السمنة وأنا وعمر مرق بالتجارب... والخلاصة

يسعد اوقاتكم جميعا...
اول شي خليني اخبركم انه اول مرة بكتب موضوع بمنتدى,, شدني هالمنتدى من شي سنة تقريبا واستمريت بالقراءة بين فترة وفترة واكتشفت انه نحنا السمينات دائما افكارنا وحدة ومتشابهة, وتفكيرنا واحد وطريقة تصرفنا وحدة وطبعا النتيجة وحدة ... سنين من المحاولات بدون نتيجة نهائية تذكر,,, ولما اكون ظالمة خليني انهي الجملة بعبارة " الا من رحم ربي"

ما بقدر انكر انه في خلال قرائتي لمعاناة السمينات الي بتشبه معاناتي بيمرق موضوع بتكون خلاصته: الحقوني يا بنات حياتي عذاب بدي أسمن الي بتعرف اي طريقة او عشبة تدلني وربنا يوفقها...
وهون انا بنخرط في موجة ضحك بتستمر احيانا عشر دقائق!!!
وبقول في نفسي يا ريتني كنت نحيفة ومعصقلة وعظامي باينة وما كنت دبدوبة وحالتي حالة..... بالنهاية ما حدا فينا راضي والانسان بطبعه بحاول يدور على الكمال بكل شي واهم شي بالشكل..

السعيد هو من تعلم من خطأ غيره والشقي هو من تعلم من خطأه,, طيب الي ما بيتعلم لا من خطأه ولا من خطأ غيره شو بكون؟؟؟
اغلبنا هيك جربنا هالطرق مليون مرة وكل مرة النتيجة وحدة ومعروفة ومع ذلك بنرجع نجربها مرة اخرى ومستنين تطلع نتيجة مختلفة!!!

من بعد خبرة سنين طويلة في محاولة انقاص وزني ومن بعد مشاهداتي المختلفة وكلامي مع الناس اكتشفت شي مهم, القصة مش تنظيم اكل ورياضة وبس, القصة باختصار بدك تنحف غير طريقة تفكيرك, بدك تنحف غير نظرتك للأكل واعرف شو الغاية من الطعام, بدك تنحف غير نظرتك للرياضة والراحة.

معادلة بثلاث اجزاء لو قدرنا انه نلم بهالاجزاء اعتبروا عملية خسارة الوزن مجرد تحصيل حاصل خلال احداث الحياة اليومية, بدون ما نفكر فيها بزيادة ونعطيها اهتمام اكبر ونوقف حياتنا عليها بانتظار انه ننحف وبعدها نرجع لحياتنا!!!

ضروري كمان نتخلص من ثقافة الارقام والبرامج الجاهزة, يعني الجمل المعهودة: عندي دايت جربته بنت عم ام جدتي, كم بنحف؟ 5 كيلو بالاسبوع!! لا قليل انا بدي شي اكثر.... انا مستعدة اعمل دايت شهور بس ما حدا يقلي العبي رياضة!!! هالرياضة بتطلع عضل؟؟؟ لا بيخرب جسمي,, كم سعر في بهالاكلة؟؟ كم ساعة لازم امشي لاحرق 200 سعر؟؟ طيب المعلقة كم غرام؟؟؟

بتعرفوا هالأشياء المذكورة في الفقرة اعلاه مهمة وضروري نلم فيها بخلال رحلة خسارة الوزن, مشكلتنا انه نسينا الرحلة وركزنا على الهوامش والارقام!!!

دايت جاهز نفع حدا غيرك مش بالضرورة ينفعك>>> هالشغلة لازم نحفظها متل ما نحنا حافظين اسامينا!!!
كم كيلو بنزل؟؟ هالسؤال انسوه ولا عاد تفكروا فيه, عملية خسارة الوزن مش عملية سهلة ولا عملية بسيطة, في كتير عوامل بتتحكم فيها وبتأثر على نسبة الخسارة الي اصلا مش ثابتة عند كل البشر, بتتأثر بالعمر والوزن والجنس ونوع النظام والهرمونات والنشاط الرياضي وكمية العضل الموجودة بالجسم واحتباس السوائل والعادة الشهرية عند النساء وغيرها كتير من العوامل!!!

