تحكي قصتها مع سورة البقره

القصة منقولة
بسم الله الرحمن الرحيم
بنات حابه اقولكم عن فضل سورة البقره علي .. طبعا انا شفت هني عندنا بالمنتدى حملة عن قراءة سورة البقره اربعين يوم وصراحه ناسية اسم صاحبت الحمله بس الله يوفقها و يجعلها في ميزان حسناتها ..

طبعا ببدا معاكم من الاول .. بنات انا عندي اعاقه برجلي بس الاعاقه مو امبينه وايد يعني اللبس يغطيها الا اذا كنت في البيت وبملابس البيت تبين وكانت سبب لرفضي الزواج والاعاقه هذه لها علاج مضمون باذن الله.

ومن 4 سنين انا حسيت بهذه المشكله اكثر وبدت اتزيد معانتي اكثر كل ما كبرت وكل ما يتقدملي عريس وارفضه عشان هالسبب ... كانت مشكلتي انه ما اقدر احصل على فلوس العمليه ومن 4 سنين وانا ادعي وانذر وماخليت بنك وما خليت شركة تعطي قروض الا ما رحت عندها وكانت كل الابواب مسكره بوجهي .. واستغقر الله العظيم يا رب اغفرلي وصلت لمرحلة نفسيه وايد صعبه لدرجة استغفر الله العظيم وصلت لمرحلة الكفر يعني اقول كلام ما ينقال ووصلت لمرحلة اليأس شكلي تغير يلي يشوفني قبل 4 سنين ويشوفني الحين يقول مرت 40 سنه مو 4 سنين وتركت كل ارفيجاتي ما قمت اطلع ولا اروح المهم من يوم 12-2-2011 بدأت اقرا سورة البقره كل يوم اخلصها كامله بقعده وحدة وصراحه كنت اقراها هم عشان نفس السبب انه الله يرزقني بفلوس العملية وخاصه انه كان عندي اخر امل ان ممكن احصل على الفلوس .. مر اول اسبوع وهم الامور تعرقلت وتبخر الامل الوحيد ورديت لليأس مره ثانيه وقلت خلاص مابي اكمل سورة البقره وبوقف ... بس بعدين قلت لا حرام بقراها مو عشان الله يحققلي طلبي قلت بقراها لوجه الله .. بعدها بجم يوم يا بنات فجأة امي تقولي بيتها يلي صارلها سنين عارضته للبيع وما احد اشتراه انه انباع وطبعا انباع البيت بفضل الله وامي عطتني فلوس عمليتي ورحت حددت موعد ليوم عمليتي يوم الاحد الجاي وان شاء الله بمشيئة الرحمن تتم علي بالصحه والعافية هذه قصتي مع سورة البقره مع العلم اليوم يكون اليوم الاربعين لقرائتي لسورة البقرة ... بنات مابي منكم الا الدعاء
منقول
بنات سبحان الله سورة البقرة لها فضل عظيم







بقولكم جم شغله تشجعكم اكثر على قراءة سورة البقره :

1- القرآن كله معجزه .. وسبحان الله فيه شفاء من كل داء .. فتخيلوا سورة البقره اللي الرسول عليه الصلاة والسلام وصى عليها و ذكر افضالها ..

2- بهالزمن زادوا الناس اللي مايخافون ربهم و انتشر السحر بشكل كبييييير فوق ما تتصورون خصوصا بالكويت و بين الحريم بالذات .. و زادت الاحقاد و الحسد .. و السحور والسوالف هذي كلها تيب النياسه للبيت و اعوذو بالله الجن و المس و الخرابيط هذي كلها .. ممكن ناس وايد عليهم عين او حسد بس مايدرون او حتى مسحورين بعيد الشر عنكم جميعا بس ما يدرون .. سورة البقره بتخليكم تحافظون على نفسكم و اي شي من حسد و عين و سحر و مس و جن الله راح يبطله و يبعده عنكم ان شاء الله .. و هالشي معروووووف.. يعني مو بس اللي فيها تتداوه بسورة البقره .. لأحتى اللي تبي تحمي نفسها من اي شر تقرا سورة البقره ما يقدرون عليها لا السحره الله يدمرهم و يرد اسحارهم عليهم .. و لا الحساد واعوذو بالله من الناس اللي ماتذكر الله .. ولا تنسون انها السورة التي لا يقدر عليها البطله السحره ..

3- اذا الانسان فيه ضيقه و مو مرتاح في حياته و نفسيته تعبانه اقرب شي يلجأ الى الله .. بالدعاء و الصلاة و قيام الليل .. والقرآن .. فمابالكم انه الانسان كل يوم يداوي نفسه بقراءة سورة البقره اللي معروفه انها تهدي النفس و تطمن الانسان و تريح قلبه ..


