اللي تواسيني ورب الكون لها دعوه في ظهر الغيب بجوف الليل ..

السلام عليكم
يابنات انا مهمووووومه وضايق صدري ومافيه احد افضفض له اااابببببدا حتى امي وهي امي ماتبغاني افضفض
انا عاطله وماتزوجت امي متغيره معاملتها لي لها سنه وهي متغيره من يوم ماتخرجت وهي متغيره والله بعض الاحيان احس انها عين وخصوصا ان صديقاتي دايما يقولون انتي صديقتك امك ماشاء الله .
صايره كل يوووم لازم نتهاوش عللا اتفه سبب وربي لو اقولكم الاشياء اللي نتهاوش عليها ماصدقتوا .على طول تزعل وتسوء الظن فيني كثثثثثييييير وبسبب المشاكل تقريباسوء الظن فيني . اجيب مثال
هي كل يوم تطلع باقي الغداء بالبراحه اللي قدام بيتنا يعني تنوي صدقه . انا برمضان صرت احط صحن بالحوش فيه مويه للطيور بنيه صدقه تجي تسوي مشكله معي وتهاوش تقول انا انوي الصدقه لي ولكم وانتي يقالك ماتبغين لي منه بالصدقه ؟؟ شوفي كيف سوء الظن وانا قصدي ابغى ادور اي حاجه ازود فيها حسناتي وتزعل علي . هذا مثال ولو اجلس اتكلم ماخلصت


والشي الثاني ماتبغاني افضفض لها اذا ضاق صدري والله العظيم اتحسف اني تكلمت .
احيانا افضفض اقول ودي اتوظف واشغل نفسي مليت من القعده بالبيت . تحسبونها تقول ياعمري يابنيتي الله يرزقك اللشكوى لله اصبري !! تقول والله انتي مو اول وحده ولا اخر وحده عاطله وش اسوي لك يعني ! ثمن تزيد الطين بله وتقول ايه انا ادري انك ودك تتوظفين عشان مالك خلقنا بالبيت تبغين تتهربين ! شوفوا كيف التفكير بس


ودايم اذا فضفضت بشي ماارتاح واتحسف اني قلت لها اللي بقلبي وتطردني من المكان
ليه طيب ؟؟ وش يضرها اذا ماتعاطفت معي لو مجامله امنيتي اسمعها تقولي يابنيتي او ياحبيبتي او كلام رقيق


والله العظيم كرهت الدنيا مو بس عشان مشاكلي مع امي وسوء الظن فيني وتفسر كل شي على مزاجها . لا
كرهت حالي عشاني افكر دايم اقول لهالدرجه الدنيا صارت كذ!!! صديقاتي كثاااار بس ولا وحده قريبه مني مالي صديقه مقربه افضفض لها
وحتى والله صرت ماالوم الناس اذا تغيروا على بعض لاني اقول هذا وهي امي ماتبغا افضفض ليش اتشره على الصديقات
امنيتي احس انه فيه احد بحياتي يحسسني اني مهمه عنده يحسسني بالحب والحنان والكلام اللطيف
ابوي عصبي لابعد حد ماعمري اصلا سولفت معه علاقتنا بس سلام فقط ومستحيل يسولف معي ابببدا امنيتي يكون حنون معي يسولف معي زي الناس . امنيتي احس بالحب معه . واذا زعل علي مايرضى علطول يجلس اسابيع واحيانا شهر مايرد حتى السلام


واخواني كلهم اصغر مني مستحيل يحترموني . مستحيل احس اني اختهم الكبيره والله حتى اللي بثاني ابتدائي ماتحترمي
المشكله مو هنا المشكله مره فضفضت لامي قلت لها تكفين يمه شوفي معهم حل . الحل بيدك يايمه انا مايسمعون كلامي ! تدرون وش قالت ؟ قالت والله مو انتي اللي تعلميني كيف اربي عيالي .
المشكله ماجبت طاري التربيه بدال ماتقولي خلاص حبيبتي ولايهمك اهوشهم او اتفاهم معهم تهوشني انا وتتهمني اني قصدي ماتعرفين تربينهم


والله العظيم يابنات طفشششششت ودي احس بالراحه معهم ودي احس بالحب والحنان
ولي ثلاث شهور كل يوم اقوم الليل واستغفر واعي ان الله يحنن قلب امي علي وتصير احسن مما كانت في السابق
وادعي اني اتوظف واغير جو من البيت وادعي اني اتزوج واحد حننوووون وطيب يعوضني عن حنان ابوي
وصرت اقرا سورة البقره قلت يمكن عين بس مافيه فايده وسمعت انه اللي فيه عين يتثاؤب اثناء الرقيه .وانا اسمع الرقيه مايجيني تثاؤب .


بس يارب يستجاب اللي بخاطري


تكفوووون يابنات متضايقه دعواتكم لي بظهر الغيب
يمكن وحده اقرب مني الى الله وتستجاب دعوتها
دعوة المسلم لاخيه مستجابه ولاتنسين انه لك بالمثل


واللي تواسيني لو بكلمه والله راح ادعيلها بصلاتي وبجوف الليل
مجرد فضفضه