بنات حلال ولا حرام ؟؟ بنات شوارع ولا بنات ناس ؟؟

السلام عليكم و رحمة الله وبركاته

بنات حبيباتي انا جيتكم اليوم بموضوع مره مهم واللي خلاني اكتب هالموضوع منفصل لاني بتكلم بشكل عموم ولا اقصد في كلامي عضوه معينه

كلامي هنا موجه للجميع

واتمنى تقرونه للأخير وتفهمون وجهة نظري


موضوعي اليوم يتكلم عن الخيانه الزوجيه


كثييير لاحظت عضوات يشتكون من خيانة أزواجهم ويجون هنا يطلبون المشوره

حياكم الله حبيباتي احنا هنا كلنا خوات ويد وحده وبإذن الله نوقف مع بعض في المواقف الصعبه

لكن عندي تعليق على كلا من


الزوجه المغدوره


والعضوه اللي ترد على زميلتها


اولا نجي لملاحظاتي على الزوجه المقهوره

تجي تكتب موضوع وتشرح فيه بالتفصيل الخيانه وكيف صارت ومتى وشلون


بس السب والشتم والاهانه والدعاء يكون من نصيب البنت اللي زوجها يخونها معها

نجي للقائمه

1_ الله ياخذها

2_ الله لا يوفقها

3_ الحقيره اللي ماتربت

4_ الخاينه لربها وأهلها

5_ الله يبلاها بمرض ماتقوم من مكانها

6_ الله يشلها

7_ الله يشغلها بنفسها

8_ الله ينتقم من كل وحده تكلم واحد متزوج

ياسبحان الله يعني اللي مو متزوج عادي حلال ؟؟

استغفر الله معليش نقول ان اللي مو متزوج ماعنده زوجه تنقهر منه


طيب يااختي اذا زوجك و ابو عيالك وحبيبك واللي المفروض انتي زوجته وحبيبته وام عياله

مااحترم نفسه ولا بيته و زواجه ولا زوجته

تبين بنت الناس تحترمكم وتقول لا والله هذا متزوج ماابي اكلمه ؟؟ على اي اساس بالله ؟؟

يااختي اقل شي بتقوله ( والله بالطقاق اذا هو راضي يخون زوجته انا مالي شغل )



8_ بنت الشوارع

9__ بنت الحرام


ركزوا معي على أخر نقطتين




نجي للعضوه الطيبه الحنونه المتعاطفه مع كاتبة الموضوع ويمكن هي بعد تكون مرت بنفس التجربه



وترد بنفس القائمه اللي فوق


وفي المقابل

نشوف كاتبة الموضوع تقول عن زوجها


الله يخليكم انا احبه

اموت فيه


عطوني حل ارجعه لي


ماابي اخسره


ماابي اتطلق

ماابي اشتت عيالي


والاخوات العضوات المتعاطفات



لالالالالالالالالالالالالالالا لا انتبهي تواجهينه ترى والله بتخسرينه


لالالالالالالالالالالالالالا لا تقولين له شي انتبهي ترى بيقلب الموضوع فوق راسك وبيقول انتي راعيه مشاكل وتتجسسين وراي


لالالالالالالالالالالالالا سوي نفسك ماتدرين عن شي وعدل بنفسك وشكلك وبيتك وعيالك واسلوبك



لالالالالالالالالالالا انتبهي يمكن هو بس يجاريها ويلعب عليها

رووووووحي كلمي عليها الهيئه وعطيهم رقمها وهم بيتصرفون

<< ليه ماتكلم الهيئه على زوجها بالمقابل ؟؟


عجيب



ومن هالردود


اللي تنزل البنت في اسفل السافلين


وترفع الرجال الى اعلى قدر


على الرغم من الغلط راكب الاثنين من ساسهم الى راسهم

و

بالمناااااااااااااااصفه


و على الرغم ان اثنينهم يجتمعون في نفس الصفات


بس سبحان الله البنت الخاينه تصير

ماابي اقول وش تصير اختاروا من القائمه اللي فوق



اما الزوج سبحان يصير منزه عن الغلط ويصير شريف وعفيف وياحرااااااااااااااام هو طفل صغير بريئ مايعرف شي وهالبنت الخاينه هي اللي طبت في طريقه وأغرته وضحكت على عقله

