فتحت الشنطه ويا ليتني ما فتحتها!!

السلام عليكم
حابه اكتب لكم موقف صار معاي وضيق صدري مش لانه الموقف السبب لا بس لانه تراكم الكم الهائل من المواقف الى ما لقيت لها حل والطرف الاخر رافض حتى الكلام فيها
بنات انا مخنوقه من جد اليوم فتحت شنطة في سيارة زوجي وانا كان قصدي انظف السياره
لانه زوجي مش من النوع الى يهتم في هالامور عادي تاخذ السياره سنه ما تنغسل!!
المهم نزلت كل شي فيها وقلت للخدامه تساعدني في التنظيف والكنس وانا لاهيه شافتني ام زوجي انزل الشنطه الى كانت تحت الكرسي الخلف ولا بنتبه عليعا الا لما قالت لي الخدامه نرفع الكرسي لانه تحته في وسخ
ولقيتها ونزلتها من ضمن الاغراض الا ام زوجي تقول الا هالشنطه لا تفتحينها فيها اسرار
وقلت انا تمزح اول بحكم انه زوجي يكدس في الاغراض لين تفيض ونطر نجردها
فتحت الشنطه ولقيت شي صدمني وكان اخو زوجي الصغير جالس جمبي وسالني شو فيها هالشنطه قلت له اوراق وانا على بالي والله اوراق
الا اتفاجا انه فيها صور بنات ورسايل وفواتير تلفون بأسمه توصل الالفين وخمسميه درهم
المهم ............ماكنت اريد اخو زوجي يشوف الي شفته وسويت انه الموضوع عادي
وبندت الشنطه ورجعت انظف
وانا احس والله يا بنات كأنه حد اخذ مااااء بارد وكبه على راسي من الصدمه
ليه زوجي محتفظ بالصور لين اليوم؟؟؟؟؟؟؟؟؟؟؟؟؟؟
والمشكله انه البنت الى مليانه الشطه صورها ورسايله ومواعيد بعد كانت زميله لي بالجامعه
اعرفها واعرف كل شي تقريبا عنها بس ما يربطني شي قوي فيها بس بعد انصدمت فيها


شو الموقف الى اتخذه اتجاه زوجي لانه رجع من الدوام ولقاني فاتحه باب سيارته وسالني شسوي قلت له انظفها وانا بقولكم شو سويت طبعا اخذت كل صور البنات ودسيتهم ورميت الرسايل والفواتير بعد ما شقيتهم بالزباله والى صار انه كانت عينه على الشنطه الى طلعت من تحت الكرسي وقلت له كل اوراقك المهمه فيها


بنات ماسألني شي ثاني بس اتغير اسلوبه معاي
وكان يكلمني وكأنه ينتظر مني قنبله تنفجر على راسه
انا بالعكس اظهرت له عكس الى كان فيه لبست وكشخت وقلت له نبي ناخذ اغراض من السوق للبيبي الجديد
طلعنا ولا تذمر ولا قال اى شي

اجذب عليكم لو ما قلت اني احتقرته واحتقرت نفسي لاني متحملتنه طول هالفتره الى مرت
كان يواعدها وحاطين اسامي الاماكن والقت بالليل اغلبه والمواعيد واحد كان بنفس يوم زواجنا؟
وفي يوم ميلادة؟؟؟
بس المشكله انه كل هالسوالف قبل زواجنا بثلاث سنين
بس ليش ما رماهم ليش محتفظ فيه لين اليوم


لما اقوله انا مخنوقه ابي اطلع معاك اريد اغير جو ما يطلعنا الا اذا كنا نريد نروح السوق للضرورة والله انذل بالروحه من الكلام السم الى اسمعه وغير جذيه اخذ كل اعيالي معاي يعني اجذب عليكم لو صرت اخذ شي بتفكير كل شي اسويه بسرعه بسرعه عشان ولدي يبكي او يبي يرضع او اى شي
هو لما يروح ويطلع ما حد يغثه يشتري الي يريده بتفكير وتامل بعد
ويومين اجازة الاسبوع عند الشباب...........................
وانا يوم واحد بالاسبوع عند اهلي
كم قلت ما عليه صبري الا ما يتغير بس احس اني اكل بنفسي والا هو ما اضن يتغير
لا تضايقون من انا حبيت افضفض لكم في هالليل بعد ما تركني وراح ينام والعيال في امان الله نايمين