قصتي كامله ،، من الالف الى الياء

صباح الخير خواتي الغالياتشخباكم عساكم طيبين
حبيباتي انا كنت من اكثر العضوات فعالات في هذا القسم
والبعض طبعاً بيعرفني لو لحق علي ،، انا اليوم راح اخلي قصتي بين ايدكم لعل وعسى احد يستفيد او ياخذ العبره والفايده
انا الله يسلمكم تزوجت من ثلاث سنوات وانا كنت اموت بشي اسمه اطفال منات عيوني ، وكل اطفال عايلتنا يحبوني لاني حتى لو بجمعة ناس او عزيمه احب اسولف مع الاطفال احبهم جدا جدا ، طبعاً انا ابغى احمل من اول شهر كنت احاول واتمنى وادعى ،، المهم بعد الزواج ماجاتني الدوره الشهرية ،، انتظرت وانتظرت ،، ماجات شهر شهرين ،، خبرت ام زوجي وكلي امل اكون حامل ،، رحت العياده طلع التحليل سلبي -اللهم لك الحمد-
انتظرتها عقب مانزلت ، رحت مستشفى اخذو مني تحاليل وسونار وقالوا معاج تكيس بالمبايض ،، من هنا بدأت رحلة العناء
فالبدايه اخذت دواء كلوفاج شهر تقريبا وتعبت منه واستنريت وصبرت على الالم والغثيان والتعب وصبرت بس الغلطه كان وزني يزيد لاني كنت اكل عادي مو ماخذه حميه
رحت عقب للدكتورة غيرها ، رحت لها بناءاً على مدح بعض المنتديات ودخلت معاها كان معاها زحمة جدا ومو فاضيه حقي قالت تفضلي هذه الورقه وتفضلي هذه حبوب واشربيهم وانتظري الدوره وثاني يوم روحي اخذي فحص
واخذت الحبوب وجات الدوره ورحت اسوي فحص قالولي معاج نقص حاد في فيتامين دال + تكيس مبايض شديد
ورحت لها عقب ومافي فايده
قررت اغير الدكتوره واذهب الى دكتوره مشهوره تعالج بالاعشاب
ماعجبتني وحسيت نفسي اضيع وقت طبعا رحت لها مراجعات اكثر من ثلاثة شهور
وكانت تقول لي نحفي رغم ان وزني كان 60 فقط
غيرتها وتميت ابحث عن دكتوره افضل وطبعا نفسيتي كل مالها وتنحدر اكثر ، كنت في وضع صعيب
نفسيتي سيئه من علاجي ، وزوجي مل من سوالفي الي كانت كلها حمل واطفال وعلاج وفلانه حامل وفلانه
وهو كان يتمنى لانه وايد الناس يسالونه ويقولون له اخذ زوجتك عالجو وفالبيت انا نفسيا تعبانه فكان يطلع عني ويخليني بروحي كله كا ضدي وكنت ف غربه ماعندي احد ابد
صبرت ،، وكانو الناس يطلعون يستمتعون انا اطلع اروح العطار لاخليت قسط هندي ولا ميراميه ولا مرقدوش ولا اي عشبه فالدنيا ما اخذتها مافي فايده بالعكس كثرت الاعشاب طلع معاي كيس فالمبيض
وبدت رحلة علاجة الصعيبه ،، والنفسيه من سيء الى اسوء
صرت اكره اطلع مكان ،، الناس كلهم يسالوني ها ماحملتي؟
شفيج ليش روحي عالجي ،، هذا بصوب ولما يرسلون لي ارقام اللي يمسحون ويمرخون ،، هذا يدلني على اكبر مستشفى وهذا يدلني على دواء من باكستان وهذا يعلمني وضعيه وهذا وهذا وانا اللي فيني كااااافي
بعض الناس يشوفون هالموضوع عادي بس وقتها كان الحمل مسيطر على وضعي وتفكيري وحياتي
تميت اطلع واروح واجي ابغى اغير جو ولكن للاسف مااحس بطعم اي شي ،، كنت اذا اشتريت لبس اقول مااريد البسها وانا في شي ناقص فرحتي مو كامله
وملابسي كل مالها تزيد وتزيد وساعاتي والشنط والبدلات والماركات والعبايات وكنت مااحس بطعم اي شي
كنت اكره كلمة -عقبالج- ،، واكره شي كان لما تجي وحده تسوي نفسها تطبطب علي وتقول انتي مرتاحة بلا اطفال وهي البزران بحضنها ومافي شي ينقصها
واذكر مره طفله قالت لي انتي عاقر
قلبي كان ينزف الم وكنت اخبي ،، وكنت اترجى زوجي بس يوديني يوم واحد لأمي .. مو عشان شي ،،، بس عشان ابكي
كان اي كلمة تعور قلبي وتجرحني اركض لغرفتي وابكي وابكي
