السلام عليكم ورحمة الله وبركاته
كيف حالكم بنااااات
من زمان مانزلت موضوع بسبب إني كنت أنقل من بيتي ومحتاسة حوسة مالها أول من آخر وانا ماعندي شغالة ولا يحزنون والحمدلله نقلت والأوضاع لسا ماترتبت بس قلت أنزل موضوع من باب التغيير ..
اليوم قررت انزل موضوع بهذا القسم مع ان كثير بنات ينتظروني اكمل باقي موضوع الشعر وموضوع البشره وشوية مشتريات انصحكم فيها وكالعادة بالصور والأسعار .. لكن معليش يابنات المواضيع هذي طويله ويبغالها تصوير وشغلانه اوعدكم انزلها قريب..
وشكرا لكل البنات اللي يستشيروني ويرسلولي بالخاص واعتذر من اللي لسا مارديت عليهم والله مرات اسجل دخول بس عشان اقرا الرسائل وبعضها يبغالها رد طويل واقول بعدين .. اعذروني بنات :(
اليوم موضوعي يمكن الأغلب مايفكر فيه او ممكن تسويه مره وتهمليه باقي السنه .. وانا أتمنى انها تكون عادة عند كل المتزوجات
صدقوني يابنات اهتمامك بنفسك ينعكس على شخصيتك وثقتك بنفسك بشكل كبير راح اتكلم معاكم بصراحه
أغلب الرجال بيشوفو أشياء سواء بالتلفزيون بالنت أفلام استقرام واتساب الخ وانتو فاهمين قصدي بكلمة أشياء
كم مره شفتي صور بنات بلبس خليع بجوال زوجك ؟ كم مره جات لقطة كذا وكذا بالتلفزيون وهو يتفرج الفيلم وحسيتي بغيره سواء من مذيعة فنانه ايا كان
بغض النظر ان التلفزيون حرام وكل هذي الاشياء حرام وغض البصر واجب ولكن التكنولوجيا محيطه بنا من كل مكان وأغلبنا لما تجي وحده بيضا وممشوقة القوام او حتى سمرا ومليانه بس شكلها مغري ويكون زوجها يتفرج بتغار عليه
الغيره هذا شي طبيعي ومافي بنت ماتغار على زوجها بس صدقيني انا كنت اموت غيره افحط لدرجة ابكي واكره نفسي بشكل مو طبيعي في بداية زواجي ولما سافرت مع زوجي برا وشفت البنات عيوني طلعت كان نفسي امشي بساطور عشان اقطعهم كلهم تقطيع وكنت انكد على زوجي واطفشه ونتخاصم وحالتنا حاله ليه ؟
انا بصراحة ماكنت واثقه من نفسي كنت صغيره 19 سنه ولا اعرف الحركات هذي لا امي علمتني ولا يحزنون
لغاية ماصرت اتعلم شويه شويه والله ان ثقتي بنفسي زادت بشكل كبير جدا ماقول لكم ما اغار لازم تفهمو ان مافي انمسانه ماتغار على زوجها حتى لو كانت ماتطيقه لكن تقدرو تقولو ماصرت اهتم يعني زوجي لو شاف وحده لابسه قصير طز مايهم انا البس اقصر من القصير
لو شاف وحده بفيلم او مقطع او او او تسوي شي مايهم انا مو مخليه على قلبي شي الا لو اخترعو حركات من ورايا ماعرفها الله اعلم
سامحوني بنات بس انا قلت بتكلم بصراحه
فكري فيها اذا انتي مهتمه بنفسك وبجسمك وريحتك حلوه وجسمك مافيه شعر زايد ولبسك نعوم وانتي في البيت ولما تجي ساعة الصفر ( اكيد فهمتوني ) تكوني اكشخ مايكون وريحتك تدوخ وتسوي لزوجك كل اللي يبغاه
بعد هذا كله تتوقعي يطالع برا ؟
تتوقعي انك كل ماشفتي وحده تموتي غيره ؟.
