الله يبارك فيج اختيه ان شاء الله انا ناويه علي اجازة الربيع ما افوت (:
المهم قولي لي انتي استفدتي من موقع منتدي العرب المسافرون والا لأ بالنسبة للفنادق احنا نسكن كل سنة في فندق غراند برزدنس الصراحه الفندق روعه وما عليه قصور وهو يتكون من 3 ابراج شي عندهم الغرفه العاديه وشي غرفه صاله لكن سعرها نفس سعر الغرفه العادية وعندهم بعد غرفتين وصاله ومطبخ صغيروني وتقدرين تطبخين في كل الغرف احنا نسكن في البرج رقم واحد ويوم ماشي مكان نسكن في البرج رقم 2 لانهم متجابلين اما البرج رقم 3 فتعبرين الشارع بيني وبينج البرج رقم واحد احلي وفي كل غرفه من الابراج الثلاثه فيه مكروويف وثلاجه ومسجل وفيديو وتلفزيون واذا خذيتوا غرفه وصاله بعد في الصاله وحجرة النوم تلفزون وتجوري ( صندوق لحفظ الفلوس الجوازات ) ومغسله في في كل الغرف عشان اذا بغيتي تطبخين يعني شي خفيف مثل الريوق بعد هم حاطين لج فوق المغسله مكتبة فيها 6 كاسات للشرب وكاسات العاديه مثل اللي يحطون فيه الايس كريم عرفتية اللي فيه مثل العصي الطويله من تحت و6 خواشيق يعني من كلشي 6 مثل السجاجين وكاسات الحليب مع صحونها وصحون حق الشوربه وصحون حق الاكل
والارضيه كلها رخام وقنفات من الزين واذا يلستوا فيه 9 ايام يسون لج خصم اما اذا يلستوا فيه اقل بيكون السعر عادي وانتو وشطارتكم يمكن تقدرون تكاسرونهم بعد
وهذا الفندق قريب من منطقة العرب يعني تقريبا يبالكم مشي من 10 الي15 دقيقة مشي لكن ما بتحسون بالمشي عشان الشارع اللي بتسيرون فيه الين منطقة العرب فيه كله كشكات ومحطة القطار اللي يوديكم الي السناتر
ملاحظة : احنا يوم نسير الفندق اشل وياييه اشرطة للمسجل واشرطة فيديو حق الصغارية والسوني عشان افتك من حشرتهم (:
اذا بغيتي العنوان قوليلي عشان اكتبه لج واذا بغيتي اي معلومه ثانية اكتبي لي وما تردج الا ايديج اللي تكتب علي الكيبورد
انا ما قدرت اكتب لج عن الاسواق والحدايق عشان انا قلت اكيد بتقرينه من موقع العرب المسافرون
وبعد قوليلي اذا كنتي تسافرين اول مره بانكوك
وبالنسبة عن التايلنديات والكلام اللي يقولونه فانا اقولج كله كلام في كلام محد يسرق الرياييل من حريمهم من والطريج فيه من هذي النوعيه بس الديسكوات اما في الشارع والاسواق والسناتر فانا اقولج اياه لا تخافين وتحاتين محد بيتعرض لكم وانتي بتشوفين ها الشي بنفسج
متي ان شاء السفره بتسيرين بس بانكوك والا بتلفين الجزر
اسفه علي الاطاله حبيت اساعدج
ملاحظة : نسيت ما كتبتها قبل توني ذكريتها تقدرين تشيلين وياج جوله صغيرون هذي السودا المدوره اللي يبيعونها ب20 درهم عند اللي يبيعون الوعيان تسويين فيها اي شي مثل النودلز والحليب وبيض وطماط وفول الخ

اشاءالله عليج يا اختي وردة الشارجة

الصراحة شجعتوني اسير الها
مع انا امقررين انسيرلها السنه الياية

اهلا وسهلا فيج اختي ام الجواهر
اشحقة اتاخرين هذا سفر محد يأخره انا لولا الملامه جان اشتليت في شهر 8 لكني اشتغلت بس تشوفيني متحرقصه ابغي اسافر لكني متحلفه حق ريلي من احين حق اجازة الربيع ان شاء الله وهو يضحك علييه يقولي ما تفوتين حاسبتنها عشان في شهر واحد بكمل 7 شهور بقدر اخذ علي الاقل 23 يوم والباجي بخليه حق الصيف الياي ان شاء الله اذا في العمر بقية علي العموم اختي ام الجواهر اذا بغيتي اي مساعدة فانا حاضرة

مشكورة اختي ما اتقصرين

بس انا ما اقدر اسافير الحين

لاني طلعت اجازة شهرين ( مارس + ابريل )
كنا مسافرين ماليزيا

بالتالي ما اقدر اطلع اجازه الا السنه الياية باذن الله

عادالحين موضوع السفر امشعلل عند الناس
وفوادي اسافر بعد اللحين
لكن ما باليد حيله