خبز الطابون او خبز التنور
(لعمل رغيفين)
كوب ونص طحين ابيض
نص كوب بر (طحين اسمر)
كوب ونص ماء
ملعقه كبيره سكر
ملعقه كبيره وربع خميره

نذوب الخميره في نص كوب ماء دافي وملعقه كبيره سكر
نخليها تتخمر
في انا العجن نحط الطحين وملعقه صغيره ونص ملح
نصب خليك الخمير وكوب ماء ونعجن
يكون عندى عجين لين جدا مثل عجين اللقيمات تقريبا




نستمر في العجن حوالي 7 دقايق
نتركه يتخمر ساعه ثم يحرك بالملعقه
يضاف اليه 2 ملعقه طحين بر او ابيض
وبدون ما نعجن بس نحركه خفيف مع العجين حتى نعرف نقطع العجين



تقسم الى قرصين بالتساوي او الى ثلاث اذا راح نعمل ارغفه صغيره
تفرد بالضغط باليد دون استخدام الفراده كم ضغطه حتى يصير قرص مدور بس ثخينن



نطلع الصاج من الفرن ونخليه على جنب
نرفع العجينه بيدنا ونضل ننقلها من يد الى اليد الاخرى وهي راح تبدا تكبر شويه شويه



بسرعه نحطها بالصاج الحامي وندخلها الفرن على اعلى رف ممكن بالفرن
ننتظر حتى يبدا الوجه يتحمر ونطلعها









وهذا المسخن جاهز




وعليكم بالف عافيه

الشيراك



المقادير
2كوب دقيق ابيض
1 كوب دقيق بر فاخر
نص كوب زيت (اقل من النص بتكه)
كوب ماء دافي
ملعقه صغيره ملح
رشة سكر
الطريقه
يخلط الدقيق والملح والسكر مع بعض ونعمل حفره في الوسط
نصب الماء والزيت ثم نعجن نستمر في العجن
اذا كان العجين قاسي نبل يدنا بالماء ونعجن وكلما اختفى الماء ببللنا يدنا مره ثانيه وعجنا
حتى نحصل على عجينه حلوه وناعمه


تغطى وتترك لترتاح 10 دقايق

تقرص حسب حجم الصاج اللي عندك
(انا قسمتها الى ثلاث اقسام )
تترك نص ساعه الى ساعه ترتاح
بعد كذه تفرديها في البدايه في الفراد بس تكملي بيدك
بحيث ترفعيها وتبسطي اصابع يدك بحيث تكون اصابع يدك حركتها لينه
حتى ماتخرمي العجينه وتستمري من يد الى الاخرى بالتبادل
واذا كانت هذي المرحله صعبه عااااااااادي على نفس الرخامه
امسكي العجين من الطرف ارفعيه وابدي اسحبي بشويش
راح تلاحضي ان العجينه كانها مطاااط تنسحب معك بسهوله



حوالي توازني حجمها وشكلها
اذا شفتي ان حجمها حكيون اكبر من الصاج اقطعيها بالسكين بشكل دايري مرتب
بس هذا في البدايه بس بعد ماتعملي الشراك كذا مره راح تقدري تلقائي تتحكمي
بسمك وحجم العجينه المفروده

نعمل خدديه صغيره انا بجيب منشفه صغيره وبلفها على شكل دايره وبعدين بجيب قماشه نضيفه انا استخدمت مريلتي حقت المطبخ وهي جديده لسه ما استخدمتها وحطيتها للخبز




طبعا يسخن الصاج وتوضع العجينه عليه انا عارفه انه في كثير بنات ماعندهم الصاج الخاص بالشيراك
فعادي ممكن تعمليه على اي صينيه موجوده عندك وراح تعطيكي نفس النتيجه
انا عملته على الصينيه اللي بنحط فيها الاكل
اكيد في كل بيت زي هذي الصينيه


نرفع العجين على الصاج
ونحرك الصاج بسرعه في اماكن مختلفه لان النار راح تكون من الوسط بس

وبيدنا الثانيه الخداديه اللي عملناها ونضرب الخبز باستمرار حتى ما تتطلع فقاقيع
يقلب بسرعه على الوجه الثاني
انا هنا لاني قاعده اصور فتاخرت شويه فاتحمر من الوسط وهذا خطاء

وهذا مفرود وموازنته على نفس حجم الصينيه








ولازم تتذكرو انه لازم تشيليه من على النار بسرعه لان مدة الخبز ماتاخذ وقت
مدة الخبز ماتاخذ 30 ثانيه يمكن اقل اذا يدك سريعه في الخبز

عجينة الرقاق اليمني (رقايق السنمبوسه )
بالنسبه لي هذي العجينه رئسيه ممكن تعملي منها كل شي