انا معاكم ان الرجال بطبعهم عيونهم يبغالها زرادية وتطلعيها من مكانها وتحطيها بالثلاجه لين يرجع البيت ويقعد معك ترجعي له عيونه مكانها
لكن صدقيني لو سويتي كذا حتى زوجك كل مابيشوف شي بيقول بداخله ايوا هيا سوت لي الحركه هذي ايوا هيا لبست لي اللبس هذا عيونه بتصير شبعانه ومتعود عالاشياء هذي مو محروم
رجاء بنات لاتجي وحده تقولي زوجي مايستاهل وزوجي وزوجي .. طيب انتو اقعدو قولو كذا وانتو اللي بيوتكم بتنخرب ياحبيبتي انتي سوي كذا عشان نفسك وثقتك بنفسك اولا وبعد كذا ان مانفع معاه انتي عداك العيب والله راضي عنك وانتي راضيه عن نفسك
وبعدين بذمتكم بيني وبينكم زوجك مايستاهل تدلعيه ؟ حتى لو اختلفتو بوجهات النظر حتى لو كنتو تتخاصمو حتى لو كان بخيل البنت بيدها تغير كل شي بزوجها والله يابنات عن تجربه هذا الكلام
عاد لو احنا قاعدين سوا كان حكيتكم كل شي بالتفصيل تعرفو كلام الحريم مايخلص لكن انا حبيت أبدا موضوعي بهذا الكلام من باب رفع الهمه والمعنويات
واللي مايعجبها كلامي تتجاهله انا ما أفرض رأيي عليكم انا اتكلم عن تجربة 13 سنة وكيف تغير زوجي معايا تغيير جذري والحمد لله بسبب اهتمامي فيه
ياشيخه اصلا عيالك نفسيتهم تتغير لما يشوفوكي انتي وابوهم تمزحو وتضحكو ومبسوطين وولما يخرج الصباح هوا وعيالهم تبوسيهم كلهم ولما يشوفوك وانتي تسوي لابوهم ماسكات بوجهه وتفسخي له جزمته لما يرجع من الدوام و و و اشياء كثير تخلي عيالك يكبرو على حبك وحب ابوهم وصدقيني كل هذا بيأثر عليهم بحياتهم بعدين
المهم بنات سامحوني انا كثرت كلام نبدأ بسم الله
اليوم بحط لكم اشياء مفروض تكون عند كل متزوجه . يامتزوجات الله يرضى عليكم ارمو صابون لوكس وكامي من الحمام ترى والله انه ماينظف ويسود الجسم وينشف البشره هذا الصابون ترى مو طيب للبشره ابدا استبدلوه بالصابون السائل المخصص للجسم الشور جل
اليوم المنتجات هذي ماهي منتجات تستخدم عادة يعني تستخدميها لما تحسي ان ساعة الصفر قربت او تكوني ماعندك الدوره اكرمكم الله خلي منتجات العناية بالبشره وقت الدوره او يوم ويوم زي كذا
اولا : لما تاخذي دش انصحك وبشده تستخدمي هذا الشور جل والله يابنات فرق بين الترويش بالصابون العادي والشور جل ياشيخه لو حتى ماحطيتي عطر ريحة جسمك حلوه بدون شي وانا جربت شور جل كثير وفيه واحد حطيته لكم قبل كذا بالفراوله ممتاز واليوم بحط لكم شور جل حق باث اند بودي ووركس كبير ويطول معاك بالحمام وريحته تهبل ورخيص ب 45 ريال بس وهذي صورته
ثاني شي اعيد واكرر كل مره لازم يكون عندك غسول خاص بالمنطقه الحميمه ( غسول خارجي ) المنطقه هذيك ماتتغسل بشور جل والا صابون عادي لها غسول خاص وارجوكم ابعدو عن الغسول الداخلي او الدش المهبلي لانه يسبب التهابات
عارفين انا دايما اراجع المستشفى من سنوات بسبب الالتهابات ودايما يعطوني ادويه ويعطو زوجي ادويه ولكن والله يابنات من وقت مابديت استخدم للمنطقه غسول خارجي والله ماعاد عرفت للالتهابات طريق ابدااااااا الحمد لله
