السلام عليكم ورحمه الله وبركاته
المرحله الاولى :
تزوجت وكملت 8 شهور بدون حمل وطول هالفتره ام زوجي كانت تسأل ومن تشوفني اكل شيء قالت هذا ياخر الحمل وهذا مدري شيسوي لين كرهت عمري ورحت المستشفى عملت تحاليل وطلعت النتيجه نسبه التبويض 1 المفروض تكون 24 بس هذا نصيبي
طبعا اختكم في الله ماخلت مراخه ولا خلت مراميه ولا قرفه كل شيء بلعته ومافي فايده
وطول الوقت كنت شاكه في زوجي وابيه يحلل لانه حرام اعالج واخرتها يطلع السبب الرئيسي منه وطبعاا زوجي العزيز موراضي يسوي التحليل لكن ماخليته لين حطيته جدام الامر الواقع قلت له عندي تحليل بهاليوم يوم وصلنا قلت له يالله سوي التحليل :laughing:
وطبعا زوجي واثق الف بالميه انه مافيه شيء وهذا طبع رجالنا الله يهديهم
استملنا نتيجه التحليل وحجزنا موعد عند الدكتور محمد الدرازي وكشف عليه وقال لنا نتيجه التحليل مافي حيوانات منويه وكشف ع الخصيه وقال فيه دوالي بس لازم نتاكد اكثر عطانا اشعه نسويها وطلع عند زوجي 3 دوالي حجم كبير ولكم تتخيلون مدى صدمتنا والحمدلله ع كل حال طبعا الدكتور سالني اذا عندي اي شيء يمنع الحمل وقلت له ماعندي تبويض وسالته هل ابتدي علاج او انتظر تحسن حاله زوجي قالي اصبري لاتعالجين الحين .
المرحله الثانيه :
بدايه العلاج الدكتور وصف حق زوجي حبوب يستخدمها مدتها 3 شهور وطبعا الحبوب ماتنصرف الا بوصفه طبيه وبعدها نوقف جماع 3 ايام واليوم الرابع نحلل وانتهت المده وسوينا التحليل والنتيجه صفر لايوجد اي حيوان منوي الدكتور قال لنا لازم عمليه لازاله الدوالي لانها السبب في عدم وجود حيوانات منويه تم اجراء العمليه بتكلفه 800 دينار بحريني (8000 ريال سعودي ) في مستشفى الكندي مده العمليه ساعه وحده فقط وبعدها يرتاح ساعتين وعقب يطلع من المستشفى وبعدها وصف لنا حبوب مده 3 شهور وبعد ماكملنا الفتره المحدده سوينا التحليل ونفس الشيء لاتوجد حيوانات منويه الدكتور يقول الحبوب مفعولها بطيء فقال احسن شيء يبتدي كورس ابر الهرمون وسعر الابر (500 ريال سعودي اي 50 دينار بحريني ) ناخذ الابر من السلمانيه الطب الخاص طريقه الابر تنضرب في العضل وهي نوعين النوع الاول 3 مرات بالاسبوع والنوع الثاني مره وحده بالاسبوع ونفس المده 3 شهور طبعا اختكم في الله محبطه وكنت احس الدكتور يلعب علينا
بس ياخذ فلوسنا لكن في امل بسيط في داخلي يقولي صبري كملنا 3 شهور ورحنا للدكتور
وانا خايفه وزوجي نفس الشيء والدكتور طمنا بان العدد صار 3 مليون لكن بدون حركه وفيه صديد وتشوهات ورجع الاحباط يحتويني طبعا الدكتور قال دام في تحسن بالعدد راح نعيد الكورس و نركز على العدد لين يوصل 10 مليون بعدها نعالج مشكله الحركه و التشوهات والصديد لانها سهله وومضت 3 شهور الثانيه ورجعنا للدكتور وكان متفآل يقول العدد صار 6 مليون ونفس الشيء بدون حركه وتشوهات وصديد استمرينا بعد 3 شهور على نفس الكورس ووصل العدد 10 مليون واستبشرت خير وقالي الدكتور خلاص الحين لازم تعالجين طبعا انا قلت له تصرف حق زوجي علاج للحركه والتشوهات والصديد في البدايه كان رافض لانه يقول الحركه والتشوهات والصديد علاجها سهل .
المرحله الثالثه :
طبعا انا ماسمعت كلام الدكتور ومن صارالعدد عند زوجي 3 مليون بديت انظم الدوره لانها مو منتظمه ورحت للدكتوره وصرفت لي كلوميد ماعندها وقت الاخت وخليتها تولي وانا طبعا اغلب وقتي في قسم المتاخرات اتابع المواضيع بصمت فقريت المواضيع عن حبوب الدفاستون لتنظيم الدوره واستخدمتها حبه الظهر وحبه بالليل من 16 من يوم الدوره الى 26 من يوم الدوره وبعدها اوقف وتنزل بعد 5 ايام واصلت ع الحبوب 6 شهور تقريبا واخر شهر خذت مع الحبوب كلوميد من ثاني يوم الدوره الى خامس يوم الدوره حبه الظهر وحبه بالليل وجاء موعد الدوره ومانزلت تاخرت 10 ايام وكنت خايفه احلل وانصدم :rotaeye: وزوجي رافض احلل يقول اصبري بس طبعا ماقدر ماحلل كل شوي اقول حامل وعقب اقول لاموحامل ومافي اعراض دوره ابد كلمت اختي تجيب لي تحليل بول وسويت التحليل وطلع لي خطين واضحين وطبعا كنت قاعده من نومي وسيده احلل :laughing: ومن شفت الخطين طلعت من الحمام الله يعزكم اركض ابشر زوجي فقير كان نايم وانا اصيح وحالتي حاله قلت له لازم اتاكد من النتيجه فرحت احلل بالمستشفى دم وفي الطريق كنت اقول لايكون انا ماشفت عدل لاني قاعده من نومي وارجع اطالع التحليل واقول اشوى الخطين ماراحوا :laughing:
حللت وطول الوقت كانت مشاعري ملخبطه بين خوف وفرح وطلعت حامل والحين انا في السادس دعواتكم لي الله يسهل ولادتي .