كان وقتي كله من منتدى ل منتدى ومواقع طبيه وتجارب ووصفات وخلطات -وكله بلاش-
وكنت اخذ كل شهر كلوميد واروح اتابع وكل شي يكون تمام واكون متامله اقصى درجة
ويجي اخر الشهر ويطلع سلبي وتجي الدوره وانهار وابكي واحزن وكنت تعبانه نفسياً وزني نزل ووجهي شحب
كرهت الطلعات والجمعات والناس والاهل والاسئله وكل شي
وصرت بروحي وحساسه لأبعد مدى
لدرجة ابو زوجي قال لزوجي اخذ زوجتك لمطوع مو طبيعيه صايره
وكان الجميع يسالني شو فحوصاتج شو صار
بأختصار ؛
كنت في ضغط شديد جداااااا
عقبها
قررت ادخل الجامعه لعل وعسى تاخذ وقتي شوي
لان زوجي كان من الصبح لين الظهر بالدوام : يرجع ينام :
يقوم يروح لاهله ويجي مغرب وعقب يطلع مع اصحابه وانا بروحي اه بس اه
مره قلت له اريد اروح لاهلي
ورحت وقعدت اسبوعين .. ارتحت نفسياً وحاولت اتناسى موضوع الحمل ، كنت افضفض لامي وخواتي واخواني وابوي
مو كأني متزوجة ارتحت ،، واخواتي كانو نفسي ونفضفض
وعقب اسبوعين تاخرت الدوره جيت ابغى اخذ قرفا
قالت لي امي لا يابنتي فحصي اول قلت يمه عاد سنين وانا اعالج وماحملت
احمل وانا بدون علاج!!!!
رحت احلل
والنتيجة
حاااااامل ،،،
ماصدقت حسيت نفسي بالسما وصرت ابكي وفرحت
وامي تحضني وخواتي وانا ابكي وخبرت زوجي وراح خبر اهله من فرحته وكل احد يبارك
وفجاه
نزل دم
ورحت العياده قالو لي الجنين وقف نموه
قلت الحمدلله -وتعبت جسديا ونفسيا من الالم ورحت لاهلي
وكان نزيف وتعب والم وموت احلام وكل شي
رجعت مو حامل
عقبها كثفت علاج وادويه ماخليت اي وصفه ولا محلات كبسولات طبيعية ولا اي شي
وتميت كذا 9 شهور والنفسيه ماااااااااااش
بعدها طلعو خواتي حوامل وسلفاتي اللي معاي بنفس البيت وبنات خالاتي وخوالي وكل اللي اعرفهن حملو ماشالله كانهم متفقين
وكنت اتحسس من اي احد يتكلم عن الحمل او موضوع الحمل او اي شي يخصه
انا مو حقوده وربي بس اللي حست بمعاناتي راح تفهم وتحس بأحساسي
وكنت ادعى ابغى احمل خلاص
كنت احس (((( بنقص)))) احس اني مختلفه عن الناس
كنت كله تفكيري فالبويضات والدوره وسونار ومدري ايش
قررت ارجع المستشفى
ورحت لدكتورات ف دكتورات وكانو يذمون دكتوره هنديه يقولون ماتفهم
وانا جربت كل الدكتورات وكانت سياستهم انحف وكلوميد وابر تفجيريه
لين قلت فنفسي ليه يا احاسيس ماتروحين للهنديه اللي كل المريضات عايفينها
ورحت لها
خبرتها قصتي بالتفصيل
قالت شوفي : انتي تبين بيبي؟
قلت ايوه ابغى من سنين
قالت انتي تضيعين وقت
لو تبين بيبي روحي مراكز مختصه بالاطفال والانجاب والعقم
ودلتني على مركز مختص
زرعت فيني الامل ، قلتلها عالجيني بكلوميد هالشهر ولو ماصار راح افكر
طبعا ماصار حمل
رحت لزوجي ،، رفض وبشده قال لا
حاولت مني مناك اقنعه كان راااااااافض
قلت له طيب عادي مانبي بس نروح نتطمش ونشوف
ولما رحنا قلت للدكاتره ان كيف وكذا وحاولو يقنعونا ان الطب تتطور وان مافي ابد موضوع اختلاط انساب وفي اكثر من طريقة تقدرون تتاكدون وان هذا شي يحاسب عليه القانون وكذا
بدى شوي شوي يقتنع
وعقب رحنا شوي نتمشى كم يوم قبل العلاج ومشوار العلاج
رجعنا وعقب سافرت مع امي وابوي واهلي وارتحت نفسياً
ورجعت وبديت علاج
طبعا كنت متامله وواثقه 100٪ انه راح تنجح عمليتي
طبعا اخذو فحوصاتنا
وعطوني خطة علاج وبديت ابر وادويه لين جاء يوم العمليه
رحت بسكات وبنجوني واخذو مني بويضات وتم تلقيحها
واتصلو فيني عقبها بيوم قالو ماشالله الاجنة ممتاااازه جدا
فاليوم الخامس تعالي نرجع لك اياهم
رحت وتم الترجيع والحمدلله