ياقلبي النونو المسكين اللي مايعرف يفكر ولا يحلل ولا يحرم

صارت البنت هي اللي تركض ورى وناستها وسعادتها


والرجال يا حبة عيني مسكين رحوم هو بس قاعد يجاريها ويلبى طلباتها


هو مايبي شي منها بس يونسها ويوسع صدرها

ياعمري يكسب فيها اجر






معلييييييييييش يعني معليييش

وشو يلعب عليها ويجاريها ؟؟


يعني اذا يلعب عليها صار حلال واذا يحبها ويبيها حرام


لعب ولا جد الحرام حرام







سبحان الله حتى مواجهه تخافين تواجهينه يعني حتى صرنا نخاف نقول هذا غلط وهذا حرام



مو مشكله نقول ان الصمت وتدبر البيت والحياه بسكوت من الحكمه


بس لا تحللين لزوجك اللي تحرمينه أشد تحريم على غيره


الحلال واضح

و

الحرام وضح


والعقوبه بالمساواه على الكل

رجل

أنثى








يابنااااااااااااااااااات


يا عزيزاتي


أتقوا الله بأنفسكم
أتقوا الله بأنفسكم
أتقوا الله بأنفسكم

كل كلامكم محاسبين عليه


ولا فيه اي مبرر ابد قدام رب العالمين تبررين فيه لنفسك انك تسبينها او تدعين عليها او حتى تطعنين في اصلها وشرفها


أدري بتقولون ماعندها شرف


مو هنا كلامنا


كلامنا


لما نجي للزوج


اذا بنحكم بنفس الأحكام اللي حكمتوا فيها على البنت الخاينه

فمعناها


ان الزوج الخائن


عيال شوارع وعيال حرام


8
8
8
ترضين احد يقول عن زوجك هالكلام


طبعا لا


طيب ليه ماترضين ؟؟


لانه ولد ناس ومتربي صح ؟؟




اجل على اي اساس حكمتي على البنت انها بنت حرام او بنت شوارع؟؟


مو هي خانت مثل زوجك؟؟







سامحوني اذا غلطت باي لفظ
عذرا على الكلام القاسي





بس اتحدى اي وحده فيكم تعاني من خيانه زوجها تسب زوجها ولا تدعي عليه بالمرض ولا الشلل ولا البلاء ولا تغلط في اصله ولا شرفه

صح ؟؟


طيب اذا كان زوجك الرجال المتزوج المحصن واللي معظمهم عنده كوم عيال خان نفسه و ربه واصله وشرفه

وهو لاحظوا انه متزوج يعني المصيبه اعظم


ماتقولين عنه ولا حرف ولا ترضين اي احد يغلط عليه وهو مسوي حرام مثل البنت اللي انتي وغيرك من العضوات قطعتوها سب وشتم ودعاوي



وش الفرق ؟؟؟؟



ليه مانشوف نفس الغيض والغل والحقد الموجهه للبنت موجه للزوج واللي هو بالاساس ملكك وخانك انتي وجرحك انتي وأذك وممكن هدم بيتك


وفي المقابل البنت اللي انتي ماتعرفينها

تكرهينها وتحقدين عليها وتصبين عليها جام غضبك

وبدال ماتكونين مظلومه وتحتسبين الاجر في هالظلم والاجر اللي وقع عليك تصيرين مذنبه بسبب ألفاظك ودعاويك