هذا الغسول ضروري وحطي تحتها 66 خط لازم يكون بحمامك اهيمته زي اهمية الشامبو حق شعرك ومعجون اسنانك واكثر لاتخليه يخلص الا وانتي جايبه واحد جديد اولا نظافه مالها حدود
وبترتاحي من الالتهابات
ويخلي المنطقه نظيفه وجافه و..... وماراح تندمي لو استخدمتيه واكيد في كلام ابقوله وانتو فاهمينه ومايحتاج تلميح اكثر
اللي جمبه هذا بخاخ من نفس الشركة وهذا ايضا شي ضروري جدا هذا بخاخ معطر للمنطقه
لاتخافو مايسود المنطقه لانه مخصص لها انا استخدمه سنين ولا حسيت حتى بلون غامق يعطيك ريحة حلوه حتى الاندروير حقك يصير ريحته حلوه وتكوني واثقه من نفسك اي وقت قربت ساعة الصفر انتي مستعده وماتتفشلي من شي اكيد فاهمين وهذي الاثنين تلاقوه في بنده والا اي صيدليه هيا من شركة كيرفيري حق الفوط الصحيه
والان اخذنا دش وكل شي جا وقت اللوشن اللوشن شي مهم جدا للبشره عشان تصير تلمع وطريه ورطبه مو تطالعي بركيتك تلاقيها متشققه وجافه ولونها ابيض من الجفاف والا كوعك لازم بعد الدش تنشفي جسمك وتحطي لوشن ولعلمكم ترطيب الجسم يمنع الشعر انه ينبت على جوا البشره ويسبب البثور
واليوم اخترت لكم لوشنات باث اند بودي ووركس برضو كبيره وتكفيك مده وقيمتها 45 وريحتها تخيب لو استخدمتي الشور جل بعدين اللوشن خلاص انتي فواحة عطر تمشي عالارض وهذي صورتها
الان جا دور تعطير الجسم وهذي مجموعة معطرات من شركة فكتوريا سكرت فيها لمعه وبعضها مافيه وفيه من شركة باث اند بودي ووركس انصحكم بس بهذي الشركتين لانها تستاهل فعلا اما بدي شوب مكياجي الخرابيط هذي والا المعطرات اللي تكون بمحلات العطور اللي بالاسواق الصغيره يضحك عليك يقولك فكتوريا سكرت وهيا مو فكتوريا سكرت يبيعولك كحول في علب ويقولك معطر جسم مانصحكم تشترو منها ابدا
تبغو فكتوريا والا باث عندكم طريقتين اما تشتروها من امريكا او تشتروها من محلاتها تدخلي المحل مكتوب من برا فكتوريا سكرت بالخط العريض وباث اند بودي ووركس كذلك مكتوب من برا عالمحل وتلاقوه في سوق حراء الدولي بوابة 6 وبرضو موجوده في دبنهامز صح انكم راح تشوفو فرق في السعر اللي انا كتبته والسعر اللي بالمحل اللي بالمحل اغلى وهنا صورهم
هذي الصورة فيها زبدة للجسم او لوشن للجسم بنكهات
بخصوص النكهات بقولكم شي ترى النكهات اللي يبيعوها التاجرات مقرفه ومقززه وكل شي انا اشتريت منها وقرفت جدا وتلصق وماهي مستساغه في الطعم مانصحكم فيها ابدا
هذي اللوشنات ايش طريقتها اولا مافيها سكر وهذا اهم شي ثانيا ماتلصق بالجسم بالعكس تذوب عالجسم ويمتصها وماتزييت ولا تلصق طيب ونكهتها كيف :؟ النكهه شفتي لما تحطي مرطب بالفراوله مثلا تحسي بنكهته في فمك بس في نفس الوقت مافي سكر صح ؟ هذي نفس الشي نكتها قويه جدا بس بدون سكر
ومتوفره بعدة نكهات الفيلفت كيك والفانيليا والكب كيك ونكهات زي كذا وفيه منها مرطبات للشفايف برضو مافيها سكر لكن تعطيك لمعة ونكهة الكيك تحسي انك نفسك تاكلي جسمك وشفايفك تصيري قطعة كيك تمشي عالارض وسعرها رخيص تقريبا 45 او 50 ريال فقط بالنسبه للكريم اما المرطب 15 ريال ومن النت مو من هنا وهنا صورتها
