ظلمت الشغالة وضميري يانبني

صباح الخير على الجميع
عجبني تفاعلكم مع بعضكم
وحب مساعدة الاخرين لو بدعاء


بنات مشكلتي متعبتني ومضيقه صدري
مشكلتي اني ظلمت شغالة خالتي اااه ماعمري ظلمت احد ولا احب اتهم احد


قبل سنتين ثلاثه
كان مع بنتي ايبود
وعمر بنتي سنتين ونص تلعب فيه ونحط لها مقاطع اناشيد واطفال وتلعب بالالعاب زي قصقص الشعر والمناكير
ونحط لها برامج تعلمها الحروف والارقام


تاخذه معها كل ماراحت لاهل ابوها
بنتي كانت اول طفل عندهم ماعندهم اطفال وزوجي اول واحد يتزوج فياخذها برمضان يوميا العصر ويحطها عند امه واخته تفرح فيها خالتي عصريه
مافيه بالبيت الا خالتي واخت زوجي والشغاله واثنين من اخوانه رجال اصغرهم اخت زوجي بالثلاثين عمرها


جت عمة بنتي وشبكت الايبود بالشاحن
جت بنتي وخذته زجلست تلعب فيه
بعد دقايق ماندري وين حطته
جلسوا يدورونه ويحوسون البيت والكنبات مالقوه للعلم بيت خالتي مافيه اثاث كنب وسراميك وتلفزيون جداري
يعني تحف وحوسه بالبيت مايحبون يعني البيت مرررريح بالتنظيف والترتيب
ولا يضيع فيه شي
بس الايبود اختفى فص ملح وذاب
وجلسوا يفتشون البيت حتى اخت زوجي تقول نظفت غرفتي عشانه وتحت السرير نظفته مالقيته
الصراحه انزعجوا عمة بنتي وخالتي اكثر مني لانها بنتهم ويحبونها وهي تقول ابي ايبودي
قالت خالتي يمكن رمته بالزباله تكرمون
قالتها الصراحه بنتي ماترمي ولا القرطاسه بالزباله كل اللعابه بالبيت متكسره مرميه بس الزباله من هي صغيره ماترمي فيها شي ابددد حتى اذا قلتلها ابعودها خوذي القرطاسه ذي ارميها بالزباله واشرلها تقول لا وترميها بالارض
الحين بنتي كبيره ولحد الحين ماتحب ترمي بالزباله الا اذا عطيتها نظره شالته


قالت خالتي مادري مابي اظلمها بس من يبي ياخذه من الغريب بالبيت غير الشغاله
قالت عمتها مادري مافيه احد غريب بالبيت غيرها انا شاكه فيها
استغفرالله العظيم انا دخل الشك فيني وجت الشغلله تحط قدامي الشاي والقهوة قالت مدام انا دور جوال بنت انتي مافيه القاء دورت حتى زباله
الصراحه زاد شكي يوم تكلمت لاني ماسالتها ولا عندي بالمجلس احد دخلت سلمت وقالت هالكلام طبعا بعد كم يوم من الضياع
قلت بقلبي ليش تجيب طاريه يمكن تبي تبعد الشك عنها استغفرالله العظيييييم
وزوجي يقول لي انا وامه واخته لاااااتظلمونها حرام قالت امه مافيه غريب بالبيت غيرها يعني انا اخذه ولا اختك ولا اخوانك اخوانك ذاك اليوم ماهم بالبيت طالعين
قال ماقلت انتم قلت يمكن بنتي راميته قالوا دورنا بالزبايل مالقينا شي
المهم اهلي يسالوني وين ايبود البنت كل عيال وبنات خواتي معهم الا بنتي وتقعد تزن
قلتلهم ضاع ببيت خالتي
قالوا عندهم شغاله هي اخذته وقاموا يزيدون وسوسه وزاد الشك والخوف
واقاربي يسالون لي اذا شافوا بنتي تناظر مع بزارينهم باجهزتهم وين جهاز بنتك نفس الشي اقولهم ضاع ببيت خالتي قالوا عندهم شغاله قلت ايه قالوا خلاص هي
وخلاص بصمممممت انها هي من الناس كل من سالني قلت ضاع مالقيناه نبشنا البيت لازم سؤالهم عندهم شغاله واذا قلت ايه قالوا هي
الناس دخلوا الشك والظلم بقلبي وعقلي اه ياربي وش انا سويت
جت الشغاله تسافر زياره لاهلها خففففففت الوسواس لاعب فيني اكثر
تدرون ليش
كل الايبود صور لبنتي ومقاطع لها خاااااايفه موت عليها لو مافيه صور لها عاطي عندي بس اللي مهبل فيني ولاعب باعصابي الصور كنت بحاله كم سنه
وتعرفون شرق اسيا سحر وكذا انا معاملتي معها سلام وابتسامه وضحك
ماعمري كشرت او امرتها تشيل شيء عند خالتي انا اشيل معها وتقولي للتشيلين قلت ميخالف اساعدك وتحبني والله اشوف وجهها ملامحها لاشافتني جت تسلم علي
بس اخاف خالتي ولا اخت زوجي معاملينها مره من المرات بسوء او جارحينها او مضايقينعا بشي مره من المرات وتصير بنتي الضحيه الشيطان لاعب فيني ياشين الوسواس حسبي الله ونعم الوكيل على النفس الامارة بالسوء


