السلآم ع ـليكم ورحمة الله وبركاته ~
كيفكم ياحلوين
طبعاً موضوعي من تجربه شخصيه
واتمنى يفيد كل بنوته نحيفه
واول شي اقول لها .. لاتستسلمي ابدا
ولاتقولي انا حاولت ومافادني شي
اتوقع انا اكثر انسانه جربت اشياء
تعبت ويئست كثير وكرهت حالي
بس مافيه شي صعب وكل شي له حل
طبعاً في البدايه راح احكي لكم معاناتي
انا من 10 سنوات وانا ادور شي يسمن
ماخليت شي الا وجربته
حبوب الخميره جلست عليها شهور .. وبدون فايده
حبوب كبد الحوت .. موسيقور .. حبوب سبروفيتا
حلبه .. زبيب .. خلطات اشكال وانواع
فيتامينات من كل الانواع .. وكمان بدون فايده
ازيد كيلو او نصف كيلو وبعدها باسبوع انزل
ولاكأني سويت شي
ماافادني شي ابدااااا :(
قالوا لي ناس سوي تحاليل اكيد عندك شي
رحت لمستوصف وسويت تحاليل شامله
للدم والغده والسكر والديدان
وكل شي تمام عندي
واللي مجنني زياده ان اكلي حلو وشهيتي مفتوحه ماشاء الله
يعني مو نقص في الاكل او الشهيه
طبعا وزني 43 مقارنه بطولي يعتبر هزاااال مو نحافه وبس
اخذت خلطه عباره عن عسل ومكسرات
واستمريت تقريبا 3 شهور وبالنهايه زدت بس 2 كيلو
انا تعقدت من حالي
مافيه لبس يضبط ولاشي يناسبني
ملامحي الكل يقول حلوه وجذابه بس لو تسمني تطلعي احلى :(
قررت اروح لاخصائية تغذيه قلت اجرب اخر محاوله
رحت لها مجرد كلام عادي واعطتني انظمه امشي عليها
طبعا انا يئست لاني اعرف نفسي مااحب انتظم على شي
بس قالت لي نقطه مهمه تقول " كُلي بكل وقت حتى لو شبعانه اغصبي نفسك
حاولي تاكلين اي شي "
قلت خليني اجرب ماراح اخسر شي
* اول شي شريت حليب انشور من الصيدليه عشان ادخله بنظامي
بدأت النظام بتاريخ 24 / 5 .. ووزني وقتها 45
فطوري عباره عن توست محشي تونه + زيتون اسود شرايح + مايونيز
واحشي فيهم التوست مع كاس حليب
وبعدها اروح للدوام وبعدها بساعه افطر ثاني
بطاطس مقلي او سندويش مع عصير
وبعدها كمان بـ شوي اكل سنكرس او اي شوكلت
الغداء ارجع واتغدا كويس
العصريه لازم قهوه وشوكلت او عصير وفشار ومكسرات
بعد المغرب كمان لازم آكل
واتعشا كويس
وقبل انام اسوي كوب من انشور واشربه
المهم كنت آكل بكل وقت حتى لو شبعانه
وكمان بعض الايام كنت اخذ خلطه لوحده من الاخوات ذكرتها هنا بالمنتدى
بس والله ناسيه اسمها ربي يجزاها خير ويسعدها وين ماراحت
عباره عن تمر معجون في الطاوه مع زيت ونضيف علبة طحينيه ومكسرات ولوز مطحون وجوز هند
تعجن على نار هادئه وتوضع بعلبه وكل مره تاخذين منها ملعقتين
طبعا انا ماتحملت اكلها ثقيله شوي
صرت اسوي كوب حليب واذوب ملعقه من التمر فيه ولما يصير دافي اشربه
بهالفتره ماشفت وزني ابداً .. ماحبيت اشوفه عشان يمكن مايفيد النظام واتحطم
استمريت على هالنظام شهر كامل اول اسبوع تعبت شوي عشان ماتعودت
بس بعدين عادي تعودت
وبتاريخ 29 / 6 شفت وزني
وكانت المفاجأه
52
انصددددددددددددددمت
ماتوقعت ابدااااااا .. جسمي من النوع اللي مايتاثر بسرعه ولايفيده شي
وتوقعت لو بأزيد راح ازيد 2 او 3 كيلو
بس 7 كيلو ابدا ماكنت احلم فيها
ياااااارب لك الحمد
الكل لاحظ علي متغيره وصارت اغلب ملابسي ماتدخل فيني
وللامانه وجهي ماتاثر كثير لاني بالاساس نحفاااااااانه بقوه
يعني كويس امتلا جسمي شوي
طبعا انا المفروض 60
بس كويس وصلت لهالوزن
وبعدها مااستمريت عالنظام انشغلت وجاتني شوي ظروف نفسيه .. بس الحمد لله الى الحين ثابت ومانزل
وقريبا ان شاء الله راح اعيده ثاني حتى اوصل لـ 60 بإذن الله
اتمنى اكون افدتكم لو بـشي بسيط واي سؤال انا بالخدمه
وماابي غير دعواتكم الصادقه لي ..
الله يحققلك اللي ببالك..
^^