفس الوقت

أكيد الكل يعرف ما هي الصلاة ولو تكلمت عن الصلاة
بشكل مطلق ما رح أخلص ...!

لكن أنا حابة أكلمكم اليوم عن فضل وااحد فقط من أفضال الصلاة
--------< ما أدري صح علي جمع فضل أفضال

بنات هل تعلمون بأن الصلاة
سبب لدخولك الجنة ؟؟
طيب وش الجديد ....!

طيب طيب

هل تعلمون بأن الصلاة سبب
لدخول جنة الفردوس الآعلى ؟؟
وما يحتاج أقول إن الفردوس
" أعلى درجاات الجنّة "

يالله يابنات والله دوبني دريت
ياحراام من جد من جد من جد ديننا دين يسر
ومن جد من جد من جد إحنا ماااره غافلين ..!!


طيب وين الدليل ؟؟
الدليل مرره واضح وموجود عندك بالبيت
افتحي القرآن على سورة المؤمنون ..
وشوفي أول عشر آيآآت فيها أسبآب دخول الفردوس
والآيه الإحدى عشر فيها تبشير صريح لدخول الفردوس
ولاحظي
من عظم الصلاة إنذكرت مرتين بنفس العشر آيات

{الَّذِينَ هُمْ فِي صَلَاتِهِمْ خَاشِعُونَ (2) }

وكمان

{وَالَّذِينَ هُمْ عَلَىٰ صَلَوَاتِهِمْ يُحَافِظُونَ (9) }

وكمان الدليل القاطع الآخر هو :
قال حبيبنا اللهم صل وسلم وبارك عليه :
(لقد أنزل علي عشر آيات من أقامهن دخل الجنة ,
ثم قرأ " قد أفلح المؤمنون " حتى ختم العشر )
رواه الترمذي في تفسيره والنسائي .

يالله ...
هذي قطرة بس من بحر فضل الصلاة


بعدين يا حبوبات الصلاة مو بس فضلها عالاخرة وبس
الصلاه حتى فضلها بالدونيا كبير
يعني كفاية إن الصلاة تنهى عن الفحشاء والمنكر ..

وسبحان الله على إن الصلاة مااره سهله وما تكلفك "دقايق"
لكن ما أدري فيه ناس حتى حاارمين نفسهم من الصلاة بكبرها
"" وإلي من دون نقاش يُعتبر كافر
وتدرون كمان إن إلي يأخر الصلاة متعمدا يكفر!!
أسأل الله لي ولكم السلامة ""

والآدهى إننا نستكثر على أنفسنا نطول الصلاة , ونجلس
عالنت أو عالتلفزيون أو نسولف بالساعات ولا جت الصلاة ...

وش معنى بالصلاة بالذات أتذكر إني ماقلت هالسالفة
لنورة ؟
ولا ما يجيني حب السوق وأخطط وش رح أشتري منه إلا
بالصلاة ؟
سبحان الله ليش .؟؟
لا وتدرون وش سمعت ؟
يقولون إن اليهود وبوذا والنصارى وطقّتهم
لمّا يصلون ما ممكن يتشوشو أو يوسوس لهم الشيطان .
ويصلون بكل خشوع !!

يا سلام !!
إنزين لمازا ؟ وش معنى إحنا ؟

الإجابة واضحة وضوح الشمس..!
لآن لو أدركنا الصلاة ""بالمعنى الحقيقي للصلاة ""
أدركنا الجنّة .
ههههه وبعدين وش عبالكم الشيطان غبي لهالدرجة.
أصلا يدري إنهم إلى (النااار سِر )!
من دون تدخله فليش من أساس يضيع وقته معاهم !
شايفين ترى اللعبة والمؤامرة واضحة من عدوي وعدوك
وعدو الله .





الصلاة مو بس تفتح لك أبواب الدنيا والآخرة وخلاص .!
الصلاة حتى تغير حياتك ونفسيتك ونظرتك للحياة كمانا

بعدين تعالي يالشين .؟
مين قدك ؟
إنتي الوحيدة بهالعاالم كله , إلي تجيك دعوة
كل يوووم خمس مراات !
إيه ربي يدعوك خمس مرات ...
حصلت لآحد قبلنا
اليهود ...النصارى ؟
نو نو ..
شايفة الوناسة قد إيش ..؟
والله إني أحمد ربي وأشكره على نعمته العظيمة ..


