آه كلاكيت المره المليون

آه كلاكيت المره المليون اطفال انابيب
نفس الظروف كل مره ادويه و حقن و علاج و دكتور و متابعه تبويض و نصائح الزمى السرير بلاش خروج كتير بلاش حركه عنيفه و صلاه و قرآن و دعاء و يوم العمليه رهبه و قلق و نفس الكلام كل مره الدكتور يقول ***** الله توأم و تروحى البيت كلك آمال عريضه و احلام انك حيكون عندك طفل و نصائح الام ماتفكريش فى الموضوع و انتى تقاومى الموضوع كل ما يجى فى دماغك تحاولى تنسيه و جوزك يكون ظريف و يجيبلك اكل من بره كل يوم و انتى بقى تسهرى تصلى و تدعى و تحسى كل مره انه خلاص اتفتح باب الرزق و الانتظار صعب و يعدى الاسبوع الاول و انتى متماسكه وعامله نفسك ولا همك و جوزك اليعنى مش بيفكر و انت عارفه انه يمكن بيفكر اكتر منك و تيجى على الاسبوع التانى مش قادره اعصابك تخرب و نفسك الوقت يعدى بسرعه و يعدى الوقت و ياريته ماعدى و يجى اليوم اللى كنت فاكره الناس كلها حاتباركلك فيه و يروح جوزك يجيب النتيجه و التييجه ........؟؟؟؟؟

النتيجه كالعاده سلبيه
انهيار كالعاده انهيار تام كأنك وقعتى فى بير و تبقى مخنوقه مخنوقه اوى و تبكى و تبكى و تبكى بكاء مر جدا جدا و جوزك حزين و انتى حزينه مش معترضه و لله الحمد على كل شئ بس حزينه حزن كبرتى فيه 100 سنه و يعدوا يومين صعبين مش عارفه تاكلى و لا تشربى و مش عارفه تتكلمى تقولى لجوزك ايه و مش عارفه تضحكى و بعد ما حلمت الحلم طلع وهم

قصه ممله اتكررت كتير كانك بتصحى كل يوم من النوم تلاقى نفسك لسه فى نفس اليوم اليوم مش بيعدى بنفس الاحداث و التفاصيل هيه هيه كل مره نفسك تصحى تلاقى نفسك فى يوم تانى يوم جديد مشرق كله نجاح و اطفال و حياه حلوه

يارب لك الحمد كما ينبغى لجلال وجهك و عظيم سلطانك
يارب ازا كنت مبتلينى علشان بتحب تسمع صوتى فيارب ساعدنى على الدعاء ساعدنى ان صوتى مش يتخنق ساعدنى انى ادعوك اكتر و اكتر
ويارب ازا كنت مبتلينى بتعاقبنى على زنب ارتكبته فيارب سامحنى و اغفرلى زنوبى فانك انت الغفار

يارب ارحم ضعف عبده فقيره بقالها سنين واقفه ببابك بتتسول و بتشحت عند بابك يا ملك الملوك انك تنعم عليها بعطاياك يارب عطشانه و نفسى اشبع من رزقك و رحمتك يا اكرم الاكرمين

يارب اللهم اجرنى فى مصيبتى و اخلفنى خيرا منها