الله يكون في عونك أختي

مشكلة ولدك إنك عطيتيه الفرصة إنه يتمادى مرة

المفروض لما يسوي شي خطأ (مثلاً لما كب التراب على السفرة) تمسكينه من يده وتطالعين في عينه وتقولين أنا ما أسمح لك ترمي التراب على السفرة مرة ثانية وخذيه إلى مكان ممل (مثلاً غرفة الغسيل) أو زاوية في الصالة وخليه يجلس فيها 4 دقائق
وإذا خلصت قولي له روح غسل يدك بالماء والصابون ،، ((نفس الأمر اللي أمرتيه قبل المشكلة)) إذا رفض رجعيه لزاوية العقاب مرة ثانية ولا تتهاونين معاه أبداً
لأنه إذا تعود إنه ما يسمع كلامك من الحين وش بيسوي إذا وصل سن المراهقة (لا قدر الله)

ودائماً ركزي إنه يسمع كلامك وتطالعين في عينه لما تكلمينه ولا تسمحين له يكسر كلمتك

وامزجي بين الحزم والحنان يمشي طفلك معك تمام

ومكتبة جرير مليانة من كتب التربية
ومنها:
كتاب التربية المثالية للمؤلفة إليزابيث بانتلي (هذا كتاب جداً رائع استفدت منه كثيراً)
كتاب حديث الأولاد كيف تساعد ابنك على التعبير عن مشاعره للمؤلفة ماري بولس
كتاب دليل الآباء الحائرين لإيقاف سلوكيات الطفل السيئة للمؤلفة كات كيلي
كتاب طبيب الأطفال المتنقل للمؤلفة لورا والتر ناثانسون (كتاب جميل يجمع بين التربية والصحة والسلوك منذ الولادة وحتى سن الخامسة)
كتاب كيف تفوز في مشاكل البكاء والمشادات مع طفلك .. خطة لتحقيق الهدوء داخل الأسرة للمؤلفة سنتيا ويثام (كتاب مميز جداً وجميل وعملي أعجبني كثيراً قرأته كاملاً أكثر من مرة)

هذه خلاصة الكتب التي عندي عن التربية وهي أفضل الكتب التي أملكها عندي غيرها إن أردت ولكن هذه أفضلها وهي التي استفدت منها كثيراً

أتمنى أن تخبرينا عن تقدمك في تقويم سلوك ابنك قريباً إن شاء الله

إيمان طريقتك حلوة.. وشفتها في سوبر ناني.. بس يبي لها تكرار ....
اشكرك جزيل الشكر على اسماء الكتب....

UP
باقي البنات

وين العقاب طيب ؟؟؟

الي اشوفه بس مرادد كلام بينك وبينه ؟؟

طبيعي يتمرد عليك ويحس نفسه القوي

المفروض انتي المسيطره والقويه وكلمتك تمشي
انتبهي بيكبر وبتكبر رغباته معه ولو استمريتي كذا مو لمصلحتك ولا لمصلحته
خاصة تعوده يمد يده عليك !!

العقاب ضروري من امن العقاب اساء الادب
والضرب غير المؤذي مايضره بالعكس يأدبه

ياما انضربنا ضرب خفيف ما يترك اثر بس ننقرص ونعرف ان الي سويناه خطا
وهذا حنا كبرنا والحمد لله رب العالمين ... وفي نبي من الانبا معلق السوط في بيته

الضرب غير المؤذي نضطر له في التربيه خاصة للطفل الي يفهم وش الخطا الي سواه وعارف ان هالتصرف يقهر امه ويزعجها

بس مو على كل شي ينضرب الطفل لا فيه العقاب
زي اذ ماسمع الكلام لا ورد بتصرف يقهرك يعني

قومي وبيني له انك معصبه مررره من تصرفه وزعلانه امسكي يده ودخليه غرفة مافيها العاب ولا شي ممله بس شغلي لمبتها طبعا وخليه فيها واطلعي وخليك عند الباب اول مره شوفي ردة فعله

بكى خليه يبكي قوي قلبك شوي كذا ثواني بس وافتحي الباب ودخلي عليه وسكري الباب وراك علشان مايحس فيه مجال لتسامح تو الباب مفتوح

امسكيها ووجهك بوجها وذكريه وش الخطا الي سواه ونتي مازال وجك زعلان مافيه حنيه ولا ابتسام
واطلعي وسكري الباب

واتركيه شوي وارجعي ادخلي وقولي له اخر مره ؟؟ قول اسف ياماما ولا تنسين تكونين جالسه يعني وجهك قريب من وجها

اذ تاسف بوسيه وقولي شاطر وشجعيه وطلعيه ونتي ماسكه يده وروحي لابوه وقولي خلاص فلان قال اسف خلاص مايسويها مره ثانيه

طبعا بيرجع يسويها هذي تربيه اربع سنين تعود
ارجعي وبكل صرامه سوي طريقه العقاب شوي شوي يعرف ان اي خطا معناها انحبس بالغرفه هذيك البايخه واطفش

يعني تقولين هااا لا تسوي كذا اوديك الغرفه الخضرا الحمرا سميها له

وربي يصلحه ويهديه الخوف يجي طفل بعده ويتاثر فيه بعد وهو يكبر ويتعب ويتعبك معه

المتغلية شكرا لك.. نفس كلام ايمان ...بخصوص الغرفة احطة فيها واسكر الباب يعني بدون ما اقفلة .. بس اذن كذا بينرعب... ولدي خواااف مرة اخاف ما انفعة..ولدي خواف...ومن النوع اللي اذا توتر يصير عندة تأتأة ....
بنات والله انا احسني بين نارين ~.. اخاف اكون صارمة معاه... يرجع لمعاناتي القديمة معاه...
شوفو موضوعي سبق وكتبتة..وكنت بحالة لا يعلم فيها الا الله..

http://archive.hawaaworld.com/showthread.php?t=538610&highlight=%E6%E1%CF%ED+%DA%E4%CF%C9

وقال الدكتور انة الطفل تعرض الى صدمة نفسية ..لازم نحسسة اننا نحبة...!!!
من جد محتارة مدري كيف اتصرف.. موضوع الغرفة..ولا مكان العقاب هذا جاب نتيجة مع كثير ... بس ما اجزم اني بسويها..الله يخليكم يا بنات .. وش الحل..
ما ابغى اعاقبة.. ورجاء مب كل وحدة تدخل وتقول..لا هذا غلط.. لا مب كذا تعاملية.. لا خليك ..صارمة..؟؟ انا ما كتبت مشكلتي مع ولدي الا لاني عارفة ان هذا الشي المفروض ما يصير.. فرجاء لا تجلسون تلوموني ..ولا تعطوني حلول من غير تجربة!!!!! ترا ما يحس بالجمر الا واطيها!!!!