السلام عليكم و رحمة الله و بركاته
كيف الحال أخواتي الحبيبات ,, عساكن بخير ؟
قال الرسول صلى الله عليه و سلم :
( كلكم راع وكلكم مسئول عن رعيته،
فالإمام راع ومسئول عن رعيته،
والرجل راع في أهل بيته ومسئول عن رعيته،
والمرأة راعية في بيت زوجها ومسئولة عن رعيتها،
والخادم راع في مال سيده ومسئول عن رعيته، وكلكم راع ومسئول عن رعيته )
أنـا بصراحة حابة أوجّه عتاب شديد جدًا لكثير من الأمّهات و الآباء على التسيّب و الإهمال الحاصل في حق عيالهم ..
أنـا كنت مُستخدمة سابقة ( للجوال آللي يسمونه بلاك بيري ) و إن جيتوا للصدق هذا بلاء بيري مهوب بلاك بيري !!
و السبب ؟ هو سوء استخدامه من قبل عيالنا و بناتنا ,,
قبل لا أتطرّق للبلاوي آللي شفتها ,,
أنـا حابة أسأل سؤال ,, لكل أم و كل أب ,, شرآ هالجوّال لـ ولدهـ أو بنته :
أنت تشوف جوال ولدك أو بنتك ؟ يعني تفتش فيه ما بين فترة و فترة ؟
و إلا شريته لولدك أو لبنتك و ( بس ) من دون لا تكون فيه أدنى رقابة عليه ؟
أشك بصراحة إن فيه رقابة على جوّالات عيالنا !!!
و إلا ما كنـا شفنا هالإنحطاط آللي صاير !!
أخواتي الغاليــات ,, أمهاتنا العزيزات ,, أجزم ( و بملئ الفاهـ )
لو كل أم و كل أب فتّشوا بجوالات عيالهم ,, و شافوا البرود كاستات و الصور و البلاوي ..
كان الحين هالجوّال انقرض من زماااااان ..
و صار بضاعة كاسدة بـ كبود التجّار , و انعدم الإقبال على شراءهـ
لأن محد راح يشتريـه و لا أحد راح يرضى أصلاً إن عياله يمسكون هالجوّال !!!
/
لكن مع الأسف الرّقابة معدومة ,, معدومة جدًا !
أنـا كان عندي هالجوّال ,, و فعّلت الخدمة مرة وحدة بس ,, وشفت البلاااوي !!
ضفت قريباتي و صديقات لي ,, و بنات أعرفهن من بعيد لبعيد !
و أضفت بنات من جنسيات ( مختلفة ) من الكويت و عمان و من ديرتي السعودية .. هالكلام منذ مبطي
لأني خلاص بعت الجوّال ,,
لكن يا بنات ,, صار جوّالي قليل حياااااء بمعنى الكلمة !
هي برود كاستات هابطة ,, هي صور رمزية فاحشة ,, هي مقاطع موسيقية ,, أغاني !!
بالله عليكم أيش هذا ؟
قسمًا بالله حسيت إنّي استأثمت لمّا شريت الجهاز و فعّلت الخدمة !
بنات أعمارهن عى 13 و 14 أو يمكن فوق العشرين ,,
يرسلن أشعار غرام و حب و محبوبي و قلة أدب ؟
و صور حظن و نساء عاريات و رجل يكاد أن يُقبل إمرأة .. و غيرهـ و غيرهـ ؟
هل هذي تصرفات تصدر من إنسانة ( يُقال عنها مسلمة ) ؟
يا حبايب قلبي لأن المسلمة ( عفيفة ) !! حيية !! تستحي خلووووقة !!
بس البرود كاستات آللي ينشرونها تبرهن على غير كذا !! البرود كاستات آللي يرسلونها تنسف العفّة بأكملها !!
برود كاستات و صور تخدش الحياء بل تقضي عليه !!
ذولا وين أهاليهم عنهم ؟
يا آباء و يا أمّهات وينكم عن عيالكم ؟
رسايل قمة بالإنحطاط يتم نشرها و تداولها ,, وينكم عن عيالكم ؟؟ وينكم ؟؟
ياخي حتّى لو كان ولدك محترم و متربي ,, و حتّى لو كانت بنتك محترمة و متربية
البلا بالبرود كاستات آللي تآصلها ,, البلا بالرّمزيات آللي يحطونها الناس آللي ضايفتهم بجهازها !!
لا تسل عن المرء و سل عن .. فكلّ قرينٍ بالمُقارن يقتدي !!
ستتأثر ابنتك بهذهـ الرسائل !!
سيتأثر ابنك بهذهـ الصّور !!
إن لم تضعوا حدًا لهذهـ المهزلة ستفقدون أبناءكم من درب الصلاح !!
قسمًا بالله صدمتي كبيرة جدًا ,,
يعني وش تبون أقول ( ناس أخلاقهم منحلة ) ؟
لأن والله آللي أخلاقه عالية يقشعر بدنه من هالكلام و هالصور !! فكيف بإرسالها و نشرها ؟
ناس ما همها إلا الحب و الغرام و العشق و قلة الحيــا ,, أيش هذا ؟
ناس مو شغلتها غير تحريك الغرائز و إثارة الشهوات و فتنة الناس !! ,, ما تخافون من الله ؟
ما تخافون من الله أنتم ؟ ما تخافون من عذابه و عقابـه ؟
ألا فتبًا للإنحلال و سُحقًا لأهله !!
