ولدي يكذب ويسرق ويطلع من البيت بدون استاذان مع اني ماقصرت معه بشي !!!!

السلام عليكم ورحمة الله وبركاته
يا اخواتي من زمان كان ودي اطرح هالموضوع بس هالحين الوضع كل مره يزداد سوء
ولدي عمره 14 سنه من انجبته وهو طفل هادي مايحب المشاكل ولايحب يضرب احد ودائما يسمع كلامي
واهلي واقاربي ومعارفي يحبونه ويضربون فيه المثل قدام اولادهم على انه متربي صح
انا من الاول ماكنت اطلعه من البيت وهو ماعنده اخوان الا واحد وعمره 3 سنوات والباقي كلهم بنات
من شدة خوفي عليه ماخليته يختلط في عيال الجيران مع الوقت بدأ ينزوي ويتعقد وفي المدرسه مايدافع عن نفسه
وكثيرين طلبوا مني انه يخالط عيال الجيران عشان تصير شخصيته قويه وانا كنت دائما انصحه واشجعه واعزز الثقه في نفسه كنت اتمنى انه يكون قوي شخصيه ويدافع عن نفسه هو يسمع كلامي ويقولي ان شالله ياماما وهالكلام لما كان عمره 8 سنوات تقريبا المهم فالاخير استسلمت وخليته يخالط اولاد الجيران والحمدلله صار اجتماعي ويحب الناس وصار دائما يطلع من البيت ويروح للجيران المهم لما صار عمره 10 سنوات صار يروح مع عيال الجيران ويلعبون كوره مع عيال الحاره ومره من المرات باع سيكله على واحد من عيال الحاره وتصوروا باع سيكله ب 18 ريال وزوجي جن جنونه
وراح للولد اللي اشترى السيكل ورجع السيكل منه بعد ما صرخ عليه وهدده الولد خاف من تهديدات زوجي ومن بعدها ماتعرض لولدي وحتى ولدي اخذ علقه من ابوه وصار يعمل الف حساب لابوه ومايطلع ولا يروح الا بموافقة ابوه
المهم لما صار عمره 12 سنه حسيت انه ولدي تغير وصار يسرق الفلوس من ابوه بدون علمنا احيانا يسرق 100 واحيانا 50 وابوه بدأ يشك بالامر لان فلوسه تنقص المهم مع التحقيق عرفنا انه هو لاني كم مره اشوفه يدخل غرفتي ويسرق من ابوه وابوه من بعدها صار يخبي فلوسه عنه واحيانا ينسى وتصير قدامه ويسرق ورب الكون انا وابوه مانقصر عليه نعطيه مصروفه واي شي يطلبه ابوه يعطيه اياها لكن بحدود لان هدفنا انه مانخرب الولد
والله ثم والله اني دائما انصحه واخوفه برب العالمين واضرب له الامثال بولد فلان وولد فلان بانهم مايسرقون وان رب العالمين راضي عليهم وانهم يخافون الله وان السرقه حرام في البدايه يخاف وبعدين يرجع لنفس الحركات ولما نقوله ليش يحلف بالله انه ماسرق وضاق صدري من هالناحيه لانه حتى صار كذاب ويختلق قصص من عنده
ولحد الحين وهو على هالحال الكل تدخل في موضوعه اخواني وامي وابوي كلهم ينصحونه لكن بدون فائده
ولدي صار كذاب حتى دائما يجيب لي قصص عنه وحصلت له في المدرسه وانه تخانق مع الاولاد وانه ضرب فلان وبالاخير ماحصل شي من هاللي قاله والله صار الكذب عنده زي شرب المويه يكذب علي ويكذب على ابوه وعلى كل الناس في الفتره الاخيره صار مايحترمني ويعلي صوته علي ولما تحصل اي مشكله له ينسبها لي وانه انا السبب باللي صار له
هذا كله بسبب طلوعه في الشارع وحتى يطلع بدون استاذان والله الاولاد يخربون بعضهم ..حاليا ابوه مسافر وطلب مني اني ما اطلعه ابدا من البيت الا في الاربعاء والخميس يكون عند اقاربي تصوروا في فترة سفر ابوه كان يسوق سيارة ابوه مع اصدقائه بدون علمي وهو اخذ المفتاح الثاني من دولاب ابوه وخبأه عنده وكل يوم يطلع ويركب السياره وشافه واحد من اقاربي وعلمني وكبرت المشكله واخواني هددوه لو يطلع من البيت راح يضربونه وخاف وجلس في البيت وابوه برضو منع خروجه من البيت قبل مايسافر لكن مشكلة زوجي انه اذا سافر مايسئل عني ولاعن اولاده والله يجلس اسبوع مايسئل الله يهديه ويسامحه
المهم ولدي الحين مجنني في البيت بس يضرب اخواته ماتعود على جلسة البيت وانا واياه في مشاكل والله مو راضي يسمع مني حتى الكلام الحلو مايبغى يسمعه .. ما ادري وش اسوي فيه .. يارب تصبرني .. ابوه وعده انه يشتري له سياره اذا شافه انضبط وهو الحين لسه صغير بس ماشاءالله تعلم السواقه من ورانا الله يحفظه يارب
وجلس بالبيت عشان السياره اللي راح يشتريها ابوه بعد ماينضبط ووعدنا انه راح ينضبط وهو ماطلع من البيت له اسبوعين تقريبا وهذا خطوه مبشره على خير لكن السرقه والكذب مالقيت لهم حل

اللي عندها طريقه تحل فيهه مشكلة ولدي هذي والله ماتهنيت بنومي ولا اكلي احس ولدي خلاص بيضيع مني
والله لادعي لها اللي تلقى لي حل معه ...
معليش طولت عليكم بس حبيت اعلمكم بالتفصيل كل شي عل وعسى القى الحل الشافي عندكم ..