فترة النفاس .. لاتهمليها .. خذي نصايحي .. وانتي تطلعي زي الوردة المتفتحة

السلام عليكم ورحمة الله وبركاته

قبل كل شي كل عام وانتو بخير والله يبلغنا رمضان بصحة وسلامة:)

وكل الحوامل الله يسهل عليكم ويقومكم بالسلامة .. وانا وياكم ياااااااااارب

حبيت افيدكم باللي نسويه في فترة النفاس

وان شاءالله بتطلعي منه زي الوردة المتفتحة :26:

بس بدون كسل نبغى نشاط :7_5_131: :7_5_127:

وحكتب كل شي بالتفصيل الممل

اولا :
الاكل
طبعا عندنا لازم من مرقه المقادم (الكوارع) كل يوم لازم منها مع الفلفل الاسود

مرقة اللحم مع اللحم طبعا تاكليه ويكون اللحم لباني صغير يعني مو كبير عشان مايجي دسم

مرقة الدجاج بس مانكتر منها وكل وحده حسب رغبتها

طبعا مانكل الاشياء المتزحلقة خخخخ ملوخية بامية حبحب ليمون .. الخ

االرز لالالالالالا

المكرونة لالالالالا

اكتر شي ناكل المرق اللي كتبتها ونفت معاه عيش حب (خبز اسمر)

وناكل الحيسة والعريكة طول الوقت طبعا كللهم بالدخن

نسوي كمان بالدخن العيش على الصاج (الخبز ) ونفته مع المرقة اذا حبينا

وناكل التمر مع السمن والرشاد بس بعد اسبوعين من الولادة ولمدة اسبوعين بس
.......................................


تانيا :

المشروب الساخن لاززززززززززم منه

بدال الموية والبيبسي والعصاير الباردة والقهوة (باستثناء قهوة الشعير او قشر القهوة)

نشرب هذا المشروب طوال اليوم


شوفي اول شي جهزيلك قارورة قزاز وحطي فيها التالي بكميات متساوية يعني ا ملعقة كبيرة من كل صنف وكله بحباته يعني بكبره يعني مو مطحون اوكيه

حلبه - قشر قهوة - شمر - قرنفل - يانسون - قرفة ماليزية طبعا مجروشة - خولنجان مجروش طبعا
- جوزة الطيب من دون قشره ومجروش - الخزامى - الميرامية - بابونج - روز ماري - شاي اخضر صيني اصلي - هيل حبشي - كراوية - كمون - سكر بني مجروش - سكر نبات مجروش

لاتستغربي وتقولي كتير هذي انا بنفسي شربتها واشربها طوووووووووووووووووووووول اليوم طول ماانا قاعده وانا اشربها

اشتري من كل نوع مثلا بريالين وراح تكفيكي شهر

انتبهي لازم تنظفيهم وتنقيهم من العود والقش

اخلطيهم بكميات متساوية وخليهم في القارورة في مكان بارد مو شرط في التلاجة ممكن في اي غرفة على طول تشغلوا فيها المكيف

وكل مابغيتي خدي ملعقة كبيرة منو وحطي عليها كاسة موية مغليه واتركيها تنقع 5 او 10 دقايق وصفيها واشربيها دافيه

بدال القهوة والشاي والبيبسي والخرابيط دي حتى بدال الموية العاديه اصلا ماراح تحسي بالعطش

وكمان من يوم تولدي بالسلامة ولمدة اسبوعين فقط

تدقي مرة وتاخدي ملعقة صغيرة تسفيها وبعدها تشربي حليب طازة بقري مفقوع عليه صفار بيضة او اتنين بلدي ومحلى بسكر نبات او عسل

المرة بس اسبوعين

اما الحليب باللي فيه ع الاقل تاخدي منو 20 يوم
................................................................

وبعد اسبوعين من الولاده او تلاته اسابيع

ابدأي اشربي من رجل الاسد لحالو ما معاه شي

تاخدي ملعقة كبيرة منو تنقعيها في كاسة موية مغليه لمدة 10 دقايق وبعدين تشربيها بمعدل 3 مرات في اليوم

هدي تمسح بطنك وتنزل الافرازات من الرحم وتمنع ارتخاءه وتشد البطن

بس احسبي لازم ماتعدي 20 يوم

يعني تستخدميها 20 يوم وتوقفي طيب


..............................................