طيب بسألك سؤال


اذا هالبنت ربي بلاها بمرض وراحت من طريق زوجك ولا جات الهيئه ومسكتها

هل في ظنك ان زوجك بيتوب ؟؟ بيهتدي ؟؟ بيرجع لك ويطلب منك السماح ؟؟


لا والله


الرجال اللي في دمه الخيانه لو راحت من طريقه بنت بيجيب مليون بنت


والرجال اللي مايبي الخيانه لو تطيح في دربه مليون بنت و ربي بيصون نفسه وبيته



يا بنات

انا مااقولكم قولوا عن الصح غلط وعن الغلط صح

لا والله

مااقولكم ان هالبنات اللي يكلمون أزواجكم مالهم ذنب


لا والله


صدقوني هالبنت ماراح تتوفق بحياتها او بالاحرى ماهيب متوفقه في حياتها

اذا هي متزوجه تلقينها عايشه حياه تعيسه وكئيبه وبعذاب مع زوجها

واذا ماهي متزوجه صدقني ربي بيعسر امور زواجها

وان تزوجت

بتشوفين زوجها يخونها مع كل من هب ودب


ليش تجين انتي وتخلينها تاخذ زوجك وبيتك وفوقها حسنااااااااااتك


اي نعم

حسناااااااااااتك


لانه لا انا ولا انتي ولا فلان ولا فلانه

لنا اي حق نحاسب احد او نعاقبه او نقذفه

فوقهم رب شديد العقاب


بس هاه لاحظي


رب زوجك و ربها هي


يعني اللي بينزل عليها من عقاب بينزل على زوجك ويمكن اشد بإعتبار انه متزوج



ليه تخلينها تاخذ حسناتك

ليه انتي ناقصه ذنوب وأثم ؟؟


ومن مين من وحده انتي مقهوره منها اشد قهر ؟؟



تعال لنا يا حبيبتي فضفضي .. تكلمي .. بردي قلبك


استشيري .. خذي النصيحه



بس هاه

خلك اشطر منها واذكى منها

قولي بس حسبي الله ونعم الوكيل

هالكلمه اقوى من كل دعوة

لانك وكلتي امرك للرب اللي خلقك وخلقها وخلق زوجك




وانتي ياعزيزتي العضوه

المتعاطفه مع زميلتك واختك


انتبهي

ترى ذنبك مضاعف


ايه نعم


لان اختي كاتبه الموضوع ممكن نقول انها غلطت عليها من باب القهر وانها متأذيه منها

بس انتي ياويلك من عقاب ربي

لانك ماتعرفين البنت ولا أذتك بشي وانتي سبيتيهاوشتمتيها وممكن تكونين قذفتيها

مهما كانت هالبنت

مو احنا اللي نحكم ولا احنا اللي نعاقب ونخلق لأنفسنا مبررات





انصحوا .. تعاطفوا ..

بس انتبهوا لا تاخذون أثم وذنوب عشان كم كلمه تكتبينها


انصحي هالبنت المقهوره

بإنها تتوجه لربها وسجادتها ودعائها واستغفارها وقيامها لليل


8
8
8
هذا اللي بينفعها لانها بتتوجه لربها وهذا من باب ثقتها بالله انه مااحد بيفرجها عليها الا ربها

ومااحد يقدر على قلب زوجها الا ربها

ولا احد يقدر يبعد هالبنت عن بيتها و زوجها الا ربها


وبينفعك لانك بتكسبين فيها أجر لانك دليتيها على خير

ادعي لها لان الدعوة بظهر الغيب مستجابه بإذن الله


لا تحولين نفسك من مظلومه الى ظالمه


من مأجوره الى مستأثمه



وعلى فكرة بنات

انا مااتكلم عن مجتمعنا وكيف عشنا وتربينا

و وشو اللي مجتمعنا يحلله ويحرمه على كيفه


كلنا تربينا في نفس المجتمع ونفس العادات والتقاليد واللي تقول ان الرجال يشيل عيبه


انا اتكلم هنا عن شي محدد


عن مراقبة الله في مواضعينا في ردودنا

مااعتقد ان صعب عليكم تغيرون الموروث الغلط اللي تربينا عليه

ولا اعتقد انه من الصح انكم تشنون حرب على البنت و تتحاشون الرجل


كل الله اقوله راقبوا انفسكم و كلماتكم سواء اللي كانت تخص الرجل الخاين او البنت الخاينه او حتى نصايحكم للزوجه المقهوره

تراكم محاسبين عليها



سامحوني واعذروني على اي كلمة ضايقتكم مني بس و ربي ماكتبت هالموضوع الا لاني أحبكم وابي لكم الخير وماابيكم تاخذون ذنوب وآثام بسبب ناس مأذينكم وجارحينكم






:26: