أرزاق مقسومة :

أختي الفاضلة ،، أعجبني جدا إصرارك ، وسعيك للفهم ، وهذا هو أول الطريق نحو النجاح ، وفقك الله وسدد خطواتك . سأشرح لك شرحا موجزا ،، 1/ المحفظة هي حساب لوحدة ، والحساب الجاري حساب لوحده ، ولا يمكن أن يسحب من هذا في هذا ، ولا أن يدخل ما في هذا في هذاك . فكل منهما حساب مستقل . 2/ الأسهم عبارة عن ( بضاعة ) تشترينها بقيمة معينة ، ويرتفع سعرها ، وينزل ، حسب السوق ، والعرض والطلب والأخبار . فلنفرض أن عندك أسهم في المحفظة ( 100 سهم الراجحي ، 50 سهم الاسماك ، 200 سهم البلاد ، 180 سهم سابك ) اشتريتي الأسماك مثلا ب 40 ريال ، فلما صار سعرها 41 بعتيها ( كسبتي ريال في كل سهم ) هذا يسمى مضاربة ، وهي الشراء والبيع في الوقت نفسه . 3/ الأرباح التي تنزل في المحفظة ، ليس لها علاقة بسعر السهم اليوم أو غدا ،إنما هذا يعتمد على أداء الشركة خلال السنة ، مثلا : اشتريتي الأسماك بسعر 40 ريال ، وارتفع السعر حتى وصل 45 ريال ، ولكن الشركة أعلنت خسائر خلال الفترة الماضية ، سابك اشتريتي السهم ب 100 ريال مثلا ، ونزل حتى وصل 90 ، ومع ذلك أعلنت الشركة أرباحها للفترة الماضية ، وصارت ربحانة ( مثلا 2 ريال لكل سهم ) هنا ينزل في محفظتك ريالان عن كل سهم لك . 4/ المضاربة ، من الأفضل أن ما تبيعين الكمية كلها ، لكن لو بعتيها بربح ، فهذا جيد . ، ولو نزل السهم اشتري كمية أخرى حتى ينزل سعر شرائك للسهم . ولو ثبت السهم ، انتظري .. 5/ الأسهم الثقيلة ( أو الأسهم الخاصة بالاستثمار ، نعم ضعيها في المحفظة وانسيها ، وكل فترة راح تنزل أرباحها في محفظتك أو يزيدونك أسهم ( حسب قرار مجلس الإدارة ) 6/ الكميات تشترين حسب سعر السهم وحسب الفلوس اللي عندك ، فليس اللي في محفظته مليون مثل اللي في محفظته 50 مليون ، وليسوا مثل اللي ما ماعه الا 7000 ، فكل وطاقته . 7/ كلام سليم ، لكن دائما الحذرو اجب . 8/ أقترح تحذفين الاثنين الأخيرين وتضيفين ( سابك ، الاتصالات ، موبايلي ، زين ) << بالترتيب حسب الأفضل . ( في نظري ) 9/ صح 100% 10 / لا .. أنتي ربحانة ، لأنك لو بعتيها الان تصيرين بعتي بربح . 11/ يشترون لأهداف ( 1/ الارتفاع أكثر ، 2/ الاستثمار ، 3/ زيادة الكمية .. الخ ) وهؤلاء يشترون بملايين الأسهم يعني الهللة الوحدة تفرق معهم . 12/ لم يرتفع ......!!! وقد يكون أخذ فلوس بالدين ، أو باع أملاكه ، ودخل بها الأسهم ، مثلا ب 10 مليون ، فلم يبق منها الا 100 ألف ، 13/ صح ، أو ممكن تكون الفلوس في المحفظة ، بس ما تشترين بها شي . ومبلغ الأسهم تعرفينه بالاطلاع على أسهمك من خلال النت . 14/ وأنت تذهبين للبنك وتطلبين تداول عبر النت ، يأخذون منك رسوم مقابل ذلك ، ويعطونك اسم مستخدم ويوزر نيم للمحفظة ، تقدرين من خلالها البيع والشراء . هل هناك شيء لم أجب عليه ؟؟!! وفقك الرحمن ، ويسر لك دروب الخير ، وإن شاء الله تصبحين من التاجرات .

أختي الفاضلة ،، أعجبني جدا إصرارك ، وسعيك للفهم ، وهذا هو أول الطريق نحو النجاح ، وفقك الله...

