أولادي والأكل

السلام عليكم ورحمة الله وبركاته

كيفكم يا بنات يارب تكونوا بخير وصحة وسعادة


الحمد لله أولادي ماشاء الله لا قوة إلا بالله ياكلوا وماني تعبانه معاهم في هذا الموضوع ماعدا الصغير مايرضى ياكل إلا بمزاجه واقول ماعلي منه يكبر ويصير ياكل أن شاء الله


مشكلتي....!!!!

انا واخواتي كل أسبوع نتجمع وعيالهم مرة اكلهم قليل

عموما بيت اهلي مشهورين اكلنا قليل ماناكل حتى وانا صغيرة ماكنت آكل وبعد ماتزوجت تعلمت للأكل شويه شويه وحملت وخلفت وتعبت وبعدها عرفت مصلحتي وصرت اهتم في الأكل.

المهم عيال اختي مايرضوا ياكلوا. . نقرب السفرة ماحد يجلس من عيالهم واذا جلسوا بسرعه يقوموا بس عيالي ماشاء الله ربي يحفظهم يجلسوا ويدوروا للأكل وكأني ما اكلهم يحرجوني وفي نفس الوقت أخاف عليهم لأنهم ملفتين للنظر و اهلي صاروا يتضايقوا منهم ويتكلموا عليهم انهم اكيلين
حتى اخواتي صاروا يتكلموا مع بعض اختي تقول لاختي الثانية مساكين عيالك ماياكلوا ...وحتى ولدي اكله قليل مايحب الا الحلويات والشوكولاته والشيبس ودائما تقول لولدها كل زي ولد فلانه شوف دحين بيصير أطول منك تقصد ولدي وفعلا ولدي ماشاء الله أصغر من ولدها بسنوات وولدي صار طول ولدها وصحته احسن منه ربي يبارك فيه.. وعيالي ماشاء الله يكونوا جالسين ع السفرة لين تخلص كل الصحون والنظرات عليهم ما اتوهم بس اهذا اللي يصير فاهلي اكلهم قليل وحتى لما يحطوا اكل في السفرة يكون كمان قليل ع بالهم يكفي لان اصلا ماياكلوا كويس فصرت والله اخاصم عيالي واقولهم اول مايقوموا أولاد خالاتكم انتوا قوموا معاهم .. أولاد اختي نحاف وعيالي ماشاء الله لا قوة إلا بالله صحتهم حلوة وطولهم حلو..

من المواقف اللي حصلت وزعنا سندوتشات ع الاولاد كل وحده اشترت لعيالها اختي اشترت اثنين واحد لها وواحد قسمته ع عيالها الثلاثة قلت لها ليه اعطيهم من واحد قالت لا والله ماحياكلوه قلت لها طيب انت السبب تخلي اكلهم قليل كيف تعطي ولدك ربع سندوتش وهو ماشاء الله رابع طالع خامس المهم وانا اشتريت لاولادي من سندوتش ولدي الله يحفظه أكل سندوتشه وقال بصوت عالي ماما في سندوتش ثاني ماشبعت وانا وقتها كان نفسي اصفعه بكف لأن أولاد اختي لسى ع الربع قاعدين ياكلوا ..

المهم والله أحيان اضربهم في البيت كله عشان هذا الموضوع وقلت لهم أي سفرة تتقرب بيت اهلي لاتجلسوا إلا إذا كلمتكم فلما اروح بيت اهلي لاحظتهم يجوعوا زيادة ويبغوا أكل لأن الممنوع مرغوب ..

واللي ح تقول اكليهم في بيتك قبل لا تخرجي جربت ونفس الشيء ماشاء الله يجوعوا وانا أطول بيت اهلي

مدري أحس ولدي ماشاء الله ربي يحفظه مايشبع هل هذا طبيعي عمره عشرة وبنتي عمرها ثمنية ونفس الشيء.. انا صرت اتضايق من هذا الموضوع لأن عندنا ميزانية محددة للأكل .. وأقول الحمد لله انا في نعمة أولادي مو متعبيني في الأكل يارب لك الحمد ربي يحفظهم ويبارك فيهم بس معاناة لما أخرج واحراج خاصة عند الناس اللي ماتاكل.


وع فكرة ولدي هذا اللي عمره عشرة سنوات فجأة صار مايمشي ولا يقدر يوقف ع رجوله البسه الله يكرمكم حفايظ وانظفه واغسله وهو في مكانه جلس على هذي الحالة ثمنية أو تسعة شهور بعد الرقية والشيخ قرأ عليه وانا وابوه قرأنا عليه والحمد لله بفضل من الله رجع يمشي

وبنتي إلى الآن فجأة يجيها صداع قوي تبكي منه واستفراغ بدون سبب والحمد لله على كل حال...