نصفي الثاني

نصفي الثاني @nsfy_althany

محررة برونزية

تعالوا شوفوا ايش سوينا في جمعتنا بيت الوالد يوم الخميس من اطباق لذيذه ..بالصور؟؟؟

اطباق عالم حواء

السلام عليكم ورحمة الله وبركاته


اشلونكم خواااتي

تعالوا اقول لكم عن جمعتنا يوم الخميس ... انا واختي لما نجتمع بيت الوالد كل خميس (طبعا احنا نروح كل وقت عادي بس يوم الخميس اسبشل الكل يكون في البيت ونطبخ ونتفنن وبكونه يوم اجازه نطول طبعا علشان جذيه خلينا القعده يوم الخميس )

المهم كل خميس نسوي اصناف من الاكل وكل خميس شئ والكل يستانس على اكلاتنا وماشاء الله مايتم شئ نسوي اكله كطبق رئيسي ونسوي سلطات ونسوي خفايف وحلويات ماشاء الله

وكل وحده فينا مسويه ملفات لاكلات الانترنت
ونختار كل خميس شنو نسوي

واليوم باقول لكم عن اكلاتنا للخميس اللي رايح ولو انها متاخره بس شاسوي والله صرت مشغوله وايد من هالمدارس (الله يعطينا العافيه كلنا )


يالله نبدي
استعداد اكشن (حلووووه مو اكل فيلم خخخخخخخ )

يالله راح ابتدي باول اكله الا هي


هي


المضروبه
سويتها لانه يدتي كانت موجوده معانا الله يطول بعمرها وخبركم ماتاكل الاشياء اللي فيها روب وجبن وهاي السوالف تبي اكلات مالت لول وسويت لها مضروبه علشان عيونها الله يخليها واعجبتها واستانست عليها وتقول لي لاتنسيني في رمضاااان لووول

وهاي الصوره



واشكر من كل قلبي اختنا الغاليه مهاري لان المضروبه طريقتها فبارك الله فيج اطلعت لذيذه وروعه وخفيفه بس انا شوي حطيت دهن على الويه واايد صح
فالف شكر لج مهاري من كل قلبي

طريقه المضروبه



المضروبه

المقادير

دجاجه مسلوقه منزوعة العظام

2ونص كاس رز منقوع في الماء

4 بصل مفروم

2 فص ثوم مدقوق

1 حزمة كزبرة

نصف حزمة بقدونس

4 طماطم مفروم

3 فلفل حار مفروم

1 علبة صلصة طماطم

2 ليمون اسود

2 ملعقة طعام بهار مخلوط

1 ملعقة طعام ليمون اسود مطحون

1 ملعقة طعام كزبرة جافه مطحونه

1 ملعقة طعام كمون مطحون

1 ونص ملعقة طعام ملح ( حسب الرغبه )

17 كوب ماء = 3 ليتر ماء

الطريقة :

يحمر البصل والفلفل الحار والثوم والكزبرة والبقدونس مع الزيت



يضاف الي الخليط بعد ان يتحمر ويذبل .. نضيف الصلصه والبهار المخلوط

والطماطم والليمون المطحون و بودره الكزبره والكمون



وبعدها الدجاج انا اضفت دجاج صدرور 4 قطع مقطعه قطع صغيره



ونضيف لتر واحد من الماء



نضيف الارز بعد ان ازلنا الماء المنقوع فيه

ونضيف الفلفل الحار الغير المقطع مع حبتين الليمون الاسود



وكل ما نشعر بان الماء بدا ينشف نضيف ليتر ثاني

مع التحريك المستمر ويجب ان يكون الجدر مغطى

وهذا الانتهاء من الطبخ بدانا في التحريك والتقليب

حتى يصبح متماسك اكثر



وثاني طبق

وهو اللي قلت لكم عنه اني لازم اسويه لو عقب اسبوعين بس لازم يطلبونه مني
اللي هو الكوسا المحشي
وهاي صورة الاكله



الطريقه

المقااادير :
كوسا تكونون خارمينها من داخل عدل بحيث تكون لينه نوعا ما علشان تستوي بسرعه

لحم مفروم (انا استخدم لحم مفروم طازج (كيس واحد )لكيلو نص كوسا

عيش (ارز )انا استخدم جيله للكيلو ونص كوسا

طماطه وحده مفرومه صغار صغار

بصلتين صغار مفرومتين

واهم شئ اللي يعطي ريحه وطعم حلو
بقدونس وتكون الكميه كبيره

ونعناع تكون كثر كوب

بالخلاط (4 معجون طماطم مع 4 حبات ماجي )



الطريقه ::

اول شئ نحط البصل ونحمره شوووي في الدهن وعقب نحط اللحم المفروم ونخليه لين الماي يجف عدل

