قصة ولادتي بمستشفى سند (أبانمي)الرياض

السلام عليكم
يسعد لي هالمنتدى باللي فيه
حبيت أتكلم عن تجربتي بمستشفى سند كان اسمها سابقاً أبانمي لاني تعبت أبحث عن تجارب بنات مالقيت قلت أكتب لكم تستفيدون
هذا أول حمل لي وأحترت أي مستشفى أختار ورحنا أكثر من مستشفى وشاء القدر وأنا جايه من رحله طيران طويله أتعب تعب شديد لدرجة رحنا أقرب مستشفى وكانت سند، عجبني أهتمامهم وتعاملهم، المهم أستخرت وبدأت أتابع حملي عندهم جربت دكتورة سوريه أسمها فاتن عجبتني وفي دكتوره سوريه أسمها مي ماعجبتني لانها موسوسه مره، أستمريت مع دكتورة فلبينيه أسمها أليزا الله يسعدها أتعب وأنا أقول تجنن
لما أروح لها موعد تقعد تنصحني وتعلمني أشياء كثير تخص الحمل لدرجه صرت فاهمه اكثر من أخواتي الكبار ( اللي تتابع عند اي دكتورة عندهم ووقت الولادة تبغاها معاها تدفع 1000 ريال أوفر تايم)
(السونار عندهم واضح جداً فرق عن اللي جربتهم قبل وتعطيك حقك توريك العيون والرجول وتنادي زوجك يتفرج سبحان الله فرق بالاسلوب، أخر وحده جربتها عصبيه وماتخلينا نشوف زين تاخذ القياسات وتسكر مع أنو مافي أحد بعدنا)
نجي ليوم ولادتي :
كان موعد عادي جداً وباقي لي أسبوعين وأخلص التاسع جات تكشف أول ماشافت بطني قالت ولادة وكشفت من تحت طلع 5 سانتي تخيلو ماحس بطلق وهي تقولي فيك طلق وقاعدين يحوسون بأوراقي وزوجي مبسوط وأنا مصدومه كيف فيني طلق وأنا ماحس؟
لحقت وراها سألتها قالت أنتي ماتعرفين انو طلق الطلق أنواع
1_ألم بالبطن والظهر
2_ حركة الجنين للأسفل
3_ تقلصات داخليه بالرحم
انا نوع طلقي وقتها 3
المهم ودوني غرفتي أبدل وأشيل الشباصه والساعه وحتى الدبلة (ضاق صدري أبغى أموت بدبلتي خخخخ)
أعطوني تحاميل مسهله وودوني كشك الولاده وأجي أطلع جوالي بطقطق عليه قالوا ممنوع وأخذوة، قلت أبغى زوجي قالوا ممنوع دخول الرجال بس شافوا زوجي ناشب قالو تدخل بين فترة والثانيه دقايق وتطلع وصار يدخل يكلمني شوي ويطلع المهم جات دكتورة مي واعطتني أبرة ملينة لعنق الرحم مرتين خلال 6 ساعات وفكت موية الرحم عشان ينزل الجنين الحوض ويحمى الطلق وقتها مانزل الجنين الحوض بس بدأ طلق قوي مررررره وكنت اتالم بشدة بدون صراخ وهم مره حانين علي ودخلوا زوجي وصارو كلهم يطبطبون علي قالو تبين أبرة ظهر قلت أيوة ووقع زوجي وأعطوني الأبرة المهم بعد 12 ساعه بكشك الولادة إنخفض نبض الجنين فجأة لقيتهم كلهم عندي اللي تدفع من جهة بطني علئ تحت واللي تحاول وتدخل يدها تبغى تطلعه، فوق راسي دكتورة وتحتي دكتوره وحولي ممرضات فجأة اللي فوق راسي تبكي وتمسح على شعري وتناظر جهاز نبضات الجنين وتبكي؟
والثانيه تجري تلبس لبس العملية وتقول وين زوجك يوقع عمليه ويبدأ صراخ ينادوني كلهم ويدفون السرير وركض والله يابنات شي مو طبيعي مدري لأي درجه النبض نازل وصلوني على سرير يوديني لغرفه العمليات يقولون نطي نطي وأنا فيني المغذي وأبرة الظهر مخدرتني رميت نفسي بقوة على السرير الثاني مستغربة ليش ماشالوني وحتى لما وصلت لسرير العمليه رميت نفسي، المهم ولدت والحمدلله لحقوا على ولدي وطلع سليم معافى وجلست 3 أيام بالمستشفى وكل شوي تطلع ممرضة من كشك الولاده تطمن علي، والله بعضهم شفتهم مره وحده بس حانين علي حتى لما أجي موعد يبتسمون وكيف حالك ويجون ركض يحسبون معي البيبي ويضيق صدرهم يقولون مرة ثانيه جيبيه
وأنا منومة عندهم تجي ممرضه تشرح لي كيف أرضع ولدي طبيعي وتجيب ولدي وتخليني اطبق اللي تعلمتو مع إني تعبانه مقدر ارضعه بسبب الغرز بس شجعتني وصرت اتصل على الحضانه أطلبه وقت الرضاعه حتى جابو لي جهاز شفاط كهربائي ورضاعات فاضية اشفط وأعبيها وارسلها لهم يرضعونه
المهم تجربتي جداً جميلة بذي المستشفى ومستعدة أكررها
وأعذروني حاولت أختصر اللي عندها أي سؤال أنا حاضرة
اللهم صلي وسلم على سيدنا محمد