اللهم يامقلب القلوب ثبت قلوبنا على دينك
عارفه ان تقريري متأخر شهرين تقريباً فالعذر والسموحه منكم
بس تعرفوا وقت البرد ودنا نبقى تحت اللحاف وندفى هذا غير الكسل الي يطب فينا بلا هواده
المهم يالغوالي
هذا موضوعي وكيف الناس عيدت واحنا بالبيت لان زوجي مستلم
راح ولدي للمدرسه بهدايا العيد لأصحابه ورجع ودموعه تسابقه بوفاة صديقه لطفي وهذا الموضوع تكمـــــــله له
غايتي ومقصدي من موضوع الشيخ سعيدالقحطاني + هدايا المدرسه بمساعدة اولادي ولا عيدنا الا ثالث يوم بتاريخ (13/12/1432هـ)
المهم قررنا نذبح اضحيتنا بالإستراحه
صحينا صلينا الفجر ورجع زوجي واولادي يناموا وانا ظليتني صاحية ارتب الأغراض والعفوش
وصلحت قهوه وشاي وصينية كيك ورتبت بيتي وبخرته احتياط لايطب علينا ضييوف فجأه الا وكل شيء تمام
صحيت الشباب ولبست بناتي ملابس ثقيله وتوكلنا على الله وتوجهنا للأستراحة
طبعاً زوجي مر عيد العماله << أعجبني تصرفه صراحه ودعيت له من قلب
لأنه فرحهم وحسسهم انه فيه من يحبهم ويدور عليهم :26:
وتوجهنا للأستراحتنا << كم مره كررت كلمه استراحه ...!!
المهم والجو مشمس يجنن مع هبة نسمة هواء بارده
رحت ابي اشوف الخروف الشجاع الي بنذبحه
الا والآقيه يأكل مايدري الضعيف وش بنسوي فيه :icon33:
وهذا اني قويه اقول لزوجي بساعدك وامسكه معاك قال ليتك تمسكين عمرك كفايه << عصبت عليه وقلت انت الخسران
اتاريه عامل حسابه لكل شيء وراكز وتد بالأرض عشان يربط رجلينها وايدينها ويثبتها <<< ذكي اسم الله عليه
وانا واقفه اطالع فيه وهو يذبحها اول مره اشوف شيء ينذبح قدامي وبس اشوف منظر الدم الا وتجيني لحظه رعب ورجفه بجسمي بغى يغمى علي
وزوجي يعطيني هذيك التهزيئه وروحي ولعي النار ومادام منتي قد هالمنظر ليه تجين عندي :icon33:
والله ماانسى شكل الخروف وهو يرافس ويحاول يشفط هوا من قصبته الهوائيه << أبيكم تعيشوا معاي الجو
ورحت اتنلقف وقلت لازم اساعده واروح اولع لكم الحطب
وارصه وأخذ الكبريت واوزع الورق وحتى النار موراضيه تولع ويجي بعلي ويقول فيه شوي قاز هناك صبي منه وولعي يعني لازم اقلك سوي وافعلي ؟؟؟
شليت عفشي ورحت اولع النار واخيراً واعطاني الراس ومن فلاحتي بغيت احطه على النار مباشره قال سلاماااات :mad:
لازم اول شيء تغسلينه من الدم وتنقعينه وبعدين تخلين الحطب يجمر
امك ماعلمتك ... قلت لاوالله ماعلمتني يجينا الراس والرجول مشويه جاهزه الله يسلم حقين المسلخ يضبطونه لنا خخخخخخخخ
وبعد ساعه نقع لها الراس حاولت اشويه ماقدرت الأخت لابسه ثقيل والشمس صاقعه فيني والنار تلفحني بحرارتها
ورجع زوجي يشوي الراس اتعبته مسكين ... لكن مو مشكله امـــون عليه
الله يوفقه ويثبت قلبه على الدين ويحسن خاتمته
جهزت فطورنا مقلقل وبعدين نمنا وصحينا وجهزت غدانا وبعدين جلسنا الا بعد صلاة العشاء وجهزت عشانا ونمنا الى اليوم الثاني
ماتلاحظن كل يومنا اكل في اكل:)
طبعاً انا متعوده ماانام الا على صوت المكيف وهديره فوق رأسي
زوجي وعيالي مع التعب ناموا وانا الله يحفظني ماقدرت
صوت الغنم صياحها والريحه تهبل وكملت الناقص مناقرة الدجاج والكلاب اعوذ بالله منها من جهه مالقيت تضارب الا قربنا
انا لله وانا اليه راجعون
حاولت اتقلب يمين شمال مره نوم معفس
قمنا اليوم الثاني وعلى طول قشيت عفشي وقلت على البيت خلاص مو قادره توبه انام هنا الا بالصيف اما في الشتاء مانويت << بكاشه
ونرجع البيت واجهز لنا اكله حليوه وبسيطه وطلعنا بعدها على الحديقه ولها موضوع مستقل فيها
وهذه الصور تحكي لكم قصة يومي واعذروني على كثر القرقره
وفيه صور مؤلمه لتفاصيل ذبحنا للخروف الي موقادره تشوفها او نفسها شينه تدق ريوس والله يستر علينا وعليكم
اللهم مااصبح بي أو أمسى بي من نعمةٍ او بإحدٍ من خلقك فمنك وحدك لاشريك لك فلك الحمد والشكر
رضيت بالله رباً وبالإسلام ديناً وبمحمد صلى الله عليه وسلم نبياً