يقول المولى تبارك و تعالى :
- و اسمع يا من هانت عليك نظرة الله .. و استخففت بشأن المعصية -
{ إنَّ الَّذِينَ فَتَنُوا الْمُؤْمِنِينَ وَالْمُؤْمِنَاتِ ثُمَّ لَمْ يَتُوبُوا فَلَهُمْ عَذَابُ جَهَنَّمَ وَلَهُمْ عَذَابُ الْحَرِيقِ }
وينكم عن عيالكم ؟ و إلا خلّفتوهم و نسيتوهم ؟
أنـا أبي الحين و بهاللحظة :
كل أم و كل أب يآخذ جوال بنته و إلا ولدهـ و يفتش فيه و يقرآ المحادثات !!
و الرسايل آللي تاصل لولدهـ أو بنته !!
و يشيّك على الرمزيات آلي يحطّونها الناس المُضافين على الجهاز !!
و عقبها انصدموا مثل ما انصدمت !!
لحد يقول هذا تدخل بالخصوصيّات !! ما فيه خصوصيات بهالأمور !
أنت يا الأب و أنتِ يا الأم في موقف ( المُربي ) والله ستُسأل عن أبناءك !!
والله أنتم مُحاسبون على ضياعهم طالما أنّ لكم في الضياع يدًا !!
و يكفينا حديث الرسول صلى الله عليه و سلم آللي ذكرناهـ في أوّل الموضوع ..
الغريب العجيب والله يا أخواتي ,, أننا نشرّع لأبناءنا أبواب الفساد و الإنحلال و نفسح لهم المجال في ذلك
ثم بعدين نتضايق و نبكي ليه عيالنا انحرفوا ,, ليـه عيالنا ما صاورا صالحين مصلحين !!
نخليهم على الإنترنت بلحالهم ,, يتصفحون المواقع و المنتديات و يسهرون الليالي ,, ( من دون رقابة )
و إذا شفنا ولدنا يكلم بنت ,, و إلا بنتنا تكلم ولد ,, عصبنا و بكينا !!
طيب مو أنتم السبب ؟ ما فعّلتم مبدأ الرقابـة !! وش تبونهم يصيرون أجل ؟
تاركين عيالكم بهالأجهزة من دون رقابة .. و لا توجيــه ,, مخلينهم يسرحون و يمرحون ,, حتّى تتلقّفهم شياطين الإنس و الجن !
ثم بعد ذلك نعجب من انحرافهم ؟
أنـا ما أقول كل من شرآ هالجهاز صار منحرف !! لا و العياذ بالله ,,
و لا أقول إن هالجوّال سيء بالمرّة .. لأنوهـ أولاً و أخيرًا هو سلاح ذو حدّين و يعتمد على الشخص آللي يستخدمه
و مثل ما فيه ناس تستخدمه للتفاهات ,, فيه ناس تستخدمه في الدّعوة و لله الحمد و المنّة ..
لكن المُلاحظ - و الله أعلم و أجل - إنّ الغالبية السّاحقة تُسيء استخدامه بسبب ضعف الوازع الديني
و انعدام الرقابة من قِبل ذات المُستخدم و من قبل الوالدين !
شريتِ لعيالك بلاك بيري ؟
طيب ما قلنا شي بس إذا بتشترينه عشان يصير ( بلاء بيري ) ؟
بتشترينه لهم و تتركين الحبل على الغارب ؟
لا رقابــة و لا مُتابعة و لا تفتيش بالجهاز ؟ فـ أقول لك لا تشترينه أحسن !!
لا تعرّضين نفسك لمسائلة عظيمة من قبل المولى جلّ جلاله !!
أنـا أدعوك أيّها الأب و أيتها الأم أن تتّقيا الله حقّ تُقاته !!
أنتم ما خلّفتوا عيالكم للكشخة و الوناسة !!
عيالكم مسؤوليــة عظيمة و حمل كبير !
يا تربّونهم أحسن تربية ( و تكونون قدها ) ؟ يا بلاها !!
لأن المجتمع مهوب بحاجة إلى عالة عليه تمشي في الفتنة و الفساد بين الناس !!
يوم أن سُئل أمير المؤمنين عمرًا بن الخطّاب رضي الله عنه عن حق الإبن على أباهـ
أجاب رضي الله و أرضاهـ - من ضمن كلامه - أنّ حق الإبن على الأب أن يُحفظه القرآن ,,
يا عمر ,, يا شامةً في جبين العدل ,,
,, أين أنت لترانا يوم أن ضيّعنا الأمانة و صار أمرها فُرُطًا المايك الكم_
انشروا الموضوع ..
بارك الله فيكم --منقول اللفائده دعواتكم لي بالتوفيق وبصلاح اولادي:27:
ياويل قلبي والحين ياكلم اخواني انهم مايفعلوا الخدمه والله يهديهم