في خاطري شئ وابي افضفض

أخواتي الحبيبات في عالم حواء .... عالمي المفضل وفي هاذا القسم بالذات تأخر الحمل,

ما أدري حاسه بضيقة وحابه افضفض لكم وأقولكم الي بخاطري وياريت ماتنسوني من دعائكم ..

انا لي 21 سنه ماحملت عندي بنت الله يحفظها ويخليها لي ,

ومن كان عمر بنتي 3 سنوات بدأت في دوامة المستشفيات والعلاج ومن طبيب للآخر ومن مراخه لأخرى

ما اسمع عن طبيب اومستشفي نفع علاجهم إلا وطيران لهم لعسى ولعل يكون العلاج على يديهم . تعبت نفسيتي وتغير جسمي وتساقط شعري من الأبر والهرمونات ومن التفكير الي كان يلازمني اثناء العلاج , واصبح كل همي متى أحمل

وتوالت العمليات مابين منظار وكحت وتنظيف وعمليات أطفال الأنابيب والحقن المجهري وتلقيح صناعي وكل ما يخطر في بالكم ,وما يصاحبها من أبر وخسائر مادية .تعرضت لكل ذلك وانا صابرة ومحتسبة وموكلة امري لله .

وفي كل مره يقولون لي سبب عدم الحمل مرة لخبطة بالهرمونات ومرة ضعف بالتبويض وهلم جرا ,

كنت اتمنى ان انجب اخ أو أخت لبنتي علشان ماتكون وحيدة فهي تحب الأطفال جداً وفي تلك الفترة كنت اسمع كلام كثير يضايقني ممن هم حولي وكنت اصبر واحتسب والحمدالله ..

زوجي في تلك الفترة عمل فحوصات وكانت الحيوانات المنويه أقل من الطبيعي بقليل وبناء عليه اخبرنا الأطباء انه

قادر على الأنجاب . وكان هذا آخر تحليل يسويه من 13 سنه واعتمد على هذة التحاليل في جميع مراجاعاته .. وبعدها بفترة اي من حوالي خمس سنوات ذهب لطبيب متخصص في امراض الذكورة وسوالة تحليل

لقى عنده دوالي ,وقال لازم عمليه ونسبة نجاحها 70 % سوا زوجي العملية وما اضنها نجحت لأنه بعدها صارت كل تحاليله صفر إلى وقتنا الحاضر ,

خلال سنوات حياتي سويت حوالي 10 عمليات حقن مجهري وانابيب العملية التاسعه طبعا مافيه حيوانات منويه

قالوا لزم نأخذمن الخصية وسوا له خزعه ولقوا حوالي 4 حيوانات منويه صالحة للتلقيح

بس الدكتور بعد ما اعطاني الأبر وبدأت كورس التنشيط وسحب البويضات ما تلقحت ولا بويضة وأضطر

الدكتور لألغاء العملية .. ساعتها تعبت وأنهرت يعني عمليتين لي ولزوجي وما يصير تلقيح .. يارب لطفك ورحمتك ..

واستعنا بالله بعدها بست شهورقررنا تكرار التجربه بعد ان أكد لنا الدكتور انه سيتلافى بعض الأخطاء الي صارت في المرة السابقة .وقال بأن المره الجايه ستكون بأذن الله افضل وتوكلنا على الله وسويتها للمرة العاشرة وتم اجراء عمليه لزوجي ,,

وتم سحب حيوان منوي واحد والحمدالله على كل حال وبعد رحلة الأبر والتنشيط تم سحب 3 بويضات تلقح منها واحدة فقط وتم ترجيعها , ومرت الأيام وانا على أحرمن الجمر......:44:


طبعا كالمعتاد التحليل بعد اسبوعين مرت كأنها دهر وبعد12يومو بدون علم زوجي اشتريت التحليل المنزلي

وحللت كانت المفاجأة طلع لي خطين .. ما صدقت عيوني يمكن مرت نص ساعه وأنا ابحلق في الجهاز يمكن غلط يمكن يتهيأ لي او يمكن انا استعجلت في التحليل وهذا من مفعول الأبر .. ما صدقت رحت ابحث في النت عن الحالات المشابهة وكل ما لي وازداد حيرة قلت خل اصبر يومين واشوف وبعد يومين جبت جهاز ثاني ونفس الشئ يطلع لي خطين بس هالمرة الخط واضح جدا .. واروح اوريه بنتي واخليها تشوف يمكن احوليت , قالت فعلاً خطين بصراحه ماني مصدقه معقولة بعد 21 سنه يصير حمل يارب ما أكرمك يارب ما ارحمك وجلست ابكي من كل قلبي :icon33:من الفرحه وكل هذا وزوجي في العمل مايدري عن شئ ما حبيت اقوله لمن أتأكد واتصلت على ولد أختي يوديني للمستوصف القريب من بيتي ...

ابغى أحلل دم قالوا بعد ساعه تبين النتيجه وولد أختي وراه جامعه يبغى يروح وصلني للبيت وبعد ساعه ... يا طولها

اتصل على المستوصف ما يردون واكر نفس الشئ ما يردون وأخذالشغالة واروح بلموزين للمستوصف وطيران على المختبر قبل ماينتهى دوامهم وتجيب الممرضة النتيجه واطالع في الورقة مكتوب بالأنجليزي بريقننت يعني حامل

ما صدقت سألت الممرضه عن النتيجه ابغى اسمعها بأذني قالت ايوه مدام حامل .

واحظن الشغاله من الفرحه وابكي ماني عارفه وش اسوي وتجلس الشغالة تبكي معاي ..

يتبع بأكمل لكم قصتي