ابي حل مع زوجي

صباح الخير
انا اول مره اكتب بالقسم هذا وحبيت افضفض لكم شوي
وقلت مالي الا بنات حواء
الصراحه انا طفشانه وشبعانه من الروتين
وزوجي مخلي البيت فندق للنوم واللبس وحتى الاكل ماياكل معنا غير وجبتين بالاسبوع
ومقسم وقته دوام ونوم واهله والاستراحه وحقي من اليوم ساعه وهالساعه يقضيها على تصفح النت
و مومقصره عليه بشي وهو شاهد على كذا
مع اني صغيره وعندي بنتين
ومشغله وقتي بتنظيف البيت والبنات واهتمامي بنفسي والنت
ولي خمس سنين وانا اناقشه بود وهدؤ واقوله عطني من وقتك شوي مع انه طيب معي
و حاولت اغير الروتين بليالي رومنسيه وتغير بعض الشيء بس ماقدرت
واذا قلت له خلنا نسافر نغير جو لو يومين او نطلع منتزه حلو او نتعشى بمطعم او اروح للسوق اخلص بعض اغراضي ونمشي البنات حجتة الوحيده( مادتي تعبانه)
مع انه مافيه لا ايجار لان البيت لابوه ولا سياره اقصاد ولا راتب شغاله ومااروح للسوق الا وقت المناسبات حتى الفواتير يجلسن 3 شهور او اكثر ماسددتهن واغراض البيت قليله مره ومن البقاله حتى مصروف مااخذ , ماعليه غير قرض بنك ياخذون الفين ريال بس وعلى وشك يخلص, ومن زمان ما اهداني هديه او رسالة جوال
واذا طلع فترة طويله مايدق علينا عشان يطمن وهو عارف اني لحالي وبناتي صغار حتى اهلي مايزورهم الا بالمناسبات او كل ثلاث شهور او اكثر مع انه قبل ماكان كذا قبل كان احسن شوي بس هالسنه متغير
ادري بتقولون اطلعي لجاراتك واهلك لصديقاتك ووسعي صدرك
المشكله اني مااحب كثرة اجتماعات الحريم على غير سنع حش بخلق الله ومخصصه يوم الاربعاء لاهلي والخميس اهله وصديقاتي كل وحده منشغله بحياتها وانتم تعرفون وقت الدوام ماحد فاضيلي
واللي قاهرني موقف صار امس
(طالع من الدوام بدري ورايح للاستراحه مع اني اصحى الساعه 7 ماجى عندي نفطر انا وياه ونسولف او نتقهوى مع بعض لان جلسته بالبيت قليله مستكثر ساعه زياده يجلس معي)
واذا صارحته وقلت اللي بخاطري بهدؤ حط الملامه علي وزعل وطلع ويقولي انتي تسببين مشاكل
مع اني صابره على تدخينه اللي مادريت عنه الا بعد ماحملت
وقلة احترام اهله لي والتنغيز بالكلام كل ماروح عندهم
وكثرة طلعاته وروحاته ومشاويره اللي مالها داعي
والماده التعبانه
حتى اسولوب التهديد اخذته والعتب والزعل بس مافيه فايده
واحيانا افكر اقول مالي الا الصبر لو عشان بناتي
واطنش واعيش حياتي واهم شيء الصحه والعافيه نار زوجي ولاجنة اهلي وكلام الناس
ومالي الا الدعاء له بالهدايه
واقول بنفسي امسك مجنونك لا يجي اجن منه
واحيانا اقول بدخل ابوي بيننا عشان يحل هالمشكله
واحيانا اقول ايش سبب هروبه من البيت
و يوم سالته مافيه سبب ومو مقصره بشي
ابي منكم الحل منكم وكل وحدة تعطيني رايها بدون تجريح:)