بما انه احنا اغلبنا بهمنا الشكل الحلو ليش مصرين على رقم الميزان طيب في بنات بتلاقي شكلهم بياخد العقل وكسماتهم بجننوا ولما تساليهم عن الوزن بتكتشفي ولا هو بالسبعينيات وفي بنات بكون عندها كرش مخرب منظرها ووزنها بالخمسينيات,,, الارقام مجرد ارقام ياريت نتخلص من الارقام وعقدة الارقام والتفكير بالارقام ونركز على الاهم.

القياسات هي المهمة, صحيح الوزن مهم لكن انا بفضل القياسات, وياريت كل وحدة فينا قبل ما تبلش تاخد قياساتها وتاخد وزنها وتسجلهم بدفتر وتشوف شو ممكن يتغير باسبوع واسبوعين, في اسابيع ما قبل العادة الشهرية رح تلاحظ انه الوزن ثابت لكن القياس تغير وهالشي رح يوفر الحافز بنفس الوقت الي لو كنا مركزين على الميزان كان عمللنا احباط!!!

شغلة اخرى لازم نركز عليها وهي الثقافة, زمان كان هالشي صعب لكن حاليا النت ما خلى حدا عنده حجة, بحث بسيط على جوجل وفيكي تعرفي المجموعات الغذائية ونسبة احتياجك منها يوميا وباي اطعمة بتتوفر وكم جسمك بيستهلك سعرات وكم سعرة بده ليبلش ينحف وبشوية تخطيط وشوية ممارسة بتعملي احلى برنامج دايت بيلبق بس على جسمك وعلى ظرفك وعلى احتياجاتك وعلى المتوفر ببيتك وعلى ووقتك وعلى ميزانيتك!!!
بصير عندك خبرة بالكميات المحددة بدون ما تضطري تلجأي لحساب الغرامات المزعج ومقارنتها بالسعرات, باختصار بتعيشي حياتك طبيعي متل البشر ما بتكون عاملة حالة طواريء بالعيلة لانه بس انت عاملة دايت!!!

الرياضة لو فكرتي فيها كواجب لتخسري وزن رح تكون عبء ثقيل, بس شوية تثقيف عن الرياضة وعن المشي وعن تمارين العضلات مع الممارسة التدريجية وملاحظة التغييرات وخلق الظرف الي يخليكي مبسوطة بمشروع الرياضة مش بس بتأديها لتخلصي منها, رح تصير عادة ورح تحبيها اكتر ورح تعرفي متى تزيدي التمرين ومتى تنقصي وشو التمرين الي فادك اكتير وشو هالمنطقة من الجسم بينفعها تمارين ورح تصيري تعطي نصائح للكل بناء على خبرتك وتجربتك الخاصة.

** ملاحظة : اغلب قصص النجاح الي قرأتها لاشخاص اجانب بنهايتها وبعد ما غيروا حياتهم تحولوا اغلبهم لمدربين رياضة وكله بس من ورا التثقيف والممارسة المستمرة.

امور أخرى مرقت فيها بحياتي ومرقوا فيها ناس بيشبهوني, وقرأت تجارب ناس كتيرة منها الناجحة ومنها الي بتستنى النجاح ومنهم الي اصابه اليأس ووقف عن المحاولة, خلتني اكون فكرة واضحة عن المطلوب مني....

انا باختصار بنت بعدني سمينة كنت بلشت السنة الماضية مشروع خسارة وزن وخسرت وزن وفكرت انه وصلت للطريق الصح, لكن بعد شهرين ونص انشغلت بامور الحياة ورجعت تركت كل شي تعبت عليه ورجعت كسبت الوزن!! حاليا رح افكر بطريقة اخرى مع الاستفادة من بعض الامور الي مرقت فيها بتجربتي....

لي عودة وكلام اخر عن امور اخرى متل الحافز ومتل الارادة وهي اصعب شي بالالتزام... اعتبروها فضفضة او خلاصة تجاربي

ان شالله تستفيدوا منها وبتمنى الي عنده سؤال ما يتردد ابدا