(رفقا أيتها الأخوات بالخـــــــــــــــــادماااات)
السلام عليكم ورحمة الله وبركاته:
هذه ملاحظات على بعض الأخوات هداهن الله.
ترى الخادمة ياأخواتي بشر(يعني لحم ودم) ماهي رجل حديدي أو رجل آلي...
ارحموا اللواتي أتين من بلد بعيد تركن أولادهن، وأزواجهن ،وأهلهن، وعشيرتهن لأجل لقمة العيش والفقر اللي طاقهن !!! ليش تستغلون فقرهن وضعفهن بأشياء وأعمال لاتطاق !! واذا نصحت الوحدة فيهن قالت خليهن يحللن فلوسهن !!
الله أكبر!!! يعني أنتي محللة فلوسك ؟؟ تشترين جزمة ،أوشنطة ،أو فستان ب800 وتحسبينك محللة فلوسك ؟؟ ناسية إنك راح تسألين عنهن يوم القيامة؟؟؟
المسكينة محللة فلوسه لو مايجيها إلا الكنس وغسل الملابس والمواعين والكوي اللي ماينتهي !!!
يكفيها الغربة والبعد عن أولادها وأهلها كل هذا علشان توفرلهم لقمة العيش والمسكن والدواء..
ياأختي أعتبري ال800 صدقة.!!
فالخادمة اللي في بيتك تراها أولى الناس بالصدقة!!
ليش تخلين الشغالة كل بعد فترة وفترة تتشعمط هالسلم وتمسّح المراوح والأسقف واللمبات والدرايش؟؟
تراها ماجت علشان تكرف كذا!!
ماهي عامل خاص بصيانة المباني!!
هذا غير الغسيل والطبخ والنفخ والكوي والقلي اللي أحيانا تكون بعز الحر وبمطبخ مافيه ولا مكيف تلاقين روحه تتزهق من الحر والكرف الله يقوم بعونه ،،
هذا غير تحفيظ الصغار ،وترضيعهم، وتنويمهم ،حتى والله أنها أحيانا تقوم من أكلها أربع أو خمس مرات ماتتهنا ولا بلقمتها !! فلانة جيبي ملعقة ، فلانة جيبي مناديل ، فلانة خوذي بيبي ، فلانة فكي باب، وتلقين عندك بناتك وأولادك مابهم اللي يتحرك وينفع نفسه وينفع غيره ،ومع هذا كله ماسلمت المسكينة يقال عنها إنه عجازة ،وباردة ،ونوامة،وراحت علينا أأعمالنا وأموالنا.
والله لو أنتي بمكانها مكروفة عند ناس بين أربعة جدران لمدة شهر واحد فقط !! كان انهبلتي أو انتحرتي أو فتحتي الباب وهجيتي ،ارحموا من في الأرض يرحمكم من في السماء.
ياأخواتي نبينا عليه الصلاة والسلام مات وهو يوصينا (الصلاة الصلاة وما ملكت أيمانكم).
والله يعينهن هالمسكينات هالأيام هذي على تمسيح هالغبرات والأتربة مع تغيرات الجو تلقينها ناسفة فوطتها على كتفها من صباح العالمين ماتدري وش اتبدي من تمسيح الأثاث، أو التحف، أو الورود ،أو الأرضيات ،أو الدرايش أو...أو..
ترى ولله ماراح نسأل أمام الله عن نظافة بيوتنا من الغبار والأتربة !!
نبي نسأل والله عن نظافة البيوت من الأشياء اللي تغضب الرب من تضييع الصلوات وتضييع الرعية و...و...و....
.هذا غير شغل البيت الأساسي اللي متقعد له !!
أنا بصراحة ماألومهن لو فتحن الباب وهجن . هذا غير الإهانات اللي يلاقن بعضهن من أهل البيت والسب والشتم الله يقوم بعونهن. أسألك بالله لو بناتك اللي يشتغلن في بلد ثاني مايحترق قلبك عليهن وترحمينهن؟؟؟ (لايؤمن أحدكم حتى يحب لأخيه ما يحب لنفسه).
الله يستر علينا مايجينا يوم ونبدا حنا وبناتنا اللي نشتغل بديارهم ترى النعمة ماتدوم إذا ماشُكرت لابد لها من زوال !!!