4- الله سبحانه و تعالى يحب العبد اللي يتقربله بعبادات يجتهد فيها غير العبادات المفروضه .. فقراءة سورة البقره تعتبر عباده .. و اهيا سورة طويله و كل وحده فينا حابه انها تقراها عشان تتقرب الى الله اكثر + يبعد عنها كل شر و مكروه باذن الله + تصون نفسها من داء العصر الهم والحزن و السحر و الحسد و العين و المس و الجن و الامراض النفسيه اللي ما لها علاج الا بالقرآن الكريم و اخلاص النيه لله و الدعاء له ..


5- تقدرون تقرونها في اي وقت من بعد صلاة الفير لي صلاة الفير الثانيه .. لانه يومنا ينتهي ونبدي في يوم يديد بعد صلاة الفير.. يعني فرضا صليتي الفير و نمتي.. صار الصبح رحتي الدوام رديتي تغديتي صليتي و بعدها اي وقت تقدرين تقرينها من اول ما تقومين ليييييين يأذن الفير مره ثانيه .. انا دايما اقراها قبل لا انام .. و ساعات لما اكون تعبانه وادري راح انام امبجر اقراها بعد صلاة العشا او اي وقت احس انه قاعده ماعندي شي لانه الواحد مايدري شنو شغل بيطلعله طول اليوم .. او تصير ظروف تخليني اطلع او شي.. فأي وقت فاضيه اقراها عشان ارتاح انه سويت اللي علي اليوم ..


بنات بعد كل اللي قلته معقوله في وحده راح تأجل قراءة سورة البقره لي باكر ؟؟؟؟؟؟؟؟


حتى اللي تكرومون عليها الدوره .. تقرا من الموبايل .. انا حاطه عندي البرنامج عشان اقرا من الموبايل وقت اللي ماقدر المس المصحف .. والله العمليه سهله انتوا بس خل عندكم نيه في انكم تبدون والله بيوفقكم


اللي تقول عندها امتحان و اللي تقول عندها دراسه و اللي تقول عندي دوام واللي واللي واللي واللي

بسألكم سؤال واحد بس..



اليوم في 24 ساعه .. بهال 24 ساعه كلها تدرسين و تاكلين وتنامين وتصلين فروضج بس؟؟

ماعندج وقت لو ساعة زمن تروحين جمعيه مثلا ولا تيبينلج شغله .. او تريحين وتشوفين تلفزيون متابعه برنامج ولا حلقه .. ولا ماعندج وقت تتسبحين فيه .. او تكلمين رفيجتج بالتلفون .. او تضيعين وقتج في قراية مجله او تسوين اي شي بوقت راحتج؟


بنات والله انه ساعه وحده ماراح تاخذ من وقتج .. و ترا بدايتها ساعه بعدين بتخلصينها بأقل من ساعه مع القرايه العاديه لانه بتكونين مع الوقت اجتزتي الصعوبه في الكلمات و تكونين مع المداومه عليها حفظتي ايات وايد .. خصوصا انه ماره علينا ايات وايد حافظينها من قبل من المدارس و غيرها ..


يالله بنات مانبي اعذار و الله بيعوضكم بالوقت اللي هديتوا في دراستكم ساعه وحده بس و قريتوا فيها سورة البقره .. ان شاء الله بتلاحظون عالشي في امتحاناتكم ..

واللي عندها اي اشغال ثانيه بتلاحظ ان الله بيوفقها في حياتها و عيالها و كل شي


صدقوني ماتحس في هالشي الا اللي تجربها .. يمكن وايد بنات مجربينها بس مايقولون لانه يخافون من العين وانه احد يحسدهم ومايقدرون يواضبون عليها ..

و الله اقولها لكم و عن تجربه اني اقراها كل يوم الحمد لله و ادري انكم بتذكرون الله وماراح تحسدوني..
و اهيا تحفظ من اي حسد .. و دام اني واثقه من ربي و ادري نيتي اني ابي اساعدكم لانكم خواتي و احبلكم الخير .. ادري انه هالشي بيكون له مردود حلو بحياتي من رب العالمين ..

والله يشهد على كلامي انه كل كلمه قلتها صادقه فيها و عن تجربه ..

و الله ابيلكم الخير و ابي دعاءكم ومابي شي غير التوفيق من الله و دعاءكم لي بظهر الغيب ..


والله يوفقكم و يسهل عليكم البدايه هذي و ان شاء الله بنتعاون كلنا



منقول للفائده


دعواتكم في ظهر الغيب ان الله يشفيني ويعوضني خير عاجلا غير اجل