بالمناسبه في برضو مرطبات شفايف من باث اند بودي ووركس وفكتوريا سكرت بنكهات وفي بعضها فيها سكر خفيف وبعضها بدون برضها ممتازه جدا بس مخلصة من عندي حاليا اكلتها كلها ههههههه
وهذي معطرات جسم بس للاوقات الخاصه يعني ماتنفع تسخدميها كل يوم خليها للوقت المناسب :kissa:
برضها معطرات بنكهات بدون سكر ولكن اخر واحد الوردي هذا بلوه من بلاوي الزمن يابنات انصحكم تجربوه بعنف وبقوه وبشده هذا المعطر اليم وعذاب ريحته تدووووووووووووخ وتجذب لان فيه فيرمونات اذا ماتعرفو ايش يعني فيرمونات هيا ريحة تجذب الرجال للمرأه فهمتوني ؟ هذا يابنات خطيررررر انا احطه واقعد\ اشم في نفسي يدوخ فعلا فعلا وبرضو من النت قيمته حوالي 70 ريال او 80 لكن بخه وحده منه تكفي وزياده وتدوخ وتخلي زوجك ينتحر وهنا صورة للمعطرات
والان جينا للرومنسيه بعينها هذي الاكواب عباره عن فواحات + شموع + مساااااااااج ايوه مساج
ايش طريقتها يجي الكوب معاه غطا زي ماتشوفو وتجي ب 3 نكهات فانيليا وفانيليا بالشوكلاته ومدري ايش كمان اعتقد سينامون اول ماتفتحي الكوب وتشيلي الغطا وتولعي فيها تبدأ تطلع ريحة تدوخ وتجنن وتموت وتدخلك عالم ثاني وبعدها تكوني سولفتي مع حبيب القلب زوجك شويه عبال ماتسيح واول ماتسيح اللي يطلع منها هذا زيت مساج تبدأي تستخدميه طبعا هوا حار بس حرارته يتحملها الجسم عادي ماتحرق تراه مو زيت مغلي بالعكس مريح جدا جدا والجسم يمتصه بسرعه ويخلي الجسم ريحته تهبل وهنا صورتها وهيا مقفله والثانيه وهيا مفتوحه والثالثه صورة الزيت بعد ماولعتها طلعا بعد ماتخلصي منها تطفيها بالغطا حفها وترجعيها علبتها وتراها تعيش ومالها تاريخ انتهاء هذي عندي من سنه ولا خلصت وقيمتها 130 ريال تقريبا من النت برضو
واخيرا وليس اخر اتمنى انكم استفدتو من موضوعي وكلامي وتعبي مايروح بلاش وتدخلو وماتردو ترى ازعل وابكي :(
واحب اقولكم اني افرح جدا لما ادخل مواضيعي واشوف ردود البنات ودعواتهم والرسائل اللي تجيني افرح بها كثير والله
ويابنات بقولكم شي بخصوص ان في بنات بيسألوني من فين تشتري من اي مكان والا مين يشتري لك من النت والا زي هذي الاسئله . صدقوني انا لو بس كتبت اسم احد يبيع هذي الاشياء انتو ماعاد بتصدقوني بشي وتقولو اني اسوي دعايه وموضوعي ماراح يكون فيه مصداقيه صح والا لا يابنات ؟
عشان كذا انا اكتب لكم المنتجات وانتو ابحثو عنها بقوقل والا امازون وبتلاقو الف احد يبيعها وانا اتعمد اكتب لكم الاسعار عشان لاحد يضحك عليكم ويغشكم
حبيباتي جبت لكم روابط المنتجات من امازون هذي الشمعة حق المساج
http://www.amazon.com/Booty-Parlor-Massage-Sandalwood-Vanilla/dp/B0038ZB98Q
وهذا رابط المعطر القنبله
http://www.amazon.com/Brand-Crazy-Girl-Body-Cupcake/dp/B00F5BGMSI/ref=sr_1_
اما منتجات باث اند بودي ووركس وفيكتوريا موجوده في دبنهامز حبيباتي
واتمنى اني ماطولت عليكم وكثرت كلام . واقولكم استنو موضوع قريب عن الشعر وانا اعتبره اقوى موضوع بالمنتدى راح يكون لانه فيه صور قبل وبعد واشياء راح تنبسطو فيها
والسلام عليكم ورحمة الله وبركاته