وبعدين أيام الغبار المتواصل مهب لازم تخلين هالمسكينة كل وقت وكل يوم تمسح حددي له يوم أو يومين بالأسبوع إلا إذا صار يبي يجيك ضيوف . أو ساعديها أمسكي لك فوطة وابدي مسحي معها مايضرك تراه بيتك واحتسبي الأجرمن الله. قال عليه الصلاة والسلام (إخوانكم خولكم (عبيدكم) جعلهم الله تحت أيديكم فمن كان أخوه تحت يده فليطعمه مما يأكل ويلبسه مما يلبس ولا تكلفوهم مايغلبهم فإن كلفتموهم فأعينوهم) البخاري.
وبعدين نصيحتي لكل وحدة تقسو على شغالتها إنها تعاملها بالكلمة الطيبة والإبتسامة لتكسبها وتأمن غدرها !! تراها ماراح تدوم لك كلها فترة معينة وتتروح لديرتها ، خليها إذا راحت تذكرك بخيـــــــــــــــــر وتدعي لك بظهر الغيب بدل ماتدعي عليك وتعمل لك سحر وبلاوي ،،، فكم من المشاكل نسمع ونرى راح ضحيتها أسر سببها سوء المعاملة...
والله لو شفتون أنا وشغالاتي وشلون ؟؟؟ أسولف معهن واضحك معهن واعلمهن عن أخبار العائلة من مات؟ ومن تزوج ؟ ومن سافر؟ ومن ولد ؟
حتى والله إني إذا صار زوجي معزوم أخليها تجلس معنا على السفرة وتاكل معنا وما تتخيلون وشلون فرحتها وضحكتها وهي بيننا أنا وبناتي !! ليش ماتتواضعن معهن ونبينا المصطفى كان يأكل ويجلس مع الفقراء؟؟؟ والله معتبرته صديقة لي في البيت أوأخت حتى إن الوقت اللي أشوفها واقعد معاها أكثر من ما أقعد مع بناتي أوأشوفهن،، والحمد لله أنا مبسوطة وهن مبسوطات ..
ليش تعاملينها كأنها أكبر عدوة لك في البيت وهي اللي خادمتك من جميع النواحي وتعرف أسرار بيتك بل هي من أولى الناس بالكلمة الطيبة والصداقة!! اضحكي معها واحتسبي الأجر وتذكري قول الرسول (تبسمك في وجه أخيك صدقة) ، سولفي معها بعض الوقت (والكلمة الطيبة صدقة)، قدمي له هدية (تهادوا تحابوا) خاصة في المناسبات كالأعياد، والله لو لاحظتيها ليلة العيد وشلون ضايق صدرها ودمعتها على خدها تتذكر أعز حبايبها اللي لها أشهر وسنين ماشافتهم، وحنا إلى ذيك اللحظة وحنا نكرفهن ،، حرااام عليكم كذا،، والله لو طبقتي اللي قلت لك راح تعيشين وانتي مرتاحة البال من شغالتك، ومطمئنة على نفسك وبيتك وأولادك.
أختي الحبيبة أن من حق الخادمة عليك مايلي :
*حســــــــــــــن المعاملة: وهذا باب كبيـــــــــــــر من أبواب البر، فقد كان عليه الصلاة والسلام خير الناس في معاملة البشر، يقول خادمه أنس بن مالك خدمته في السفر والحضر ما قال لي لشيء صنعته لمَ صنعت هذا هكذا، ولا لشيء لم اصنعه لمَ لم تصنع هذا هكذا) . فعاملي الناس كما تحبي أن يعاملوك،، فهي في بلدها معززة مكرمة ، فهي الأم،، والعمة،، والخالة،، فلم تأتي إلا لحاجتها الماسّـــة وحاجة أهلها وأولادها، اللهم اسخرهم لنا ، وسخّرنا لهم .
فمهما أساءت إليك أحسني إليها وتذكري قول الله تعالى (ولاتستوي الحسنة ولا السيئة ادفع بالتي هي أحسن فإذا الذي بينك وبينه عداوة كأنه ولي حميم) أي كأنه أقرب صديق وحبيب إليك.
*تعليمها أمور دينها. والعفو عنها:
فمن منا لاتخطئ ؟؟؟
ومن منا إذا أخطأت لاتحب أن يغفر لها ؟؟؟
فكذلك الخادمة. قال عبدالله ابن عمر رضي الله عنهما (جاء رجل إلى النبي صلى الله عليه وسلم فقال : يارسول الله ؟ كم أعفو عن الخادم ؟ فصمت عنه رسول الله ، ثم قال يا رسول الله ؟ كم أعفو عن الخادم ؟ فقال كل يوم سبعين مرة)رواه الترمذي. فالله المستعان شتان بين هذا وذاك.
