تجربتي في ازالة حبة الخال من وجهي

السلام عليكم
ماشاء الله لا قوة الا بالله

سبحان الله والحمدلله والله أكبر
اهلين عزيزاتي
أنا شلت حبة خال بوجهي وقررت أكتب لكم عشان الكل يستفيد وراح احاول اتذكر التفاصيل لاني من زمان مسوية العملية من 8سنوات تقريبا بداية انا بوجهي حبة خال بارزة شوي بعدين تزوجت وحملت مرتين و مع الحمل زاد حجمها وصارت بارزة أكثر وحسيت انها صارت مشوهة وكنت بزيارة للرياض وقلت خلنيني استغل الفرصة وأشيلها طبعا قررت أروح لعيادات أدمة لأني ماأعرف غيرها
ورحت ودخلت واخترت دكتورة ناسية اسمها الحين المهم شافتني وفحصتني وسألتني اذا عادي أكشف عند دكتور عشان يقررون وش الأنسب رفضت فاختارت انها تصور الحبة بالكاميرا وصورتني بعدين راحت ورجعت وعلمتني وش راح تسوي

قالت عندك خيارين الأول بما انه الحبة كبيرة شوي فأكيد لها جذور تحت وقالت لو استأصلناها من جذورها راح يكون مكانها حفرة تشوه وجهك
الخيار الثاني راح نقص الجزء البارز ونساوي مكانه بالليزر عشان يتساوى مع الوجه وراح تبقى الحبة بس راح تكون بدون بروز طبعا اخترت الحل الثاني

وتمت العملية وكان سعرها 1000غير الأدوية والكشف ناسية السعر وطبعا بعد العملية كان المكان أحمر وأعطتني كريم ان ماكنت ناسية هو الدوكين أو اليكوم ماني متأكدة بس الظاهر الدوكين عشان الاحمرار وواقي شمس واستمر الاحمرار فترة وبدا يخف تدريجيا لين اختفى والآن الحبة فيه بس بدون بروز يعني بس لون أسود

وبس هذي قصتي بالتفصيل أتمنى اني اكون أفدتكن ولاتنسون تدعون لاولادي بالصلاح والهداية