خجلي وجديتي يسببولي مشاكل في بيتي ,, ساعدوني

السلام عليكم ..

أملي في الله ثم انتوا يا حريم حواء ,, اتمنى القى عندكم دوائي :( ..
من صغري وانا هادئه ورومانسيه وكلي احاسيس ,, بس ما اعرف شو صارلي لما تزوجت !!
تزوجت من سنه وشوي ,, في شهر 6 القادم بنكمل سنتين إن شاء الله ,, مرت علي ايام حلوه وايام مره وصارتلنا خلافات كثيييييييييييييييره وكنا نوصل للنهايه ولكن بفضل الله نرجع لبعض ..
لما ابتعد عن زوجي لفتره بحكم عمله احس بقيمته واحس اني ظالمته واحس الغلط مني .. الحين زوجي من شهر في دورة ,, وطول هالشهر وانا اتعذب حسيت بقيمته وحسيت اني ما اقدر اعيش بدونه ,, اتمنى اعبرله عن مشاعري بس مشكلتي خجوووووووووله ,, طبعا بتقولون كيف خجوله مع زوجج !! احيانا اخجل من زوجي ما اعرف ليش !! انا وزوجي متشابهين في الاطباع ,, هادئين ما نحب المشاكل وبسيطين ,, بس للاسف اللي حولي يخربون حياتي .. في اشخاص يأثرون علي بكلامهم مع انه قصدهم خير بس للاسف يصير شر ,,
المهم مشكلتي ,, تعرفون من تزوجت ما قلت لزوجي حبيبي !! ما اقوله اي كلام حب وغزل ,, مع انه هوه يقوللي هالكلام ويناديني بحبيبتي وعمري ونور عيوني :icon33: وانا ما ارد عليه .. ما ادري شو فيه لساني مع اني رومانسيه وهادئه واحب الاحاسيس الحلوه واحب اشعر بالحب والعشق ,, بس ما اعرف شو ميود لساني ,, ولا مره تحرشت بزوجي او سويتله حركات دلع وااااااايد جديه ما اعرف ليش.. ودي ادلعه ودي اقوله كلام حلو بس ما ادري شو اللي مانعني :icon33:
والله عفيه عليه زوجي صابر علي ,, حليله طيب وعلى نياته احيانا يعاتبني واحيانا يسكت لانه ما شايف فايده مني ,, هوه يسوي اللي عليه بس انا لا ,, اضحك معاه واسولف بس ما في كلام حب :(
مع انه زوجي دووووووووم معاي من النوع اللي ما يحب الطلعات ولا عنده ربع وايد يسهر معاهم ومن هالسوالف ,, بيتوتي بحكم عمله كطبيب ,, يعني دراسته للطب اثرت في شخصيته .. يعني انسان طيب وعلى نياته ودوم في البيت واعرف كل صغيره وكبيره عنه ,, لما يرجع من شغله والله مثل الاطفال اللي يرجعون من المدارس ويخبرون امهاتهم عن كل شي صار بالمدرسه ,, هوه نفس الشي يدخل علي بابتسامته العريضه الله يحفظه ويعطيني كل شي صار بالدوام ,, وكل ربعه اعرفهم اعرف كل شي عنهم ,, بتقولون شو تبغين اكثر من جيه ,, مش عارفه ,, هل انا سلبيه ؟؟ احيانا احس اني محسوده :( وزوجي احيانا يقوللي هالشي ,,لأنه وايد مشاكل تصير وانهار واوصل للنهايه ,, يقوللي بوديج عند حد يقرا عليج ..
ما ادري يا بنات شو فيني ساعدوني وادعولي .. :(
الحين زوجي يوم الخميس بيرجع من الدوره كمل شهر الحين ,, ودي لما يرجع يشوفني انسانه ثانيه ودي اتغير واصير حبيبته ,, ودي اعبر عن مشاعري واطلع كل اللي بخاطري
والله يا بنات احب زوجي ,, بس ما اعرف كيف اعبرله :icon33: احس لساني بينربط يوم بشوفه ولا بتطلع اي كلمه حلوه مني ..
ساعدوني بنصايحكم وادعولي يا بنات ,, ادعولي الله يهديني ..
ادعولي اني افتك من هالخجل والجديه واعطي زوجي اللي يستحقه ..