*أعطائها حقها من الراتب : فلا يجوز بخس الخادمة راتبها أو تأخيره عنها.
*الإنفاق على الخادمة صدقة للمنفق أجرها عند الله تعالى، وقد حث النبي الإنفاق على الخادم لأنه قريب ويرجى أن تكون هذه الصدقة ذات أثر طيب في نفسه تجاه مخدومه.
*لاتكلف فوق طاقتها: ( للملوك طعامه وكسوته ولا يكلف من العمل إلا ما يطيق) رواه مسلم.
أسألك بالله لو ماكان عندك خادمة !! بعد كم سنة تتقومين بتمسيح المراوح واللمبات والدرايش؟؟ بعد سنة؟ أوسنتين ؟ أو خمس؟ أو ربما عشر سنوات؟ وهذا هو الواقع !! أترك الإجابة لك . ....
أما إذا صارت الخادمة فمن ساعة ما توصل لك من ديرتها تمسّـك الفوطة وتعطى هالسلم وتبدأ بالكرف اللي ماله داعي ،،
*عدم إهانتها أوضربها: فالله تعالى رفيق يحب الرفق ، ويعطي على الرفق مالا يعطي على العنف.
* أكل الخادمة من أكل أهل البيت : إن إطعام الخادمة صدقة كإطعام النفس والزوجة والولد.
*الدعاء لها لا الدعاء عليها : فقد نهانا رسولنا الكريم على أن ندعو على أنفسنا أو ما رزقنا الله من الولد والخدم والمال فقال ( لاتدعوا على أنفسكم ولا تدعوا على اولادكم ولا تدعوا على خدمكم ولا تدعوا على أموالكم لا توافقوا من الله تبارك وتعالى ساعة نيل فيها عطاء فيستجيب لكم) أبو داود.
وأخيرا تذكـــــــــــــــــري أن الجزاء من جنس العمـــــــــــــــــــــــــــــــــل
قال رسول الله( من لايرحـــــــم الناس لايرحمــــــــــــــــــه الله) متفق عليه.
عذرا أخياتي على الإطـــــــــــــــــــــالة وأعتذر أن كنت قسوت عليكن بالكلام !! لكني والله لم أكتب ذلك إلا إني أحببت تذكيركن بحقوقهن!! ورحمة وشفقة بهن!! وخوفا عليكن من سوء العاقبة!!
وخوفا على أنفسنا وبناتنا أن يصيبنا من الفقر والغربة ماأصابهن !!
(( فكمــــــــــــــــــــــا تديــــــن تداااااان ))
نعوذ بالله من زوال نعمتــــــه ، وفجاءة نقمتـــــــه , وتحول عافيتـــــــــه ،
(( آميـــــــــــــــــــــــــــــــــــــــــن )).
(عــــــــــــــــــــــــــــ ـــــــــااااجل للأخــــــــــــــــــــــــــ وات)
20
1K
يلزم عليك تسجيل الدخول أولًا لكتابة تعليق.
ha2009nd
•
اي والله ان كلامك صحيح بارك الله فيك
ياسلام عليك يا اختي
بارك الله فيك وجزاك الله الفردوس ووالديك
ماشاءالله عليك كلامك درر والله انك صادقه
والمشكله سؤ المعامله هو المتفشي بيننا والله لو نعاملهم كما ذكرتي احسب ان مشاكلهم انتهت
من القلب شكرا لك قلتي مايدور في خاطري
لافض فوك غاليتي
بارك الله فيك وجزاك الله الفردوس ووالديك
ماشاءالله عليك كلامك درر والله انك صادقه
والمشكله سؤ المعامله هو المتفشي بيننا والله لو نعاملهم كما ذكرتي احسب ان مشاكلهم انتهت
من القلب شكرا لك قلتي مايدور في خاطري
لافض فوك غاليتي
ارومة
•
الله يجزاك كل خير والله انى امس جايبه وحدة من الافارقة بالشهر لانى على وشك ولادة ومحتارة في معاملتها لاكن تذكرت الرسول صلى الله علية وسلم ومعاملتة لخادمة فبادرت اليوم واشتريت لها هدية ولوالدتها وانا اول مرة اجيب شغاله بصراحة لاكن كلامك الله يوفقك ريحني واعطاني حافز انى احسن اليها لانى كل مااستشير احد يقولون لاتعطيها وجة
الصفحة الأخيرة