وسعي صدرك وانسي الهموم مردها مع الوقت بتزولـ ^^

سلآم عليكم ..اليوم انآ حبيت اطرح فكره حلوه
وهي ملف يحتوي علئ مواقف مضحكه او محرجه
حصلت لك
سواء مع زوجك او اهلك او صديقاتك ..الخ ..

نونس بعضنا وننبسط ...

مثآل من المواقف المضحكه :

---------------------------------------------------------------------------------------------------
هذا سلمكن الله كنت معزومه عند اهل زوجي بملكة بنتهم ومن العصر وانا اعر شوشتي بالاستشوار والفلفه واحط ماسك بخشتي واطلع تيوري واطقمله اكسسوارت وخرابيط(الله يكفينا الشر)
المهم جا عقب المغرب واتصلت خالتي وقالتلي وينك يابنيتي تعالي تقهوي معنا؟ وبسرعه اكمل لبسي والط من المكياج كني من ذولاك ......دخل زوجي وقال اقري وردك شكلك روعه....المهم وررررررررررررر ركض لهم (بيتهم جنبي) وكنت لابسه كعب عالي اصبع كن احد معيرني يالقزمه...وادخل عليهم اول الكسحه انهم لابسين لبس عادي وانا كني العروس بصراحه فشله سلمت على حمواتي ودخلت على عمي وخالتي بغرفة الجلوس وعندهم بنات بنتهم مالهم شهر متزوجات وعند المدخل حاطين الدعاسه المكرونه ونشب اصبع الكعب على اول دخلتي واميل ذيك الميله المصريه (ايوه ياقميل ميل كمان وكمان) وميله يمين وميله شمال وكلهم بسم الله عليك بسم الله عليك....حتى عمي اللي مايشوف طارت اعيونه من استعراضي....وبسرعه جلست وطلعت الكعب وانا اقول عادي ياعمري ماصار شي مايدرون اني زغلت على روحي.....ومن الخبه سلمت على البنات وجلست نسيت اسلم على عمي وخالتي.....واقوم مره ثانيه وانا اقول ياخزياه ماسلمت عليكم واقوم::وإنا لله وإنا إليه واكملهم باقي الميله بس هالمره (ايوه ياقميل شويه اودام وشويه ورا) وامسك الجدار واتعدل وقلتلهم من الفشيله وماأدري كيف طلعت(فيني فقر دم ) وخالتي تمسكني وتجلسني وتقول لبناتها خلو الطباخه تسوي عصير كيوي وتجيبه مرة محمد داخت...وكلهم سلامات اسم الله عليك ونادو زوجي وهو يسألني يقول قريتي وردك؟!مايدري من العجله رحت اركض علشان القهوه حتى جوالي ناسيته بالبيت....ومن الفشيله اقول دوخه من فقر الدم(ياملا القطع ياهالحريم


-------------------------------------------------------------------------------------------------------------------------------

مره من المرات وانا عروس
قاعده العصر في امان الله قدام التلفزيون ومستانسه مع اني لحالي
دق التلفون ورديت وهات يترحيب لان اذني التقطت صوت ابو رجلي
قررت اصير سنعه الله لا يعيد الشر
.
.
هلا والله
يالله حيه
وش اخبارك
وخالتي والبنات
وما خليت كلمه ترحيبيه ما قلتها ولا مجلس امهات
والرجال ببرود .. الحمدلله
بعدين قال انا ابو فلان....!i!
وين اخوي <<<اخو رجلي مب ابوه
انصقعت وانطرمت سبحاااااان الله نفس صوته
طاح التلفون من يدي من الفجعه ورحت اقوم ابونا

انا اللي اركب معه كل يوم للدوام مع مرته ولا يسمع صوتي
ما اسلم من الحيا حتى بعيد الفطر ما عايدته
كلن يقول لي عيب سلمي اذا ركبتي وصرتي مبطيه واقول لا استحي
آخرتها كذا
استحيت على وجهي و بعدها سلمت وعايدته عيد الاضحى
وكانت اول وآخر مره يسمع صوتي
لانه شكله من الروعه معد دق على البيت ابد
اذا بغى اخوه على الجوال<كان من زمان يالاخ
بس اللي ريحني انه كثير قبلي وبعدي صارت لهم مواقف معه علشان صوته زي ابوه
هانت علي شوي


------------------------------------------------------------------------------------------------------------------

ههههههههههههههههههههه
كل موقف اخس من الثااني احرااج

انا الله يسلمكم اعرف وحده حصلهااا ها الموقف
طبعا بقلكم موقفهاا بلسانها هي
تقوول ((انا اسكن في بيت اهل زوجي
وماكان احد في البيييت ومتاكده ان مافي احد كنت نازله من غرفتي للدور اللي اسفل لاني كنت ابغى المطبخ وانا لابسه تنوره قصيره وبلوزه قصيره تبيين السره ولابسه كعب
لما نزلت ووصلت اخر الدرج الا اسمع صووت خطوات واحد وصوته اخوو زوجي وتجيني هذيك الرجفه وخوووووووووف ولا عرفت فين اروح الا اشووف ذاك الباااب واركض واركض واني انخش وراااه وسمع اخو زوجي الركض لان البيت سراميك
واشووي اسمع خطوووات اخو زوجي ركض متجهه علي وينخش اخو زوجي معي فنفس الباااااااااااب هههههههههههه واصييييييييييح وانه يفرقز من الخرعه وادفـــــــــــه وهو مصدوووم وجرررري اطلع الدرج وشكله شااااااااف كل شي ))
خخخخخخ فشله


