السلام عليكن ورحمة الله وبركاته ..
صباح الخــــيرات ..
كثير من الأخوات يطلبون مساعدات لأفكار حلاوة العيد سواء للأطفال أو الكبار
وحاولت أعصر مخي قدر المستطاع وأطلع لكم بكم فكرة تستفيدون منها ..
أدري إن الوقت متأخر بس إذا فيه أحد مثلي مابدا بشيء راح يفيدها هالموضوع ..
بسم الله نبدأ ..
الأفكار التقليدية ..
1 _ يكون الحلاو بسلة ويوزع توزيع عادي والجميع عارفها وتكون للأطفال والكبار .
2 - علب جاهزة من أبو ريالين بأشكال وألون مختلفة تعبى حلاو وتوزع على الأطفال .
3 - تجيبين خيش تقطعينه على شكل مربعات وتحطين بكل مربع الحلاو وتمسكينه من فوق
بشريطة وغالبا ما تكون للكبار بس ما فيه مانع تكون للأطفال وممكن تستخدمين السلوفان بدل الخيش .
4 - تجيبين سيارات من أبو ريالين يصير فيها مكان للحلاو أظن اسمها ( الشيول ) مب متأكدة وتحطين
الحلاو بالمكان الموضح في الصورة للأولاد ..
وللبنات اشتري شناط عادية حلوة ومليها حلاو طبعا هاذي فكرة للعجازات ..
الأفكار المقترحة ..
1 - تجيبين طرابيش الراس اللي تكون على شكل مثلث وتملينها بالحلاو وبالون وأي شيء وتغلفينها بسلوفان
وتربطينها من فوق ويفضل يكون السلوفان شفاف لأن الطرابوش عادة مرسوم عليه رسومات حلوة للاطفال ..
2 - تجيبين دببة ولا عرايس صغيرة ( ولا تنسين تكون بدون عيون أو شيليها ) وتكون من اللي يدينها مشبكات
ببعض أو قريبات من بعض بحيث إنك تقدرين تحطين حلاو بينهم ولا يطيح .. إن شاء الله فهمتوني ..
3 - تجيبين جوارب التريكو أو الجوارب الخفيفة ويكون فيها مع بداية القدم شريطة تربط فيها مخيوطة مع الجورب
نفسه وتحطين الحلاو والبالون بداخلها ويفضل يكون فيه حلاو اللي على شكل أنبوب وتكون طالعة من الجورب
ويصير شكلها كأنها الساق .. صعبة شوي :( ..
4 - طريقة سهلة جدا تجيبين ورق الكريشة وتقطعينه على شكل مربعات متوسطة وتملينها بالحلاو ما عدا
الأطراف ومن عندها ( الأطراف ) تمسكينها بشريطة ويصير شكلها مثل حلاو ماكنتوش بس حجم كبييير .. فكرة قديمة شوي بس جديدة على البعض ..
5 - تجيبين أكواب سادة وتلزقين عليها أشكل حلووووة وتحطين بوسط الكاس قش بأي لون تحبينه إلى ما يكون الكاس
مليان قش وبعدها تحطين الحلاو فوقه بشكل حلو وتنثرين عليه ترتر أو شيء لماع وبعدها تكون جاهزة للتوزيع .. تقريبا نفس الصورة ..
6 - هالفكرة تضحك شوي .. جيبي لوحة سادة بأي لون وقصي على شكل مربع كبير ولزقي عليه أشكال حلوة
وجدابة بعدين لفيه على بعض ويكون شكله اسطواني فاضي من الوسط وقصي دائرة على حجم الإسطوانة ولزقيها
من تحت وقطعة من فوق عشان تصير على شكل إبريق ولا تنسين تفتحين لها فتحة كبيرة وبيوم العيد جيبي كيسان
حلوة وصغيرة والإبريق معبأ حلاو وكل طفل عطيه كاسه وصبي له حلاو ..هههه حلوة هاذي وخربوطية بنفس الوقت :42:
7 - فيه مكعبات عند محلات الألعاب التعليمية كل مكعب عليه حرف , أنت خذي الكعبات على حسب أحرف أسماء
الأطفال وإطبعي كروت معايدة ولزقيها عليها ودخلي في المكعب حلاو ( المكعي تقدرين تفككينه قطعة قطعة ) هاذي
الفكرة مكلفة شوي :09:
8 - تعرفون الإصيص ( العلب اللي كون فيها النباتات ) تشترينها وتصبغينها بألوان طفولية أو تلزقين عليها أشكال
جذابة وتملينها حلاو وبالأخير تجيبين حلاوة المص ( اللي تجي الحلاوة نفسها كبيرة ) وتحطينها بالوسط حتي تبين
كأنها وردة حلووة .. ( الإصيص شايفته عند الشامل على ما أظن ) ..
الأفكار المقترحة للكبار ..
1 - تجيبين صندوق كبير خشبي وتملينه بالقش الأحمر وتجيبين حلاو وتحطينه بأكياس أورجنزا حمراء وتصفينها
بالعلبة والحلاو يكون غلافة أحمر ( الحلاو والأكياس موجودة عند أنوش ) والباقي من الحلاو ترمينه بشكل عشوائي
بالصندوق وتجيبين كرستالات حمراء ( متوفرة عند أبو ريالين ) وتحطينها على جنب عشان يبين كأنه صندوق مجوهرات ..
2 - تجيبين سلة عادية وتطين فيها أعواد من أغصان الشجرة وإذا ما لقيتي جيبي قش بني بس يفصل أعواد شجر
يااابس وتحاولين يكون شكلها مثل عش العصفور وتشترين حلاو البيضة وتفرغينها وتصبغينها بالأبيض بالبخاخ وتحطين
فيها حلاو زييين وتصفين البيض في نص العش وتجيبين كتكوت أو عضفور صغير من أبو ريالين ويطلع يا سلااااااااام :32: ..
3 - بدل ما توزعين الحلاو بسلة جيبي أغطية علب بأحجام مختلفة وزينها من برا على الأطراف بقصاصات
أشكال متنوعة ( موجودة عند جرير ) أو تحطين كلمات معايدة وتسوينها بكل العلب وبعدين تجيبين عود وتفتحين
فتحة صغيرة للعود في وسط كل غاء وتدخلينها بالعود الحجم الأكبر فالأصغر وتملينها بالحلاو وأعلى شيء تحطين
فيه أي شكل حلو وكبير يخفي العود مثل الصورة ..
هاذي بعض الأفكار وأتمنى تساعدكم ..
واللي ما عجبها شيء تروح للسويلم وهناك راح تطلع لك أفكار كثيييييييييرة وغريبة ..
أو اقعدي ناظري في أغراض غرفتك وتطلع لك الأفكار من الأشكال المتوفرة عندك ..
وأي وحدة عندها فكرة تكتبها لنا الله يجزاها خير ..
دمتن بخير ..