هــــلا بكم هــــلا وبدخولكم لموضوعي
هـــــــــــلا
عسى كل من رعص
ودخل وبص 
بس بص على موضوعي يجزاه شي وشويات وعسى من قراء
وتعب نفسه ورد وجبر بخاطري يرزقه الله العفو والعافيه
ويختم له ربه بالجنه يدخله من غير حساب
من قدكم صكيتم بدعوة على كيف كيفكم
مما لا شك .....
انا اقول ان مما لا شك هذي داخله عرض باسلوبي المتعارف عليه
اقول اها بس نكبس
على اسلوب أم تأبط اللي انتم خابرينهشوفوا يابعد تسبدي
بها الدنيا اكيد ان كل واحد ضاع أو فقد شي غالي عليه
من اشياء ماديه او اشياء معنويه<<< ترى التاليه مو متاكده منها بس ابي اتميلح فيها
خخخخخخخخخخخ
عاد اقولكم
و انا متأكده مليون وخمس طعش وثلاث وعشرطعش بالميه
ان كثير منا ومن خواتي الغاليات انهم فقدوا ناس غالين عليهم
من امهات واباء وابناء واخوان وخلان و و و و و و
لكن مابيد حيله هذي هي سنة الحياة
لكن ما نرجوه هو ان يجمعنا الله بهم في جنات النعيم
(( اللهم اجمعنا بمن فقدناه في عدن فذاك اللقاء لاهم ولاكدر))
آآآآآآمين يارب العالمين
لكن اللي قصد ته بالمفقودات أو اللي ضاع لكم مثل حالتي
ضاع لي أشياء كثيره من مجوهرات واشياء ثمينه
لكن اللي حز في نفسي وما زلت اذكره الى الحين
وطابع في ذاكرتي الى الحين هو
ريال
ايه ريال واحد فغط لا غير
لا وسعودي
مهوب ريال يمني ولا ريال قطري سعودي اللي مبطي مرسوم عليه سكينين
وشجرهوالحين يوم كبرت صار مرسوم عليه سيفين ونخله هاه عرفتوه
تبون تعرفون قصة ريالي
يالله نبداء
من زمان اهلنا ما كانوا يعطوننا ريال ورق
ولا نشوف القروش الا بالسنه مره
في عيد رمضان ولا حتى عيد الضحيه ما يعطوننا الا كرشه ومصران
خخخخخخخخخخخ
وفيه حاله ثانيه نشوف القروش اذا ارسلتنا الماما للدكان
اللي جنبنالا وتحرصنا اننا نتقضب بالقروش لا تضيع منا
عاد ما ابي اظلم اهلنا الظلم شين ، كانوا يعطوننا اللي حنا بحاجته
ان كانوا مبحبحين علينا نصف ريال او ربع
ريال ويخب علينا ، لا وكان حديد يعني (العمله حد يديه)
يعني زي ما قلت لكم ما نتحسس الريال الورق الامن العيد للعيد
او اذا رحنا للدكان
عاد مره الماما ارسلتني للدكان
اشتري بعض الالوان لا اتسذب اشتري قوطي صلصه
كانت الله العالم مصلحه العشاء مرقوق وانا رايحه للدكان اللي جنبنا وادربي
راسيلمحت شي بالشارع طايح واناظره وابحلق فيه واثره ريال ، أي والله ريال
طايح ومجدوع على الارض ياحظي وانا التفت يمين ويسار والقط
الريال من الارض واغبيه معي من الفرحه بــــــوه داخل شرابي لان الجو براد عاد الماما الله يجزاه خير ملبستني من الشراب اللي انتم خابرينه
<<<< اللي ما يتمطط ههههههههههههه
شريت قوطي الصلصه ورجعت للبيت وكنت مثل البرق بسرعه امشي
رايحه للدكان بحاله ورجعت بحاله ثانيه
فرحانه ومبسوطه ومستناسنه بالغنيمه
بعد ما رجعت للبيت جلست ادور على مكان اغبي الغنيمه فيه
ما لقيت الا تحت الموكيت اللي كنا نسميه ذاك الوقت زوليه او الفرشه
وجلس ريالي كم يوم في مكانه ، كل يوم اتطمن عليه
افتح واشوفه واشبع عيني منه ويبقى في مكانه محفوظ
وما قلت لاحد من اهلي عن موضوع الريال
<<<< عارفه ومتيقنه اني غلطانه اخذ شي مهوب ملكي
وجلس الريال الى ما يشاء الله في محله
الى ان جاء اليوم اللي قررت وانا بكامل قواي العقليه
اني اطلع الريال من محله علشان افرج بنت خالتي
عليهوكنا ذاك اليوم بالبروطلعت الريال علشان اوريها وتتفرج عليه
<<< شهبان ماكد شفنا العيشه خخخخخ
ويافرحه ما تمت
