الله يعينك ..اول شي سوي جدول للتنظيف يعني أنا مع بنتين ربي يحفظهم ومرتاحه مافي ضغط علي يغني خلي يوم في الاسبوع غسيل ملابس أنا عندي غساله أتماتيك مريحتني كثير وغرف الضيوف دائم نظيفه ومقفله  وبرضوا غرفه النوم بس غرفه المعيشيه يبليها ترتيب يومي والمطبخ انتي سوي جدول وترتاحي  

أولا ليش غسيل ملابس كل يوم ؟؟!!
الملابس المفروض ماتزيد عن مرتين في الأسبوع إلا إذا عائلة كبيرة مثلا عددهم 10اشخاص
عيالك وفري لهم غيارات تكفيهم أسبوع كامل عشان ماتغسلين كل يوم يكفي مرتين
زوجك ملابسه أغسليها والكوي عند الكواي
ولو عند أمك خدامة هاتيها وعبي فريزرك بصل مقطع ناعم وخشن وطماطم مقطع
وطماطم معصور ومطبوخ بالبصل والثوم والبهارات اللي تحبينها رشة فقط مع معجون طماطم وسبكيه وخليه يبرد ثم عبيه في أكياس مقاس 4مثلا وفرزنيه
وعبي خضار مثل فاصوليا وباميا وفلفل ألوان شرايح ومقطع صغار
وجزر قطعيه عيدان زي عيدان الكبريت

من كل شي حطي لك علبة كبيرة تكفيك 3شهور أقل
وفرزني معجنات وورق عنب
وسمبوسة لحم وجبن وكبة سبرينغ رول مع أنها متوفرة جاهزة في كارفور
سبرينغ رول وسمبوسة وكبة من شركة الكبير روووووووووعة ورخيصة
ارخص من الطباخات ومن المطاعم

كل هالأشياء توفر لك وقتك صح راح تاخذ منك مجهود يوم كامل أو يومين بس راح ترتاحي شهور
هذي طريقتي ومرتاحة حتى لو عندي شغالة لازم هالأشياء أسويها لأنه والله مانلحق على الشغل
وإذا جاني ضيوف أبي كل شي جاهز من غير حوسة
يبقى الخضار الطازجة
حق السلطة أغسليها ونظفيها وجففيها وحطي حق كل يوم في كيس ولفيه
عشان كل يوم تطلعين كيس واحد من غير ما تعفسين الثلاجة وكل شوي فاتحة ومسكرة بابها

حطي عندك بخاخ فيري مع كلوركس وثقليه شوي وأستخدميه لغسيل المغاسل والحمام وحتى ترشي المواعين منه
ويشيل الروايح ويسهل الغسيل
الحلا سوي لك حلا كم صينية كم شكل في يوم واحد وضفي المطبخ
مرة وحدة وحطيه بالثلاجة الحلا موب يخالف باثلاجة يجلس أسبوعين وممكن تفرزينه
وممكن تجمعين مكونات الحلا الناشفة في علبة حق كل مقدار في كيس
وإذا بغيتي بس طلعي الكيس وأعجني
الدجاج برضه هاتي مبرد وقطعي اللي يناسبك أنصاف أرباع كاملة بس أفتحيها من جهة الظهر
وتبليه وعبيه بأكياس
ويصير بس تطلعين اللي تحتاجين منه وبرضه نفس الشي لحم الغنم
وزيادة وقت الطبخ أي شي علبة تستخدميها على طول رجعيها مكانها
وإذ أحتجتي ملعقة أو صحن حاولي تاخذين من الحوض مو من الدولاب
وقت الأكل يطبخ وانتي تنتظرين حاولي تغسلي لك كم صحن وتمسحي كاونتر الدولاب
تلمين الزبالة ويكون عندك فوط مخصصة لمسح الحوض وأخرى للطاولة
حاولي ترتبين المواعين اللي نشفت وتقطعين السلطة هذا كله خلال تجهزين أغراض السفرة
كل هذا وقت الطبخ لأنه صعب تطلعين من المطبخ في هالوقت

صدقيني راح تدعين لي إذا جربتي هالطريقة ماراح تستغنين عنها
مافي مثلها لأختصار الوقت والجهد

انا نفس مشكلتك بدون رضيع اركض اركض اكرف اكرف ولاالحق وان جلست انحااااااااااااس البيت لازم عمل مستمر ةكرف وان نظفت غرفه وقفلتها انحاست الي جنبها

أنا صراحه أحس الترتيب في الصباح يخليك فاضيه طول اليوم

الله يفرج على الجميع والله يصب الارزاق عليكم صبا


لا تنسون قبل النوم سبحان الله

والحمد لله

والله أكبر


والاستغفار


وان شاء الله يرزقنا ويرزقكم النشاط والقوه والصحه والعافيه