----------------------------------------------------------------------------------------------


يازينكم ويازين مواقفكم

منذو مبطي الله لايعود الشر كنت توني راجعه مع امي من بيت ناس رحنا نوجبهم

المهم توني جايه اتمشى وانا بكامل اناقتي ولاني مخليه لون مو لاطخته بخشتي

وكاشخه ومتزينه بهالبدله الحمراا والكعب يعنني اغراء ..

وامر يم المجلس خابره زوجي قاعد فيه لحاله قبل لااروح ولمحته من بعيد

واطالعه من زين النظر عاد وااشر له واتميع واتبوسم واتدلع ومدري وش خبصت من حركات

على بالي هيفاء وهبي انا ووجهي واختمها بغمزه فولاذيه واصعد لغرفتي

وانتظر ابو الشباب يجي اكيد عقب هالدلع اللي مدري وش يبي راح يجي ركضضضضضضضضضض!

وانتظر !!

وانتظر !!

وانتظر ..عسى ماشر وش فيه طووووووووووول ؟؟

وامد البوز واغير ملابسي واقعد على الكمبيوتر ومدري بعد كم ساعه والا يجي فوق ويشوفني

ويقول هاااااااااااا ؟ متى جيتي ؟؟ وليه ماقلتيلي انك وصلتي؟؟؟

قلت هااااااااااا ؟ متى جيت ؟؟ وليه ماكنت بالمجلس انت ؟؟؟

قال الا ومعي ولد اختي!.........من قال ولد اختي وانا تقل احد صافقني كف

واساله ..وولد اختك ووين جالس ؟؟؟؟؟؟

جالس عند الباب ليييييييه تسالين ؟

والله واصيح هااااااااااااااااااااااااااااا ااااااااااااا؟ لا ولا شي

والله يابنات من يومها كل مايجينا اتحاشاه واتذكر الموقف ولو يسلم بحسن نيه اقول بقلبي ياربي وش

قل عني وقتها اكيد قال مرت خالي انهبلت !واكيد كل مايشوفني يتذكر خبالي

---------------------------------------------------------------------------------------------------------------------------------------------

ااه لاتذكروني بالطيحات
انا مره كنا بالاستراحه انا واهل زوجي وعمانه المهم دخلو الرجال بيسلمون على خالتي ام زوجي عم زوجي وعيال عمه واخوان زوجي وطبعا زوجي معهم قام هالملقوف قال لي جيبي القهوه المجلس مليان بنات اخته صغار وخواته فيه ماقال لهم وانا بشرشفي متغطيه هو لو قال لي بصوت واطي كان قلت معصي بس قال بصوت عالي وطبعا فيه حريم اخوانه وامه وبنات عمه خبركم عاد الجزمه شبر لزوم التكشخ للحموله والشرشف يسحب على الارض كبيييير مره من شراشف الصلاه يوم دخلت عليهم بالصينيه توني داخله من باب اخيمه الا ينشب الكعب في الحديده الي عند الباب صرت كاني برج من ابراج 11 سمبتمبر اهز يمين وشمال ابي اثبت ماطيح وكلهم ا نتبهي انتبهي يعني الكل صارت انظاره علي اخر شي طرطططططططططططططططططططططططططططط طططططططططططخخخخخخخخخخخخخ على الارض الترامس كل ترمس بجهه والفناجيل انتثرت بينهم كل واحد في جهه والشرشف التف علي وانا متمدده تحت رجولهم كاني بسم الله علي جنازه وهم يقولون بسم الله عليك بسم الله عليك وانا اقول في نفسي جعلكم السم خخخخخخخخخخ بغيت احط نفسي مغمى علي من الفشيله ماعاد قمت من طيحتي ومن زود النصب شكل رجلي انكسرت تعورني من الروعه

يوم رفعت راسي كلهم حريما ورجالا واقفين فوق راسي الا زوجي العزيز حاط يده فوق راسه من الروعه



---------------------------------------------------------------------------------------------------------------------

اعطيكم موقف لزوجي ....راح محل جزم يبي يشتري وانا انتظره انا واخواتي بالسياره والمحل مررررره كشخه ونظيييييييييف من نظااااف المحل زوجي مااااااشي بامان الله وعلى باله الباب مفتوح وهو ماشالله عليه مسرع كعااادته
هههههههههههههههههههههههههههههه هه
وطرررررررررررررررررررررررررررر رع بالباب القزاز النظيف

هههههههههههههههههههههههه
مو منه من نظافة ولمعة الباب
والله زوجي المسكين طاااار
اما اخواااااتي خلااااص راحو فيها من الضحك على طول وديناهم عالبيت خفت على سيارة زوجي لا تصير دورة ميااااااه
طبعا من فشلته رجع عالسياره على طول وصاااار براسه انتفاخ مثل افلام كرتوووووووون
ههههههههههه