ماد ريت الا الريال طار مني لان الجو كان عجاج وغبار وهواء يطير اللي ما يطير
طــــــــــــــــار ريالي
وقمت الحق عليه
انا الحق وهو يطير
انا الحق وهو يطير
واركض واركض وهو يركض ،
وانا اركض مريت من عند عربان
وناس وبعارين
ومريت من عند راعي قطيع غنم
الشيخ هذال ومريت من عند مضارب الشيخ فيحان
ومريت على عرب الشيخ محقان ابن نجر
كل هذا وانا اركض وراء اللي ما يتسماش ريال
وتلمحني زميلتي فريال بنت الشيخ محقان
وتلزم عليّ ادخل عنده بالشق
علشان اتقهوى عنده وتلزم عليّ لو كاس كابتشينو
ابل فيه حلقي
وانا اللي اتعذر منها واقول لها الجايات اكثر <<< هو فيه ثاني هههههههههههه
وقلت لها لا والله اسمحي لي يافريال وراي مشواااااااار
ابي الحق هالمسروع الريال
يتبع
ماتعوذ من بليس ووقف يامال الضربه
وجبر بخاطري وكحلت عيوني بشوفته ورجع لمحله في مخباة كوتي اللي هو جاكيتي
واللي ما ادري وين انا جدعته وانا اركض علشان يخفف من الثقل
اللي اميمتي الله يجزاه خير مد حيتني
( محشيتني) فيه
اخر شي استسلمت من اني امسك بالريال ورجعت اجر اذيال الهزيمه والخساره
ورحت ادور بطريقي اللي جيت منه على جاكيتي علشان
ماتصير خسارتي خسارتين
خساره مال وحلال
والحلال جاكيتي اللي لوما لقيته كان تدبغني امي دبغتن معتبره
واقصد بالمال الريال اللي مثل ماجاء راح
عاد انا اقول هذي نهاية المال الحرام اهئ اهئ اهئ
فيه شي ثاني فقد ته وضاق صدري عليه تدرون ماهو؟؟؟
اما ماهو داخله عرض خخخخخخخخخخخخ
ايه ودكم تدرون ؟ بس ياويل اللي تبي تضحك ولا تشمت تراني هددت وعطيت انذار مبكر
الله ضاع لي وضاق صدري عليه
قد ر ايه قدر والله العظيم لا وكــــــــــــان مليان
وقصته :
هذا مره كنا رايحين للبرفي يوم من ايام الشتاء
<<< انتم مالاحظتوا ان كل بلاويي تصير بالبر
بس يالله مايبتلا الا المؤمن
الله يسلمكم شبينا الضو ونزلنا المعاميل وسوينا قهوة وشاهي وزنجبيل وطبخنا غدانا
وعقب المغرب صلحان حليب وانبسطنا بيومنا البراوي
ومن ثما كنا ناوين نسوي فريك
والفريك هو عباره عن عجينه من البرّ تدفن تحت النار
ويكون بينه وبين النار دقيق
المراد ان للفريك طريقه
معينه بالطبخ صعبه شوي بس تطلع بالاخير شي مثل الكيك
وتفرك ويفتت ويضاف له العسل والسمن
وبعض الناس يحط سكر وبصل
المهم انه يطلع بالنهايه يالله من فضلك تفضلوا يالله حييهم
خواتي ما ابي اطول عليكم <<< اقو ل كل هذا وما طولتي هههههههه عطينا الزبده
زينا الفريك وحطيناه فوق غمارة السياره علشان مايجيه تراب
وقمنا نضفضف قشنا واغراضنا علشان نمشي
لان الطريق للبيت بعيد عاد حنا كاشتين بقلع وادرين
<<< اقطع ايدي اذا احد فهم التاليه خخخخخ
بعد ما بغينا نركب طلب مني أبو دحومي ان اسوق وكان يبيني اتعلم السواقه باليل
لاني سبق واني تعلمت السواقه بالصبح وعقب الظهر وعقب العصر
بس عقب المغرب ما حصل لي الشرف
خخخخخخخخخخخ اقول اخلصي
كنت حاطه القدر من عند باب الراكب اللي هومكاني كنت ابي اذا جيت اركب اشوفه وادخله معي للسياره
من فرحتي وخبتي بالسواقه ركبت وشغلت ونسيت امر القدر
على بالي ان ابودحومي يبي يدخله معه
هو ما انتبه لان الدنيا ظلام
وانا مختبه من قدي ابي اسووووووق
شغلت وحركت واشوى انكم ما كنتوا راكبين معي
مافيه جربوع ما توطيته وماهنا شجره ما فرمتها
كلن يتعوذ من سواقتي يرقون وينزلون فوق وتحت
انا اول ما حركت سمعت شي دب بس ما جبت خبره
دااااااااعسه رجلي على البنزون
واحياناً فرامل ووين؟؟
بالرمل ههههههههههههه