سافرت الشغاله لاهلها كم شهر
وانا الخوف لاعب فيني
للعلم مايفتشون اهل زوجي شغالاتهم يخلونها تاخذ اللي تبي كيفها
كانت معي ميه ريال ببوكي وكنت محتاجتها باغراض
لكن قال اتصدق فيها عن الشغاله
عطيتها اختي قلت الميه ذي ابيك توزعينها 10 10 10 على انواع من التبرعات والصدقات باسم الشغاله
يعني 10 كفالة يتيم
10 بناء مساجد
10 حفر بير
الخ
اسهم يكون لها بهالاعمال الخيريه وباسمها يكتب الرجال حق الاغاثه اسم الشغاله
فلانه تبرعت بسهم كفالة يتيم لانه لازم يكتبون كذا
ابيها دفع بلاء عن بنتي وصورها اللي بالايبود وللشغاله اذا انا ظالمتها
اذا الايبود بالزباله او معها ربي يجعله يخرب ولا يتصلح بسبب صدقه عن الشغاله
ورجعت الشغاله بعد ست شهور لخالتي




بعد مانسيت السالفه بعد مارت سنتين على السالفه
اخت زوجي صارت تشغل سورة البقره يوميا ببيتكم مايطفى المسجل ابد لانه تقول من بعد ماشغلناه صار البيت مريح
برمضان هذذذذذذذذذذذا
ارسلت لي اخت زوجي صورة ايبود بنتي بالواتس اب
وقالت مو مصدقه لقيته تحت سريري وانا والله اني منظفه تحته يوم يضيع وكانسته كنننننسسسس كيف جاء
انا والله خفت وشلون وهي نافضه غرفتها نفض وغرفتها سراميك ملفيه قطعة قماش بالارض وغرفتها مو اثاث ثقيل بللعكس هي تحب الغرف الناعمه والرايقه عشان سهل تلقين الشي فيه


اه كانها طعنة سكين بقلبي فرحت وضايق صدري اكثر من فرحتي
ظلممممممممممتها يارباه
تنكدت ذاك اليوم اشد من الحين قلتلها ظلمتها وارسلها يارباه ظلمتها قالت مو بس انتي كلنا ظلمناها
قلت لااااااا غير انا غير انا ماعمري ظلمت واكرهه الظلم واروح اظلم


وزوجي هزئني وزادني ذنب قال شوفي رابك مايظلم
قلتله مو انا الناس هم اللي خلاوتي اظلمها وزادو بقلبي وعقلي


قال عطيها ايبود بنتك قلت عيييييب اولا هي حرمه كبيره مو مراهقه ولا شابه هذي ولدها متزوج ووجاب بنت قبل كم يوم
اعطيها حق اطفال قال اجل وشلون تكفرين عن ذنبك قلت اشتري لها جوال ايفون او جالكسي
الصراحه ماقدر اشتري لنفسي الا بتجميع شهور
اخذت اذن من خالتي وعمتنا اني اشتري شغالتهم جوال زي الايفون والجالكسي تكفير عن ذنبي قالوا من وين لك وانتي داجه قال حافز يبي ينزلي اخر دفعه برمضان استغلها 1000 وجيبلها جوال قالوا منتب لاقيه ب1000 ايفون
الا مستعمل وانا مابي مستعمل ابي لها جديد بكرتونه
وانا انتظر حافز ينزلون لي جت عمتنا قالت تراه الشغاله تقول وديني للسوق اشتري جوال جلكسي بقيمة 300 قالت منتي لاقيه بهالقيمه
قلتلها لالالا لاتودينها انا اشتري لها ودور بالمحلات الزين
دورت ولقيت واحد ب400 شريحتين وابيض وكبير وحطيت لشاشه ستكر واقي ولبسته جراب حامي للخلفيه
وحطيته بكرتونه وعطيته عمتنا تعطيها اياه هديه
خالتي زعلت تقول تعطينها وانتي بحاجه قالت لها تكفير عن ذنبي قالت عمتنا مو بس انتي كلنا


فرحت الشغاله بالجواااال ماتوصف وصارت كل شوي تجيني علميني كيف اسوي كيف اكتب كيف اسوي
شفت الفرحه بوجهها سبحان الله




بس هالفرحه ماتقاس مع الظلم اللي ظلمتها
مستحيل كل اللي سويته يبي يطهر ذنبي قدام الله
جوال وصدقه يبي يطهر ظلم ظلمتها
هي ماتدري اني ظلمتها بقلبي وعقلي ولساني احتمال
ماراح تسامحني لو درت
مادرررري متضايقه من هالسالفه الظلم شين والله مايسامح الظالم
وش اسوي ياليتني اقدر اهديها وتصدق عنها دايم بس يزيل ذنبي عند الله
اقولها تراني ظلمتك لالالااا اخاف تحقد علي وتكرهني
تحبني هي مابي تتضايق ويعورها قلبهابسببي
وتتغير علي


ادعوالي ربي يغفر ذنبي
تراني افضفض من ضيقه الله يبعد عنا وعنكم الظلم بانواعه