يوم ولادتي .......

السلام عليكن و رحمة الله و بركاته:.

مرحبا بنات عفوا مدامات و أمهات ، و اللي ولدت مبروك و اللي لسى الله يهون عليها يارب...
أكيد تتذكروني أنا و كرشتي أيام رمضان و العيد غثيتكم أكيد...

طبعا ولدت و الحمدلله لي أكثر من شهر و جبت بنوته حلوة سميتها غلا ،،،

و اليوم حابه أحكي لكم تفاصيل يوم ولادتي اللي أدعو ربي أنه و لا وحده منكن تمر بيوم مثله ...
البداية أني خلصت شهري التاسع في 9/ 10 و كان عندي موعد تخطيط نبض الجنين في 10/10 و ذاك اليوم ترددت كثير قبل ما أروح ، و بعدين توكلت على الله و قلت أروح و خلاص ما عادني رياحة لهم الا لما أحس بالولادة ...

طبعا كانوا عيالي في المدرسة و كان يوم أربعاء فرحت و سويت التخطيط ، و لما خلصت جاتني الدكتورة حقتي و قالت لي أنه التخطيط يوضح انه نبض الجنين و حركته غير متناسبين ( لا تسألوني وش لون لاني ما أعرف ) المهم قالت لازم أعطيك طلق صناعي ، انا هنا بدأت عندي النفاضه و قلت في نفسي الحين انا منحاشه عنك كم أسبوع أبغاك تنسين ، تجين الحين و تقولين طلق صناعي ، فقلت لها: لازم ، قالت: ايه لازم .. قلت طيب خليني أروح للبيت و بعدين أرجع لك المغرب.. ( ناوية النحشة ) قالت لا ما ينفع ( خابزتني ) لازم الحين أعطيك طلق صناعي نادي على زوجك ، فناديت زوجي و انا حالتي حاله بس أبرطم و شوي أشاهق...

شرحت الدكتورة لزوجي و انا أطلعها وودي أخنقها يعني ناويتني و لا مجال للهرب ، المهم زوجي طالعني ( راحمني ) و قال هاه قلت وش هاه الشكوى لله نأخذ طلق صناعي ،، و بدأت الاجراءات لاعطاء ذالك الطلق الصناعي وقبل دخل علي زوجي و قال أجلس أنتظرك و الا أروح ( ضعيف يحسب انها دعسه بريك ) قلت لا لا تنتظر أرجع البيت و انا لما أخلص أتصل فيك ( جاتك الضعيفه الثانية تحسبها حمسة بصل و تخلص ، وش أسوي قالوا الصناعي بسرعة تخلصين ) راح زوجي و تركني لحالي عاد انا دقتني الشرهه ليش يروح و يخليني ( خبلة و انا اللي قلت له رح ) ، المهم أعطتني الصناعي و انتم تقولون أبرة أو تحميلة لا ما عاده على خبركم صار جل تطوروا...