انا من الخبه ما سألت أبو دحومي يوم ركب
هو ركب القدر ولا لا ؟؟؟
مشينا والله يخلف نسيناه فوق الغماره
وطاح وما ادري باي ارض طاح والظاهر صوت الدبه اللي سمعت اول ما
مشينا صوت الضعيف كان يستنجد ، بس ماش ماهنا مجيب له
ما انتبهنا الا بعد ما وصلنا للاسفلت
قلت لبو دحومي : ارجع ندور عليه
رد ابو دحومي: بالمشمش
أنا كنت متحسفه على الاثنين ، الحاوي والمحوي عليه
ياسبحان الله كان اذا ضاع لي شي اتكدر ويضيق صد ري وانغث
احياناً ايام وليالي
واحياناً تتأزم الحاله الى شهووووووور
الا مره من المرات كنت رايحه لمناسبه زواج وكنت لابسه طقم الشبكه
حقتي وكان الماس
واللي مغلي الطقم عندي مو لانه الماس
لا والله بس مكانة الطقم في نفسي
كنت من زود الحرص كل شوي اشيك على محتوياته
تلاقوني شوي اشيك على الخروص وفي روايه اخرى اسمه الحلق
شوي اتفقد التعليقه وشوي الاسواره
وشوي على الخاتم عاد الخاتم وشلون يبي يطلع من اصبعي
ما ادري دلاخه وما شفت خير ههههههههههه
لكن سبحان الله ارادة الله فوق كل شي
رغم حرصي وانتباهي الا اني وانا راجعه من الزواج وانا بالسياره
وكان اخوي الله يحفظه هو اللي مرجعنا انا والوالده من الزواج
وانا على عادتي اتفقد حلالي كنت اتلمس الحلق من تحت الطرحه والعبايه
وكان ولله الحمد موجود والتمس التعليقه موجوده
اناظر الخاتم موجود
وفجأتاً التمس الاسواره
وما احصلها وانا اشهق ذيك الشهقه
اللي سمعت كل اللي بالاشاره
ههههههههههههه
كان المكيف خربان وفاتحين القزاز << ما احد سألك
قمت اتمتم ياربيه اسوارتي ماهي فيه
واولول واعيط واصيح واااااااااحلا لي واحلالي
عاد امي الله يخليها لي معزي سويلم
قامت تذكرني بكل شي ضاع لي وتقول:
يابعدي ما تمتعتي بحلالك
تذكرين سلسالك هذاك
وتذكرين ساعتك هذيك
وخلخالك وبروشك وخاتمك
وما خلت شي ما جابته ذيك الساعه قدام عيني
ما تنلام من كثر ما كنت اولول عنده اذا ضاع لي شي
حتى انها ذكرتني بمجاول أو غوايش بنتي
اللي كبتها بالبر مهبوله من زود البطره قامت تلعب بالرمل فصخت
غوايشها ودفنتها
وعذرها تقول اخاف تخرب وضاعت وهي والله توها جديده ما صارله يوم جايبتها لها
ما قلت لكم كل مصايبي بالبر اهئ اهئ اهئ
ارجع لكم بسالفة اسوارتي اللي ضاعت بالزواج
استمريت على النحيب والجزع والصياح
واخوي ولد امي وابوي ما بت ولا بحرف
وانا وامي ماغير ندب حظي
اخر شي نطق ابو الهول
لكن ويش قال؟؟
قال شي من بعده ما صرت اتحسر ولا اتضايق ولا ازعل على أي شي فات وضاع او حتى خرب
قال لي الله يحفظه ويخليه:
يا ............ ليش ضايق صدرك؟
لله ما اعطى ولله ما اخذ
يعني بمختصر المفيد الله اللي اعطاك هالرزق والله هو اللي اخذ منك
بس والله العظيم
يابنات ان كلمته هذي كأنها مساحه ومسحت كل اللي بقلبي من غثاء
على اللي ضاع مني كل عمري
والى يومي هذا وانا اتذكر كلامه لي كل ما ضاع لي شي
ولا اتندم ولا اتحسر ولا يضيق صدري على شي رااااااااااااااح
مع العلم أن اخوي هذا اصغر مني بكثييييييير
لكن بكلامه كان ارجح لكن اخذت منه الموعظه الحسنه
وحمدت ربي على كل حال
عاد ابشركم ياخواتي الغاليات
بعد ما رجعت للبيت وانا ابدل ملابسي لقيت الاسواره متعلقه داخل الكم
لاني كنت لابسه كم طويل مو مثل بعض الناس لابسين فساتين بدون كموووووووم
وهذا من فوائد اللبس المحتشمممممممممم
عاد يالله همتكم اتحفونا بمفقوداتكم وويش ضيعتوا بها الدنيا
اللي ما تسوى جناح بعوووووضه
وسلامتكم
ودمتم لمن يحبكم وأنا أم دحومي منهم