-----------------------------------------------------------------------------------------------------------

هذا انا ساكنه فوق عند حمولتي
نزلت ذاك عندهم العصر <<<<<<<<<<<<<<<<..ياليتني تدربيت بدرجهم وتكسرت ولا نزلت
المهم دخلت المطبخ كانت شغالتهم رايحه واذكر حماتي تبي تجيب شغاله
دخلت المطبخ سلمت الا فيه حماتي وفيه وحده معطيتني ظهرها على المجلى
قلت ماشاء الله جت شغالتك<<<ياليتني منطمه
قالت لا..ليه وينه قلت اجل هذي وشي وااشر على اللي واقفه
قالت هذي امي .............
اثاريه خالتي
دوريني من الفشيله ماتلقيني شلت ولدي ورقيت علىالدرج اركض.. ياليتني متكرفسه قبل انزل






هههههههههههههههههه
من جد مت ضحك
اممممممممممم اخر موقف صار لي
جا عندنا صاحب زوجي ومعه زوجته وكانوا بيتعشون عندنا
المهم ضبطت عشا الرجا ودخلوا الرجال يتعشون
وحطيت سفرتنا انا والحرمة وكان ولدي الله يهديه ناشب في حلقي ومتضايقة منه حيل انا انزل بهالصحون وهو ماغير يجرجر بتنورتي
المهم جيت اقلط الحرمة عاد تخيلوا موقفي وقمت اطالع بها بعيون تروع وقلتلها اكلي ولا ترى والله لاضربك احسبها ولدي لا تسالوني شلون قلتها
الحرمة ارتاعت وراح وجهها صفر وبانت عليه ملامح والله ماتتفسر وانا وجهي راح علبة الوان وبعدها تصيبني ضحكة مب صاحية ومن بعدها صرنا كانا خوات


هههههههههههههههههههههههههههه هههههههههههههههههههههههههههه طيب خودو موقفي هدا ياطويلات العمر صار لي وانا عند حمولتي كنت توي طالعه من النفاس وبكريه وماعندي ماعند جدتي يعني بالعربي مااعرف للبزران وانا عندهم كااااااااااشخه ومابي شي يطرن من الكشخه مير تجي بنتي وتقول واء واء بصوت خفيف وانا اجيك طااااااايره بين السما والارض مسويه ام حنونه وايقالي افهم بنتي قلت ايه ايه جوعانه وكدا بحركات خطافيه وحماس اطلع من الشنطه الحليب والماء الحااااااااااار واسويهم في دقيقتين تقولون دعاية اندومي موب حليب وابو زوجي يقول لا يابنيتي ماهيب جوعانه شكلها محتره شيلي ملابسها وانا مانيب لمه مندمجه مع الحليب وواخض بكل طاقتي اونا اررررررررررررششششششششق الحليب على وجه ام زوجي اثري من الحماس والطفاقه ما سكرت الرضاعه يعني الحلمه والغطا باالشنطه المهم ام زوجي قعدت تقول اااااه ياربيييييييه حااااااار وانا منكمشه بمكاني من الخوف قالو وشدعوه حليب بزر موب صاير حار اكيد دافي وهي تقول انشويت جيبولي ثلج عاد انا تدكرت اني ماخففته بمويه بارد يعني مويه مغللللللللليه بس قلت اشوى انها هي اللي رضعته ههههههههههههههههههه مب بنيتي اسم الله عليه كان راحت بسبت طفاقتي


----------------------------------------------------------------------------------------------------------

فيه موقف سمعته وحبيت اذكره هنـــــا
فيه وحده ليلة دخلتها جتها (دلال الشهري) يعني الدوره خوياتي الله يذكرهن بالخير كانن يسمنها كذا عشان ما احد يفهم عليهن المهم
راحت لابو الشباب وهي مستحيه يحليلها ماأخذت احتياط معها والمسكينه ماتدري وش تسوي قالتله بصوت واطي ابي (كوتكس) هذه نوع من الفوط (يازين الشرح اقول اسكتي ) ابو الشباب كنه ماصدق ويجيك ماشي طيران سرعته160 (كثري منها) المهم والمسكينه انواع التفشل والله رحمتها (يقال انك رحيمه) وشوي وعريس الغفله جاي وهو شاق الحلق يقال اني نفذت طلبك بدون نقاش وهويمد لها الكيس وش تتوقعون!؟؟؟؟؟





















الحبيب جايب علبة بسكوت تــــــــــــــــوكـــــــــــ ـــــــــــــــــس كامله يعنني كريم سبلى
والمسكينه تقوم وتاخذلها وحده وتاكلها عشان لاتحسسه بمدى غبائه وعاد الله يخلي المناديل قامت بالواجب




----------------------------------------------------------------------------------
هههههههههههههههههههههه


وجعل السعادة ماتفارق قلوبكم قولوا اااااااااااااااااااااااامين ..:smheart:


لاتنسوني من دعواتكم لي ان ربي يكرمني بالحمل والذريه الصالحه ^^