رجعت البيت وتميت اسبوعين فالفراش لين موعد التحليل
كنت احس شوي بالالام وافراز بني وكذا
اجزمت بأنه حمل رحت اسوي تحليل الدم
وكانت النتيجة
سااااالب
مافي حمل
اللهم لك الحمد
بديت اوصل لمرحلة الياس والاحباط وانهرت نفسيا وجسديا وعقليا واجتماعيا وكل شي
وعانيت وتعبت وتحطم زوجي واعتزلت الناس خلاص مالي خلق احد يكلمني
حذفت كل برامج التواصل من جهازي مالي خلق اي احد يسالني
حتى اذا احد رسل لي كيفك يجيني ضيييييق
جلست شهر
وعقب قلت بطلع للناس خلاص
ورحت عزيمه
وكشخت ورحت الصالون واشتريت احلى بدله واكشخ عبايه
وتمكيجت وكنت فقمة اناقتي
وجلست الا بنات عم زوجي وسلايفي كانو حوامل ويتسالون
ها كم صرتي كم بقى وين ناويه تولدين وين مدري شو
ويتكلمون عن تجهيزات البيبي والاغراض
وانا زي الاثاث صنم كنت اقول الله يهنيهم وما اخذ فقلبي واضحك
الا وحده تجي تحرجني قدام الحريم والناس اللي بالعزيمه
قالت ها مافي شي جاي؟
قلت لا
قالت شو فيج بالضبط شو فيج للحين ماحملتي غريبه
قلت الله ماكتب
قالت روحي عالجي حملي لاتخلين نفسج كذا
تخيلو معاي الموقف
انا ابتسمت وقلت لاحقه عليهم الحين ادرس
ورحت وطول الطريق فيني حره وقهر والم
جرحتني امام الجميع واستفزت الجرح اللي اعانيه وماخليت شي وماسويته
اقسم بالله العزيز ،، لو في تشبيه للموقف ساعتها
ماراح يكون اقل من فرك الملح على الجرح وهو داااامي
كسرتني خلتني اكره اللحظه واكره الكل اللي موجود
تمنيت الارض تبلعني
انا اعاني وبعد الم ومعاناه حاولت استرجع شي بسيط من وناستي وبالقوة قدرت اطلع للناس
بس طيحتني من جديد
رحت طبعا مابينت
ولما وقفت يم الباب برااا اذكر اني رفعت ايدي وقلت يارب اكرمني بكرم عزيز مقتدر
من الهم والنفسيه الصعبه صليت استخاره ابغى انابيب وعلى طول جاتني الدوره على طول ثاني يوم
وقررت اروح اسوي انابيب خلاص مافي حل
وغيرت الطبيب رحت لطبيب مشهور
وخبرته .. شافني وحسيت وجهه يقول ماينفع هالشهر معاج مشاكل
جات دكتوره غيرها قالت له هالبنت -تقصدني انا-
راح تنهار لو كسرت بخاطرها
طبعا حاول معاي وحاول وكتب لي ادويه مراقبه من هيئه الدوا
واشيا غريبه بس عشان يضبط وضعي
وكنت يوميا اروح له يشوف وين وصلت
بنات قسم بالله كان بطني فيه بقع خضراء وبنفسجيه من كثر الابر اللي كنت اخذها مدري فين اضرب الابره كلي بقع من الابر والعلاجات
خلصت الابر ورحت العمليه لسحب البويضات
سحب مني وجاني عطاني تعليمات ورحت البيت طبعا بدون مااحد يدري
رجعت البيت انتظرت اتصال المركز
وتفاجئت ،، قالت لي الممرضه : اختي البويضات تعبانه جدا
على وشك الموت مافي فايده يمكن ربي ماقسم لج اطفال الحمدلله بس لاتنتظرين منا اتصال مافي ترجيع اجنه لان الاجنة جدا تعبانه خساره يصير ترجيع
طبعا سكرت الجوال ،، على طول توضيت وصليت ركعتين شكر
قلت الحمدلله الذي منع عني ما اتمناه لحكمته ولكن يارب انت اعلم بما في قلبي
وتميت اصوم وادعي بالفطور
شليت املي من الطب والاطباء واتجهت الى رب الاطباء
وتميت اقوم الساعه3 بليل اصلي قيام الليل وادعي واذعي واستغفر لين الفجر وعقب اصلي الفجر واقرى سورة الانبياء واوقف على كل اية نبي واكررها وابكي وادعى واخلص واستغفر ولما يصير الشروق اصلي ركعتين وعقب اروح امارس يومي
كنت اقول يامن يحيي العظام وهي رميم انت اكبر من الطب يارب ان يديك فوق ايديهم
ونسيت السالفه هاذي خلاص
ورحت لاهل زوجي ،،، الا اشوف اتصال من المركز
قلت بنفسي شو يبون هاذيلا بعد!!!
