حلى قهوه خفيف وسهل (شبيه للحلى اللي في حلويات سعدالدين)

السلام عليكم
انا اول مره اكتب في قسم الأطباق وان شاء الله ما أفشلكم

الحلى هذا يبيعوا شبيه له في حلويات سعد الدين وكمان الدبلوماسي بس الشكل فقط يختلف (اهم شئ المضمون)

المقادير:
1علبة بسكويت العسل من غراهام Graham وهي علبة لونها احمر ومرسوم عليها عسل والبسكويت نفسه يجي مستطيل ونحيف ورقيق تلقوا منه نكهات زي مثلا القرفه ولكن انا جربت العسل فقط (لبنات السعوديه موجود في السدحان والتميمي وكارفور)
1 اصبع زبده صغير
1 ملعقة طعام عسل
1 كاس لوز شرائح (بالكيلو عند المهباج عشان اريحكم)
نصف كاس سكر (واللي يحب يضيف سكر براحته لكن هي بتطلع حلوة مره بنص كاس)
1 بيالة حليب سائل (اللي ماعندها حليب سائل تحط ملعقة صغيرة حليب بودره ومويه حتى يصير بياله<<<الحاجة ام الاختراع)

طريقة العمل:
1-افتحي علبة البسكويت وتلقيه مقسم بنفسه لكن ملصق ببعضه حاولي تفكي تقسيمه عن بعض حتى يطلع الشكل النهائي مستطيل (لاتخافي ما حيتكسر الا اذا كانت العلبه اصلا معفوطه او فيها بلا)
2-رصي البسكويت في صينيه أي شكل مو شرط شئ معين لكن اهم شئ صينيه ما تحرق البسكويت
الطبقه اللي فوق البسكويت:

بالترتيب يا بنات

اول شئ نحط اصبع الزبده عالنار ونحركه شويه وبعدين نحط السكر شوي شوي عليه الين تحسي انه ذاب كله وانتبهي حركي بسرعه عشان ما يجمد على بعض
بعدين حطي معلقة العسل وصبي بيالة الحليب بالتدريج عليهم وقلبيه بسرعه لأن السر في طريقة التقليب
بعد كذا اضيفي شرائح اللوز وحاولي تحركيه بأسرع ما يمكن عشان يخلط مع بعض ولا يتكتل (استخدمي ملعقة تقليب خشبيه أفضل) وخليه عالنار حتشوفي انه بدا يتجانس مع بعض وياخذ لون ذهبي حلووووو
طبعا بالنسبه للي تعرف بالطبخ حتعرف متى تكون الخلطه جاهزه ومتماسكه لما تصير ذهبيه
طفي تحته وروحي للصينيه وصبي الخلطه عالبسكويت بالتسسسسسسساوي بحيث انك تملي البسكويت من فوق طبقة لوز

ضعيه بالفرن وولعي عليه من فوق بس شويه وانتبهي لو الفرن حار خليك جنبه عشان ما يحترق
لما تشوفي البسكويت اتجانس وتماسك مع الطبقه اللي فوق وصار لونها من فوق ذهبي طلعيه وخليه يبرد
بعد نص ساعه كذا قطعيه على شكل البسكويتات المستطيله ورصيه بصحن التقديم

وصحتين وعافيه

أوووووووف كتابة طريقة عمله تاخذ وقت اكثر من شغله خخخخخخ
رمضان كريم
:D