وبعدين إنتي تسمعين المؤذن
لما يقول الله أكبر ..
تأكدي وإجزمي إنو الله أكبر من كل شئ بين يدينك مهما كان ومهما
يكون ..
أول الدعوة الله أكبر
فليش العناد وتأخير الصلاة ؟
أتحداك يكون شاغلك حاجة من جد مهمة إلى هاذي الدرجة
يا تكون مباراة ولا مسلسل ولا سوالف ولا....



تيب..

بعد كل هالكلام وهالمقدمة
-----< ترى كل إلي فات مقدمة بس





أمزح


وشلون نقدر نغيّر عادتنا بالصلاة
ونصير أسعد النااس


أنا أقولك....


قومي دحين وإغسلي شرشف صلاتك وإن حصل تنزلين السوق وتشترين
شرشف وسجادة جديدة ...
----< وفي معظم المناطق يسمى الشرشف "جلال الصلاة" .
وخصصي مكان معين للصلاة فقط

وفيه حركة حلوة أنا أسويها وهي إني أجيب مرتبة سرير حجم صغير
إلي هي بتاعة الأطفــال .
وبالعامي " دوشق صغير "




ثم أفرش فوقه السجادة وأصلي عليها بكذا تحسين براحة شديدة وإنتي تصلين
وتقدرين تسجدين وتطولين بالسجود


وكمان حطي لك مسواك وعطر ريحته حلوة وخليها قريبة منك

{إنتي بكذا بتكونين أهّلتي نفسك "نفسيا " للصلاة}
وأكيد رح ترتاحين لو إنك
مصليه ومتعطره بريحة حلوة وفمّك كمان معطرته بالمسواك .

وبعدها توضّي لكل صـــلاة , حتى تحسين بقيمة الصلاة إلي رح تدخلي فيها .


ولما تلبسين الشرشف
وقّفي شوي لا تكبرين بسرعة , وإبدأي كلمي نفسك
بهدوء وقولي أنا دحين رح أقابل عظيم السماوات والأرض
ووو .. على حسب الكلام إلي يريحك , ويخليك تخشعين بصلاتك

بس هااه , لا تعسرين على نفسك , ومرّه تشدين حيلك بالصلاة
وتحاولين ما تفكرين بولاشئ , وهكزا !!


الطريقة هاذي ما تنفع .
إنتي أساسا وقت ما إنتي داخلة الصلاة إعتبريها بريك لك
من الحياة كلها , وإعتبريها وقت لقائك مع ربّك وقت حميمي
من جد ..
آه بس لو تذوقون الشعور .
والله إني مرات أكون ساجدة وأحس صدري مضغووط عليه
من كثر الهموم بس أرفع من السجدة كأن كل إلي على صدري
طاااح وقت ما كنت ساجدة ..


وأكيد لما تبدأين بالصلاة ترى ما أحد قاعد يلحقك
ولا العالم بينتهي ؟

حبّة حبّة ..!

أول ما تكبرين أقرأي دعاء الاستفتاح والفاتحة وسورة أو حتى آية من
آيات كتاب الله وحاولى تنوعينها بكل ركعــة

وإتمي كل شئ أركعي تماام ووقفي شوي
لما تقولي سمع الله لمن حمده . ربنا ولك الحمد .
وكمان الجلوس وبين السجدتين !
أتمِّي كل شئ .
ودحين بس تخلصين من موضوعي روحي على
موقع موثوق مثل " إسلام ويب "
------< آحم تراني ما أعلن لمنتدى ثاني لآنو مش منتدى هو موقع موثوق جدا
وأكيد ما أزكيهم على الله
وفيه مجموعه مشايخ وكم هائل من الفتاوى , فرجاء تتفهموني الادارة المصونة لآننا نحتاج مواقع
موثوقة صراحة النت أختلط فيه الحابل بالنابل . وإلي عندها كمان لاتقصّر .