رديت
قالت الممرضه : تعالي الحين ضروري
قلت ليش!؟
قالت بسرعه بس تعالي بلا مكياج ولا عطور
رحت لهم ،، قالو بسرعه بدلي معاج ترجيع اجنه
قلت كيف ترجيع اجنه واجنتي تعبانه على وشك الموت؟
قالت لي خبير الاجنة بنفسه مستغرب
يقول في جنين معاج كان على وشك الموت فيه فراغات كبيره لكن اليوم لما راح يشيك عليه حصله صار درجة ممتاز شي غريب مانعرف ليش هاذي قدرة الله ماندري شو صار
رجعت لي الاجنة ، كانت لما ترجع لي اردد بصوت عالي ربي استودعتك واردد بصوت جهور
ومارميت اذ رميت ولكن الله رمى
ومارميت اذ رميت ولكن الله رمى
، وانسدحت دقايق ورجعت البيت وانا مو مستوعبه ابد ،، انتظرت اسبوعين وماكنت مهتمه
ورحت اسوي فحص ورديت بيتنا لان النتيجة عقب ساعتين
ونسيت السالفه لاني ماكنت احس باي شي بتاتا
تعشيت ورحت اصلي العشا ومسكت القران وجلست اقرى
اتصل زوجي مارديت
خلصت القراءه
رجعت اتصل فيه ،، قلت له ايش تبغى
قال قولي الحمدلله
قلت له الحمدلله حتى لو ماصار شي الحمدلله
قال الحمدلله انج حاااااااااااااااااااااااااااااامل
اه ياربي ،، مافي شي عليك عزيز ،،
فاللحظه : ايقنت يقين تام بأنه مقتدر ان اراد شي يقول له كن فيكون
بنات متخيلين معاي؟؟؟؟
لما كانت اجنتي ممتازه ماصار
ولما كل شي كان ضدي كانت قدرة الله فوق قدرة الجميع؟؟؟؟
ربي كان يبي يوريني عظمته وقدرته وعزته
وكنت استغفر مايقارب 6000 مره واردد سبحان الله وبحمده والله واكبر والحمدلله 100 مره
واصلي على الرسول 100 مره
واردد لا اله الا انت سبحانك اني كنت من الظالمين 100 مره
وحسبي الله ونعم الوكيل 100 مره
وربي لاتذرني فرد وانت خير الوارثين 100 مره
كنت ادعى فكل وقت واردد
اللهم اسالك حملا ثابت تام سليم 9 اشهر لا زياده في خلقه ولا نقصان
وجاتني امراض غريبه فحملي وتدهورت صحتي بس كنت محاااافظه ع ادعيتي وتسبيحي وخاتم استغفاري مايفاري يديني
وكنت اتصددددددددق بشكل دايم واول ما امد الصدقه فذيك اللحظه ادعى لانه افضل لحظه
وختمت القران بنية الحمل
ومره ختمته بنية ثبات الحمل
على كثر الصعوبات اللي واجتها الا ان الله كريم
واللهم لك الحمد ربي اكرمني الحمدلله
رزقني بعد ما كدت ايأس وافقد الامل
بنات ربي مافي عليه شي مستحيل ابد ابد
اذا اراد شي يقول له كن
ربي لايعجزه شي ابد فالكون قدرته ومشيئته واسعه
انا اليوم كتبت لكم قصتي لان اعرف اكثر البنات فقدو الامل وكانو نفسي
بنات تأكدو ان اذا ربي كاتب لكم شي راح يجيكم عاجل او اجل واللي يتقي الله يجعل له مخرج ويرزقن من حيث لايحتسب
كتبت لكم عشان اعيد الامل لقلوبكم وترا قصتي بسيطه لاتكاد تذكر امام قصص اللي شفتها وسمعتها
ان بعض الناس مافيهم اطفال عقم تام وربي رزقهم
(( يد الله فوق ايدي الجميع))
خلوا هذا شعاركم
وادعولي الله يرحمني ويجعل الجنة مثواي و يحفظ لي اهلي واحبابي ويسعدني ويسخر لي عباده
مع السلامة