خلصنا كده من الاهتمام داخليا يعني من جوة الجسم

نجي من بره

اول شي تستمري على الكريم او الدوا اللي يوصفه لك طبيبك بالنسبة للخياطة


ومن يوم تطيح الخياطة تبدأي تغسلي بالمرة كا مادخلتي الحمام الله يكرمكم

تدوبي مرة في موية حارة ولما تدوب ووتدفي تاخديها وطول اليوم تغسلي فيها ال.. فاهمين :42:

وبعدين تسوي حمام البوخ (البخار) من تحت بس يعني تحطي القدر وتوقفي فوقه فاتحة رجولك

(انتبهي لاتتلسعي من القدر) وتتلفي بشرشف عشان البوخ مايطلع لبره

يعني بس من تحخت حتلفي من وسطك ونازل اوكيه

ويكون لمدة 6 ايام بس

قبل لاتنامو

تاخدي

حزمة بقدونس منظفو ومغسله + 3 حزم نعناع منظف ومغسل + 4 ملاعق كبيرة شيح + 4 م ك حلبه
+ كبشة يدك قشر رمان + كبشة يدك قرض

تحطيهم في قدر كبير في موية مغليه وتغطي القدر وتولعي عليه النار متوسطة لمده تلت ساعه

ولاتفتحي الغطاء ابددددا ابددددا الا لما تاخديه ع الحمام وتجهزي فوقه بعدين تفتحي الغطاء

وقفي فوقه لمدة 10 دقايق ربع ساعة بالكتير وخلاص تخرجي منه وتغسلي عادي ثم بالمرة

واتركيه الين يدفي قومي صفيه بمصفاية نااااااعمة واتنقعي فيه لمدة 10 دقايق كمان

وارجعي غسلي عادي وبالمرة ونشفي وبعدين اطلعي نااااااااااااامي وارتاحي

**

وكمان تستخدمي غسول تاني وهو بعد ماتطيح الخياطة كمان وهو كالتالي
قد يدك من الارطا وكمان زيو من العفص اغليهم في كاستين موية ولما تبرد صفيه واتغسلي فيه من تحت بره بره اوكيه


........................

نجي للجسم والترهل والتشققات

من يوم الولادة لاخر يوم في الاربعين

اول اسبوعين اتمرخي زي الناس عند داية كويسة ولو هيا شاطرة في نهاية الاسبوعين نص كرشتك
حتختفي

وطبعا لازم من ربط البطن وطريقتي هيا كالتالي

ادهن جسمي كله بالليل زيت زيتون وخل تفاح اصلي والبس زي البيجاما تكون قطن

اما بطني كل كم ساعه ادهنها زيت زيتون وخل تفاح كل بطني مع تحت صدري واوصل لاردافي

والف الشماغ زي الناااااااااااااس بس مااخليه يفعصني لا ااشده شوية وبعدين فوقه البس المشد اللي من الصيدليه لانه وراه في مغناطيس يسحب الالم من الظهر ووالله مرة ريحني واقعد فيه طول اليوم ولما ابغى انام افصخ بس المشد وانام بالشماغ

بالنسبة للستيان لاتفصخيها بالعكس البسيها على طول

ودهني صدرك على طول وجسمك بزيت الزيتون والخل التفاح الاصلي

زيت الزيتون يطري الجلد ويشدو والخل يدوب الدهون والسيلولايت ويشيل التشققات اذا في

.................................

لالام الظهر

تجيبي من عند العطار قرص القمر وجوزة الطيب وتطحنيهم وتخلي احد يحطهم على ظهرك مع حبتين بيض نيء يعني لبخة وتلفي ظهرك

تقعدي فيها ساعتين بعدين تغسليها

وكل يوم الين تحسي ظهرك اتعافى بإذن الله

.....................................


وطبعا لاتنسوا تمارين كيجل لشد ال..

ومن يوم تحسوا انكم طيبين وتقدروا تمشوا امشوا كل يوم لو نص ساعه

وترى فترة الاربعين مو انسداح وانبطاح لا:angry2:

هذي فترةاستجمام واهتمام لاصلاح ماافسده الحمل كخخخخخخخخخ

ولاتنسوا ذكر الله اولا واخيرا

وترى انا مااحبذ فكرة الوحده على طول تبغى تنحف ويكون على حساب المولود وبشرتها وشعرها وجسمها

لا لاتحاولو تسوو دايت الا بعد 6 شهور من ولادتكم

ولاتمنعو نفسكم من الاكل اللي قلت لكم عليه في في فترة نفاسكم بحجة انو دسم وسمن ويتخن

لا كلو صحة وكلو تحتاجيه

اهم شي الرياضة واذا ماقدرتي على النادي

بعد ولادتك باربعة شهور امشي كل يوم ساعتين وادعولي راح تشوفو الفرق
يالله دحين ماابغى الادعواتكم وان كانت بظهر الغيب

ربنا يتمم عليا حملي ويرزقني الذرية الصالحة ويفرحني باللي في بطني بصحة وسلامة يارب