بعدين نضيف العيش عقب ماغسلناه وبعد نفس الشئ نخلي باقي الماي يجف شوي

بعدين نضيف الطماطم والبقدونس
(البقدونس نحط دفعه دفعه ونخلط وهكذا لين ماالكميه تنتهي لانها كميه كبيره صعب شوي خلطها )
وعقب نحط النعناع

ونخلطهم تمام التمام

واخيرا نضيف
كل البهارات
ملح بزار فلف اسود فلفل احمر شويه ودارسين مطحون كمون اللي تبونه ولازم تضيفون الكركم

وتكون الكوسا جاهزه ونظيفه

نحط الحشو داخل الكوسا

ولازم تكون زياده من الحشو شويه نحطه في قاع الجدر
ونصف فوقه الكوسا بالطول

وبعدهااا
نحط (معجون الطماطم ويا الماجي ومع اضافه الماي )في الجدر ونصب بعد شويه على كل كوسا من فوقها

وطبعا الماي اللي في الخلاط مب كفايه
حطوا ماي لين مايوصل الماي قبل نهايه الكوسا بشوووي

وغطوا الجدر وخلوه يطبخ على نار عاليه
وكلها اقل من نص ساعه ان شاء الله بتكون خالصه
او نص ساعه على حسب الكوسا

وبالعافيه
يمي يمي
والله انها لذيذه واللي محليها النعناع والبقدونس


ثالث طبق

سلطه الصوص الوردي
لذيذه وخفيفه وحلوه

وهاي صورتها




الطريقه

المقادير
خيار مقشر
بصل اخضر مقطع
فلفل بارد بجميع الوانه ان امكن
جزر مبشور
ملفوف ابيض واحمر
خس امريكي
نحطهم بعد التقطيع على شكل طبقات

بعدين نحط فوقهم الصوص الوردي واللي هو عباره عن:

علبه زبادي
4 ملاعق مايونيز
4 ملاعق كاتشب
ملعقه خردل
ليمون
خل
ملح
فلفل اسود
حبه صغنونه ثوم مهروس

نخلطهم ونحطهم على الوجه بدون تحريك

ونحط فوقها علبه الذره وفاصوليا حمرا

وبعدين نكون قطعنا مكعبات صغيره توست وحمصناها مع زبده وثوم شويه ونحطها على الوجه
وبالعافيه

واشكر وحده من اخواتنا الغاليات في احدى المنتديات على هالسلطه الحلوه


(وهاي كانت اختي مسويتها السلطه )


رابع طبق

دجاج بالكريمه
لذيذ واايد حلووو نفس الفنادق بصراحه كذا مره اطلب من الفندق لما نروح دجاج بالكريمه واطيح فيه طيحه والحمدلله لقيت الطريقه وباقول لكم من صاحبتها

وهاي الصوره



الطريقه



دجاج بالكريمه
المقادير
اريع صدور دجاج منزوعه العظم ومقطعه الى مكعبات صغيره * كوب كريمه مالحه*كأس جبن كرفت*كوب مشروم مقطع الى شرائح صغيره
*مكعب ماجي*ملعقتين زعتر اورجانو *بصله مبشوره *ربع مكعب زبده*ملح
الطريقه

تذوب الزبده الى ان تصبح سائله ثم يضاف مكعب الماجي تضاف مكعبات الدجاج وتحرك الى ان تنضحج
يضاف اليها المشروح والبصل ويحرك ومن ثم تضاف الكريمه والجبن وملعقه الاورجانو والملح ويحرك بستمرار لمده ربع ساعه


واشكر من كللل قلبي حبيبتي قطريه على هالاكله الرائعه فالف شكر قلبي


خامس طبق (هاه لايكون تمللتوا لا لا مااعتقد تمللتوا لانها اكلات حلوه صــــــح )

لفائف التوست بالبنه

والصوره



الطريقه طبعا سهله ومعروفه

توست (نرقها بالنشابه بعد ازاله الاطراف )
لبنه انا انصح بلبنه بينار حلوه
نعناع طازج او مجفف كيفكم
زعتر لتزيين الاطراف

الطريقه
نحشي كل توست بالبنه والنعناع
ونسكره عدل ونزيين اطرافه بالزعتر


سادس طبق (كمقبلات سهل وشكله حلو للعزايم )

حلقات الخيار بالخس والكيري

وهاذي صورته



الطريقه مايبلها شئ وايد سهله


خيار مقطع حلقات وتقطعونه من داخل على شكل دائره علشان ندخل من خلاله ورقه خس
خس امريكي
كيري مع نعناع

ناخذ الخس طبعا عقب ماغسلناه ونحشيه شويه كيري مع نعناع ونلفه عدل مدل وندخل الرول داخل قطعه الخياره وبس
كلها لقمه وكلناه كله خخخخخخخ

هاه ايش رايكم حلوووووووه الاكلات وماشاء الله طحناه فيهم طيحه
كل واحد كان احلى من الثاني


تراني مانسيت السويت لانه بعد فيه سويت باحطه في رد ثاني
انتظروني









59
10K

يلزم عليك تسجيل الدخول أولًا لكتابة تعليق.

