مرحبا خواتي العزيزات
أختكم البحريينية وايد تحب المطبخ .. ولي بين الفترة والثانية تجارب ولكني للحين على قدي في الطبخ
وانا وياكم علشـان استفيد من خبراتكم .. وبعد علشان اعطيكم من خبرتي المتواضعة
عموماً هذي طريقتي في مچبوس الدجاج وإن شاء الله تعجبكم
المقادير ...
أرز حسب الرغبة ويغسل وينقع في ماء بارد
بصل مقطع حسب الرغبة .. انا احبه جوانح
ثوم مفروم انا استخدم تقريباً 5 فصوص وممكن تزيدونه او تنقصونه بكيفكم
دجاج مقطع اثمان ومنظف وأنا ازيل الجلد بسس اللي تحب تتركه بالجلد براحتها
جزر مقطع لقطع كبيرة شوي
كوسا مقطعة لقطع كبيرة شوي
بطاطس مقطع قطع كبيرة
طماطم كبيرة واحدة او اثنتين بالكثير مقطعين
صلصة طماطم حوالي ملعتين
كزبرة منظفة ومفرومة
ملح ، بزار ( هذا بهارنا معروف طبعاً في الخليج ) ، كركم ، فلفل احمر ، جلجان .. وممكن اضافة اي بهار تحبونه
1 أو 2 ليمون اسوود صحيح ومهم ان نسوي فيهم فتحات بالسكين علشان تطلع لها النكهة مع الرز
قطع من الزبد
الطريقة ..
اول شي في مقلاية نقلي قطع الدجاج بدوون اضافة الملح او البهار وما يحتاج نخليها تنضج بسس المهم انها من برة تتحمر بشكل خفيف ونشيلها ونتركها على جانب وهذي الخطوة راح تخلي الدجاج متماسك وطعمه لذيذ
في قدر الطبخ نحط البصل والثوم مع الزيت اللي قلينا فيه الدجاج ونغطيه ونقلبه كل شوي الى ان يصير لونه اصفر
نضيف عليه الطماطم ونغطيه الى ان يلين شووي حوالي دقيقتين
نضيف صلصة الطماطم والبهارات والملح والليمون الاسود ثم قطع الدجاج والخضار المقطعة ( البطاطس والجزر والكوسا ) ونحرك الخليط ونغطيه ونتركه على متوسطة حوالي 7 دقايق علشان الدجاج والخضار ياخذون النكهة
الحين نحط عليهم ماي يغطي جزء كبير من الدجاج والخضار بسس مو واااايد علشان لا تصير الطبخة مهروسة
ونغطيه ونخليه على النار تقريباً 35 دقيقة وممكن لو حسينا ان الماي قليل على الدجاج والخضار نضيف له شووي
بعد مرور الـ 35 دقيقة بيكون الدجاج نضج نجي نضيف الرز المصفى من الماء ونحرك شوووي ونلاحظا ن مستوى الماي اعلى من الرز بحوالي 2 سنتي مو اكثر ولازم تكون النار عالية .. وفي هذي المرحلة ممكن نجرب طعم المرق ونتأكد من الملح لو كان قليل ممكن نضيف له شوي ملح
نضيف الكزبرة المفرومة ونخليه ونلاحظه كل شوي الى ان ينشف الماء .. لما ينشف الماء نخفف على النار ونضيف قطع من الزبدة على الوجه ونخليه على نار جداً هادية الى ان ينشف الماء تماماً
وبالعافية على قلوووبكم
وأتمنى تعجبكم طريقتي
تحياتي :26:
البحريينية @albhryyny
عضوة جديدة
يلزم عليك تسجيل الدخول أولًا لكتابة تعليق.
غلا الزهور
•
يعطيك العافيه جزاكي الله خير:26:
الصفحة الأخيرة