ممكن تعملي منها فطير مشلتت مصري
رقايق الجلاش
رقايق السنبوسه
خبز الملوح اليمني
الخبز اللي بيعملوا منه ساندوتشات الشاورما في المطاعم
الرقايق الخاصه بالمطبق
البرك العراقي

المقادير
3 كوب دقيق
كوب وربع ماء دافي
ملعقه صغيره ملح او حسب الرغبه

تعجن العجينه جيدا ونستمر في العجن لمده 10 دقايق واذا في عجانه يكون اريح
تترك لتترتاح ربع ساعه
تقسم العجينه الى احجام متساويه او حسب الشغل اللي راح
تستخدميها فيه مثلا دوير صغيره بحجم حبة اليمون اذا كان مطبق
دواير كبيره للفطير المشلتت بحجم حبة البرتقاله الكبيره
او حسب حجم الصاج او مقلى التيفال اللي عندك اذا كان صغير
صغري حجم العجين وهكذا
بعد ما كورناها نحطها في اناء بلاستك عميق ونرصها عادي لو تزاحمت مع بعض
نصب عليها زيت حتى يغمرها بس طبعا راح تحتاجي تقريبا لنص كوب


تغطى بكيس بلاستك كويس وتترك ترتاح لفتره غير محدوده

ممكن ساعه ممكن 2 ممكن 3 ساعات خارج الثلاجه
وممكن يوم داخل الثلاجه


ماراح يصير للعجين اي شي لانه مغمور بالزيت

من العجينه هذا راح نعمل رقائق السمبوسه و خبز ملوح وفطير مشلتت ورقائق جلاش ومطبق وبراثا هندي

رقائق السمبوسه



المقادير
عجينة الرقاق

الطريقه
نجهز العجين
نجيب صينيه واسعه او مقلى تيفال او صاج او اي شي عندك ممكن يستخدم حتى لو صينية الفرن الكبيره
انا هنا استخدمت الصينيه الكبيره (التبسي )اللي بنحط فيها الاكل وعارفه انها متوفره في كل بيت وكمان ميزتها انها تسخن بسرعه

نفرد العجينه على رخام نضيف نمسح الرخام بنفس الزيت او السمن المستخدم في غمرالعجين
في كذا طريقه لوضع العجين المفروده على الصاج

الطريقه الاولى وهي الاسهل واللي انصحكم فيها
انك تفردي العجين عادي بدون رق زياده

بعدين ترفعي العجينه وتحطيها على الصاج من غير ما تولعي النار
لما تحطيها على الصاج حطيها من الطرف الاول واسحبي وانت تنزلي الطرف الثاني على الصاج حتى تنمط معك كمان
وتكملي فرد العجينه وهي على الصاج
فرد العجينه يكون بالضغط على الاطراف بشويش مثل كانك بتهمزي
لا تبالغي برق العجينه
تولعي النار وتشديها على الاخر تحطي الصاج على النار
تحركي الصاج بحيث الحراره توصل الى الاطراف
وبسرعه اقلبي العجينه بمجرد مالونها يصفر واطفي النار اضغطي بيدك على الاجزاء اللي مازالت لونها ابيض (والنار مطفيه )حتى تتختفي وتصير كلها صفراء
طبقيها (مهمه هذي الخطوه لانها تحافظ على الرقاق انه ما ينشف اثناء رفعه )


افتحيها وحطيها في صينيه فرن مستطيله وغطيها بسفره بلاستك


خذي قطعه ثانيه من العجين افرديها وحطيها في الصاج ولعي النار عدي لحد الخمسه وطفي النار(لان الصاج بيكون لسه حار فبيسخن اسرع من اول ) تكون استوت اقلبيها بسرعه طبقيها ارفيعيها وافتحيها مره ثانيه وافرديها فوق الرقاقه الاولى غطيها وهكذاااااااااااا حتى تخلصي العجين كله


الطريقه الثانيه
هي انك تفردي العجين وتخلي الصاج يسخن كويس تتطفي النار وتحطي الرقاقه
وثواني او ما تصفر كلها اقلبها بسرعه طبقيها ارفعيها افرديها في صينيه
وغطيها

الطريقه الثالثه
هوانك تولعي النار على الصاج واول ما تحطي الرقاقه في نفس اللحظه تتطفي النار تضغطي عليها حتى تصير كلها لونها اصفر تقلبيها وتطبقيها
وترصيها في صحن مسطيل له حواف وتغطيها بسفره بلاستك وهكذااا حتى تخلص الكميه

ملاحضه مهمه

في كل الحالات الوقت اللازم لسوى العجينه ما ياخذ اكثر من 10الى 15 ثانيه بالتمام


ــــــــــــــــــــــــــــــــــــــــــــــــــــــــــــــــــ