تسجيل دخول

عاشقة البر
عاشقة البر
اللة يعطيكم العافية انتى واختك واللة لايغير عليكم
نصفي الثاني
نصفي الثاني
هلا خواتي
الحين دور السويت

سوينا اول شئ حلى الفيمتو

وهاي صورة الحلى



روووووووووعه يابنات يذكرني بايس كريم قديم حلوو بنات لايفوتكم

واشكر حبيبتي قطريه مغروره و مهاري على الطريقه الحلوه والسهله واللذيذه

الطريقه

المقادير:

علبة بسكويت بدون كريمة (ناشفة يعني)

عبلة قشطة-2 كيس دريم ويب -

علبة جبنة فلاديلفيا - او (12) حبة جبنة كيري-

نصف كوب عصير فيمتو مركز-

(2) علبة كراميل -نصف كوب ماء.

الطريقة ...

- صف حبات البسكويت في طبق بايركس بعد ان تشرب في قليل من الحلي الفرش وتكون على الأقل طبقتين .
- تخلط كل من علبة القشطة والكريمة وجبنة الفلاديفيا بالخلاط حتى تتجانس ويضاف القليل من الماء ان احتاج المقدار وتسكب على طبقة البسكويت وتوضوع بالثلاجة حتى تتماسك جيدا .
- يخلط الفيمتو والكراميل والماء ويرفع المقدار على النار حتى لمدة دقيقة ثم يترك ليبرد بعد ذلك يصب على خليط الكريمة ويعاد الى الثلاجة حتى يتماسك ويجمد.

يقطع حسب الرغبة ويقدم ،، وبالهنااا


ثاني سويت سوينا

سويت المنجا
بعد نفس الشئ حلوه واللي يحب المنجا يسويها



وهاي الرابط واسمحولي اني ماكتبته لاني تعبت فعلا وانا انقلهم واكتبهم معليش

سويت المنجا

واشكر الغاليه باستا على السويت

بنات طبعا مثل ماتشوفون ساح الكرميل على الويه ليني طلعته من الثلاجه وحطيته بالسياره لين ماجيبه بيت ابوي فساح
(اقول لكم القصه خخخخخخخخ )









نصفي الثاني
نصفي الثاني
هلا خواتي
الحين دور السويت

سوينا اول شئ حلى الفيمتو

وهاي صورة الحلى



روووووووووعه يابنات يذكرني بايس كريم قديم حلوو بنات لايفوتكم

واشكر حبيبتنا مهاري على الطريقه الحلوه والسهله واللذيذه

الطريقه

المقادير:

علبة بسكويت بدون كريمة (ناشفة يعني)

عبلة قشطة-2 كيس دريم ويب -

علبة جبنة فلاديلفيا - او (12) حبة جبنة كيري-

نصف كوب عصير فيمتو مركز-

(2) علبة كراميل -نصف كوب ماء.

الطريقة ...

- صف حبات البسكويت في طبق بايركس بعد ان تشرب في قليل من الحلي الفرش وتكون على الأقل طبقتين .
- تخلط كل من علبة القشطة والكريمة وجبنة الفلاديفيا بالخلاط حتى تتجانس ويضاف القليل من الماء ان احتاج المقدار وتسكب على طبقة البسكويت وتوضوع بالثلاجة حتى تتماسك جيدا .
- يخلط الفيمتو والكراميل والماء ويرفع المقدار على النار حتى لمدة دقيقة ثم يترك ليبرد بعد ذلك يصب على خليط الكريمة ويعاد الى الثلاجة حتى يتماسك ويجمد.

يقطع حسب الرغبة ويقدم ،، وبالهنااا


ثاني سويت سوينا

سويت المنجا
بعد نفس الشئ حلوه واللي يحب المنجا يسويها



وهاي الرابط واسمحولي اني ماكتبته لاني تعبت فعلا وانا انقلهم واكتبهم معليش

سويت المنجا

واشكر الغاليه باستا على السويت

بنات طبعا مثل ماتشوفون ساح الكرميل على الويه ليني طلعته من الثلاجه وحطيته بالسياره لين ماجيبه بيت ابوي فساح
(اقول لكم القصه خخخخخخخخ )









ضحى الإسلام
ضحى الإسلام
اطباق رائعه ولذيذه تسلم اياديكم جميعا اختي نصفي الثاني
ورده العيد
ورده العيد
ماشاء الله عليكم بالعافيه