وأي سؤال عندك إبحثيه عندهم ولا حتى أسأليهم ,
واجتهدي بدينك ..

آآه بس والله ما أنسى هذيك البنت هي وأختها!!
أذكر مره كنت في منتزه الديرة في الرياض
وكنا جالسين عالعشب برى
مع الناس يعني
المهمز وجا وقت صلاة بس مش فاكرة هي صلاة المغرب
ولا العشاء
وقاموا بنات قدامنا بشوي يبون يصلون
وااه يابنات لو تشوفون صلاتهم !
اللهم لا شماته !
تقولون مسوين سباق مين إلي تخلص الاول !
وعلى بالكم يسجدون !
لالا ..
ما يسجدون يلمسون الارض بخشومهم ويعدّون
لاواحد ثم يقومون !!
يعني ما تصدقون كيف صلاتهم ..
وشوي تجي حرمة عندهم شكلها أمهم أو عمتهم لآن من شكلها
كبيره بالسن مو زي أعمارهم وجلست عندهم
وتعالوا شوفوهم ..
شوفوا الخشوع يا عيني عليكم
صاروا يصلون ببطئ والماراثون إلي كانوا عاملينه
اختفى ..
حرااااااااااام والله حرام, استحوا من هالمخلوقة إلي من تراب
ولا استحوا من ربّهم







جربوها ,, صدقوني قلبكم رح يتعلق فيها ,,
ورح تجون تبشرون العالم كله بسعادتكم
وتبكون على كل الوقت إلي ضيعتوووه وإنتم تصلووون,,
وبنفس الوقت ما تصلون


وفي الختام ::
قال الله تعالى : { يَا أَيُّهَا الَّذِينَ آمَنُواْ لاَ تَقْرَبُواْ الصَّلاَةَ وَأَنتُمْ سُكَارَى حَتَّىَ تَعْلَمُواْ مَا تَقُولُونَ}
سورة النساء 43

أمرنا الله بأن لا نقرب الصلاة ونحن سكارى حتى ندرك ما نقول !!
ونحن لسنا بسكارى
ولكن !!

لاندرك ما نقول في الصلاة ..

-----< لا تعليق





يارب أكون وفّقت بموضوعي هذا
وأكون أفدتكم ولو بالشئ البسيط يآآرب
ولا أكون طولت عليك حاولت أختصر كثر ما أقدر
ولو كان فيه كلام كثير حيل يقرقع بقلبي
بس حكمتي في الحياة " خير الكلام ما قلّ
ودل "


وأرحب بإضافاتكم للموضوع إلي من جد نستفيد منها


وأكيد الحقوق محفوظة لكل مسلم
{ أحلل وأبيح النقل بالعكس الله يوفق إلي ينقل هالموضوع حتى لو ينسبه
لنفسه لآنه بكذا يعين عالخير }


ولا تنسون إن النت مليان ناس جاهله بأمور دينها ,
ليش نروح ونسوي تقارير ومواضيع يا زينها وياحلاتها
عن فلانه الفلانية , ونخليها أشهر من نار على علم
لدرجة والله قبل شوي بس أكتب حرف واحد يطلع لي
إسمها ..
وديننا إلي مفروض نوصله لكل قريب وبعيد نتكاسل ونتعاجز
حتى بتنسيقه ..

منقول


يلآ سلام حبيباتي

إيه على طاري السلام هل تعلمون بأنكم لو قلتو السلام عليكم لك عشر حسنات !
وإن قلتي السلام عليكم ورحمة الله لك عشرين حسنه !
وإن قلتي السلام عليكم ورحمة الله وبركاته
لك ثلاثين حسنه


البرهان :
عن عمران بن حصين أن رجلا جاء إلى النبي - صلى الله عليه وسلم - فقال: السلام عليكم قال: قال النبي - صلى الله عليه وسلم(عشر) ثم جاء آخر
فقال : السلام عليكم ورحمة الله فقال النبي - صلى الله عليه وسلم عشرون )
ثم جاء آخر فقال : السلام عليكم ورحمة الله وبركاته فقال النبي - صلى الله عليه و سلم ( ثلاثون) .
الحديث حسن صحيح .