قصة ولدي مع نقص الأكسجين

طلعت من المستشفى ثاني يوم من الولادة ..سألت الدكتور ولدي مايطلع معي ؟

ضحك علي وقال بيجلس على الأقل 10 ايام وراح نسوي له رنين مغناطيسي ونشوف مدى تأثر الدماغ

رحت للبيت وانا ابكي .. اشين شعور بالدنيا تطلعين من مستشفى الولادة لحالك بدون مولودك

مضت الايام ببكا وتوسل وتضرع ودعاء .. وكنت اروح يومياً للمستشفى وارضع ولدي وادعي له وادعي للمواليد الي معاه

طبعاً نسيت اقول لكم ولدي حطوا عليه جهاز تبريد على راسه لمده 3 ايام وهو جهاز حديث للي يعانون من نقص الاكسجين (واعتقد له دور بعد الله سبحانه في شفاء ولدي)

مرت الايام و ولدي بدا يتعافى الحمد لله وشالوا عنه جهاز التبريد و وقفوا علاج التشجنات والحمد لله

بقى الحين اصعب شي بالدنيا .. نتيجة الاشعة !!!

قبل مايسوون اشعة الMRI رحت لمؤسسة مكة الخيرية بالرياض وتصدقت من حُر مالي مااخذت من زوجي ولا ريال ..تصدقت بالي ربي قدرني عليه بنية شفاء ولدي وان يطلع سليم

كنت مترددة اوافق ع الاشعة او ماخليهم يسوونها
ماكنت ابي اسمع شي مو زين عن ولدي

كنت ابي ولدي بحضني وبس .. والله مااتحمل اسمع شي مو زين عنه

سوو الأشعة و ولدي عمره 11 يوم .. ورحنا انا وزوجي للمستشفى نسأل عن النتيجة ، كانت رجولي ماتشيلني من الخوف ، شفنا الدكتور يممممه كأني اشوف ملك الموت استغفر الله ياربي قلت لزوجي رح له لحالك انا بجلس هنا ماابي اسمع شي .

راح زوجي للدكتور وانا واقفة اشوفهم من بعد مترين تقريباً

لحظات صععععبة الله لايذوقها احد

وجاني و وجهه يبشر الحمد لله وقال لي ع النتيجة
ولدي سليم و دماغه سليم ماتضرر من نقص الاكسجين .. الف الحمد لك يارب


الحمد لله الحمد لله الحمد لله


ربي رحمني واستجاب دعائي وصرف الشر عن ولدي


كبر ولدي وكنت اتابع نموه بشيء من التخوف .. وكان كل شي طبيعي الحمد لله

كنت لما اروح اطعمه واقول للدكتورة حكايته تطالع فيني وفيه باستغرااااب شديد والله نظراتها كانت ترعبني الله يسامحها

واروح لزوجي واسأله انت متأكد ان نتيجة الاشعة سليمة .. جننته بهالسؤال ، كنت اخاف يكذب علي
بنتيجة الإشعة


وانتهت هالقصة بسلام بفضل الله سبحانه وتعالى وتعلمت منها ولازلت اتعلم واذكّر نفسي بفضل ربي علي

ولدي متعبني الحين بشقاوته :) واتذكر قصته واحمد ربي وادعي يطول بالي عليه


-يتبع -

دروس وعِبر من قصتـــي :


1- الصدقة الصدقة يابنات فائدتها عظييييييمة
وتصدقوا داااااايماً والصدقة زي ماانتم عارفين تدفع البلاء .. تأملوا هالجملة .. تدفع البلاء

طبعاً الصدقة قبل وقوع البلاء افضل ، عشان كذا تصدقوا داااااائماً

2 - الدعاء الدعاء ...كنت ادعي بخشوووع تام " يامن تحيي العظام وهي رميم اشفي ولدي واجعله سليم معافى

3-انا كنت في حملي ادعي ربي يرزقني بولد حلو وجميل .. كان يهمني الشكل كثيييييير وماكنت اعرف قيمة الصحة والعافية .. فالحوامل دايم خلي دعائك بالذرية الصالحة المعافاة ثم ادعي بالأشياء الثانوية


واخيراً يعلم الله اني كتبت هالموضوع للفائدة ويشهد الله اني ادخل بين فترة وفترة لقسم ذوي الإحتياجات الخاصة واشوف واقرأ معاناة امهات الاطفال المرضى .. وادعي لهم من كل قلبي لاني عشت حياتهم لفترة



وابشركم اني جبت بعد ولدي بنوتتي سومه وكانت ولادتها من اسهل مايكون والحمد لله ، بفضل الدعاء والصدقة

واسأل الله ان يصلحهم ويعينني على تربيتهم ويصلح لنا ولكم النية والذرية

الحمد لله رب العالمين اولاً واخيرا
فعلا الصدقة والدعاء تاثيرها عجيب

الله يخليلك ماعطاك يارب

حبيبتي والله تأثرت لقصتك جدا الحمدلله ربك اكرمك وشافى ابنك الف حمدوشكر صديقتي اسم الله بنتها نفس الشي بس اثر نقص الاوكسجين على عقلها وظلت مشلولة ماتتحرك الله يحمي اولادنة واولاد جميع المسلمين

سبحان الله

الحمدلله والله يحفظ لك عيالك

مفروض يعطوناا دورات عن طريقة التنفس والدفع

الله يحفظ اجنتنا ونولد بصحه وسلامة