المهم حطت لي الصناعي ، و اهي كم دقيقة و بدأت النيران تشتعل في البداية عود كبريت قلت يحليه الطلق الصناعي و يقولون يعور ( مع تحفظ فأنا لا أثق في الطلوق أبدا سواء طبيعية أو صناعية ) ، وهو انا قلتها و الا ما قلتها بدات النيران تكبر الى ان صارت نيران غابات ( أمحق تشبيه ) قلت ياويل قلبك يا....... شكلك بتروحين فيها ، فطلبت من الممرضة اني أمشي ، فساعدتني أنزل و صرت أمشي الى ان جاءت الدكتورة المناوبة و كشفت علي و قالت مفتوح 3 سم الممرضات هيصوا و فرحوا ، و لما خلصوا قلت بس 3 قالت وحده منهم انتي توك ربع ساعة و فتح 3 كويس ،، بس أنا برطمت ( كان ودها تذبحني ) و أستمريت أمشي الى ان أشتدت الالام و ما عاد أقدر أمشي فكشفت علي و قالت 6سم يا الله بوديك على غرفة الولادة وودوني و أتصلوا على دكتورتي كانت الساعة 3 العصر و انا داخله عندم الساعة 9 الصبح و اعطتني الطلق الساعة 11 ، و أثناء الانتظار أنفتحت المويه فقالت لي الدكتورة لا تدفعين اذا حسيت بطلق بس خذي نفس ، الى ان جاءت دكتورتي و كشفت علي لقته 7 سم و انا ميته برد و الم ، و حاطين لي أكسجين لاني كنت منكتمة و مزكمة ( شفتوا الحظ ) و بعد لحظات البرد أشتد و الالم باق جد ، و هي تقول لي لا تدفعين توك خذي نفس ، توه 7و نص قلت يارب وهذا بالقطاره يفتح ، قلت لها ما أقدر لازم أدفع الم فظيع فأعطتني الممرضة هذا الكمامة السوداء ( ما أدري وش أسمها ) بس فيها مخدر و انا أتعلق فيها أول ما أخذتها أحس ان الممرضات يمشون في الهواء و ما أسمع منهم الا همهمه كانهم يتكلمون في برميل ، الا تسحبه مني وهي تقول خلصت الطلقة خلاص و أنتظر شوي و تكشف بس 8 سم ، ثم 9سم ثم 9 ونص كل هاذ بين ألم و تعذيب من خش و كشف الى ان تكرم و فتح 10 سم و بدات عاد الصرخات أدفعي أدفعي ، بقوة بقوة ، تبدأ مع الطلق و تنتهي لما ينتهي و انا أغمض عيوني و كل ما فتحت أشوف لي ممرضة جديدة أو دكتورة جديدة الى ان أجتمع في الغرفة ثلاث دكتورات غير دكتورتي من بينهم استشارية ، و انا طول الوقت أهاوش دكتورتي وهي تهاوشني ( حشا جارات ) على الساعة أربع و نصف ما عاد فيني حيل و يأست من الولادة فقلت لها ولديني قيصري ما عاد أقدر ، بس هي ما رضت قالت لا بحاول معك طبيعي و ان شاء الله بتولدين طبيعي لازم تأخذين فرصتك كامله ،، عاد انا خلاص يأست مرة و سلمت أمري لربي و خليتهم يسون فيني اللي يبغون بس لم يقولون أدفعي أدفع و اذا قالوا لا تدفعين تنفس أتنفس ، بس بدون فايدة الرأس مهوب راضي ينزل في الحوض ( مع انه من الشهر السابع كان نازل الى يوم الولادة ما أدري وش اللي رفعه ) الى الساعة 5 و نصف يأسوا مني أفطروا ( كانوا كلهم صايمين ) و بدوأ تحضيري للقيصرية ، ما تتصورون فرحتي و طول الوقت و انا أقول لها عطيني مخدر الحين وهي تقول حاضر ياماما بريحك الحين بعطيك مخدر ، و انا الطلوق ورى بعض ماني قادرة اتحمل الوجع ، و الحمدلله جاء طبيب التخدير و أعطاني كمامة المخدر و قال خذي نفس الا انا في دنيا ثانية ....

و بعد لحظات ( حسبتها لحظات أتاريني جلست أربع ساعات ) أفتح عيوني الا هم يدفون سريري و يدخلون غرفة ثانية و زوجي جنبي وهو يتكلم ما أدري وش يقول ؟؟ و انا أهذر فأرتع مني يقول كنتي صفراء مرة و عيونك تتقلب ، فنادي الممرضة قالت له توها ما صحت من البنج ، جلس عندي شوي صحيت من البنج ، و بعدين جلس يتكلم معي و يتحمد لي بالسلامة ، و فجاة جاءتني نفضة برد فجابت لي الممرضة بطانية ثقيلة و حطتها فوقي ...

و جلس زوجي يكلم أهله و أهلي و يبشرهم اني ولدت ( مع العلم انه ما فيه أحد كان يدري اني رايحة أولد حتى أنا خخخخخخخخ ) كنت منبهة على زوجي انه ما يقول لأحد حتى أخلص و اذا سألوا عني يقول موعد تخطيط وهم متعودين علي أتأخر في مواعيدي فما أستنكروا حاجة ، وولادتي كانت مفأجاة للجميع خاصة لما يعرفون انها قيصري...



هاه شفتوا كيف كانت ولادتي ، يالله جعلها آجر و عافية ( انقلبت عجيز ) جربت الصناعي و الولادة الطبيعية و القيصرية في يوم واحد ( أحد مثلي ) علشان كذا ما أتمنى لكن مثل هاليوم...و الله ما تحسف الا على ذاك المشي اللي مشيته الى ان ورمت رجولي...


كانت ولادتي في مستشفى السعودي الالماني الدكتورات و الممرضات قمة في الطيبة و المساعدة ، و الغرف حلوة و نظيفة و انا أخترت غرفة مشتركة مع وحدة ثانية ( أخاف أجلس لحالي ) بس الله يوريكم و لا ليلة نمت زين كلها كوابيس غرفة الولادة ...

وجت عروستي الحلوة غلا الله يخليها لنا....

و الله يعينكم علي و على أسئلتي بصير ضيفة عندكم ياأهل القيصرية تدرون غشيمة و ما أعرف حاجة بس بعدين لاني تعبت الحين....و بعد بعسكر في منتدى الطفل خبركم من زمان عن الاطفال...

و الحين أستودعكم الله...