مرسى الأحلام :

السلام عليكم ورحمة الله و بركاته ,:) أخي أرزاق مقسومة بارك الله فيك , وجعل كل ريال أكسبه صدقة لك ولعمرك و لولادك من بعدك .. شكراً على طولة بالك معي ..( و أنا أعرف أن فهمي بطيء ) لكن الحمدلله بدأت الصورة تتضح شيئاً فشيئـاً .. الله يجزاك خير أنا جداً فرحت أن عندي محفظة لني ما توقعت يكون عندي محفظة بمجدر الإكتتاب ! كنت شايلة هم أنه لازم أروح البنك وأدفع 700 ريال و قعدت أفكر من وين أجيب هالـ 700؟وخفت أن المسألة فيها مشوار و " محرم " و توسلات ..بس الله يطمنك .. فيه موضوعين بناقشك فيهم بعد أذنك .. أول شي : فيه شي سويته اليوم مدري جبت العيد ولا باقي ما عيدت للآن ! اليوم رحت لغرض ومريت على صراف الراجحي .. وبعض النـاس ماعندهم " أدب الإنتظـار " ولا مفهوم " الوقوف ضمن طابور " فـ " ربشوني " ..! وتمنيت فعلاً أصير أدخل من النت بيكون أهون من هالجحيم ! خصوصاً أنه ما يتوفر لي الخروج دائما المهم أني دخلت البطاقة عادي,و أول مرة بحياتي أدخل أشوف الأسهم لأن البطاقة مخليتها فقط للسحب من الرصيد الجاري وجلست أضغط بالأيقونات .. لحد ما دخلت محفظتي وفرحت لما لقيت مكتوب " رقم المحفظة " ! و وصلت عند أسهم أعمـار ,, وطلعت لي صفحة البنك يخلي مسؤوليتة يقول كلام مدري وشو بس الي عرفته ان هالسعر الي ببيع فيه هو سعر السوق وانه مدري ايش مالقطت باقي الكلام .. جيت بأضغط عساس أرجع والناس وراي يستعجلوني ... مدري إلا يطلع لي الإيصال ... مكتوب فيه : عملية نوعها ... طلب بيع أسهم ! يعني بعت الأسهم بالغلط ! إنقهرت !لأني كنت فعلاً أبغى إعمار وما أبغى أبيعها !عددها 25 سهم والي قهرني أكثر أني رجعت دخلت البطاقة بشوف حسابي كم ؟ لقيت الحساب قبل و بعد عملية البيع هو هو ! بغيت أنجن بعد ! وين راحت قيمة الاسهم ؟ لاحول ولا قوة الا بالله يعني بعت اسهمي بالغلط و كمان ما نزل سعرها على الاقل افك ازمة ؟25 سهم وين راحوا ؟ بس تذكرت كلامك تقولي أن حساب المحفظة وحساب الجاري مفصولين .. بس قلت أستهدي بالله و أشوف المنتدى و النت ويصير خير ورجعت البيت طوالي فتحت تداول لقيت إعمار قدامه مكتوب أصفار لاهو أحمر ولا هو أخضر !الله المستعان ..فوش صار الحين ؟ أنا رايحه البنك يوم السبت بحوله تعالى هل أكلم الموظفة تشوف لي المحفظة لو نزل سعر الاسهم فيها ؟ولا خلاص مافي سعر ؟!!! ونفس الشي فتحت موقع بنك الراجحي لقيت فيه تسجيل مباشر للأفراد (ماهو مباشر ؟)و تسجيل عادي مكتوب خدمات إلكترونية وماعرفت أدخل لحسابي من وين ؟ .. أسألتي بشكل مرتب عشان ما أدوش لك راسك ( الله يجزاك خير على صبرك ) 1- أنا بروح للبنك وأقول للموظفة تشوف لي سعر المحفظة ؟ تتوقع ممكن ألقى سعر إعمـار فيه ؟ يعني إيش الأصفار ذي الي شفتها بتداول ؟ 2- أنا أبغى أشتري إعمار مرة ثانية و كم سهم معاها .. ممكن أسوي العملية عن طريق الموظفة حقت البنك ؟ 3- هل تنصحني أسجل بموقع الراجحي او اي بنك ثاني ؟ شكيت لأني شايلة هم أمن المعلومات .. بس معقول كذا التسجيل في موقع البنك بسيط زي أي منتدى !ومايتطلب زيارة شخصية لهم ؟ 4- غرضي من التسجيل في الموقع هو الدخول على حسابي الجاري و على الأسهم عشان اعرف أبيع و أشتري فبالضبط اش أقول للبنت أقولها أبغى مباشر ؟ هو البرنامج حق التداول اسمه مباشر ؟( لا تستغرب من أسألتي الكثيرة .. لأن في البنك ممكن يحتقرون الي جاية وماتعرف وش تبي ! وماعندها خلفية عن الموضوع ! الله يهيدي بعض بنات البنك .. مو كلهم أكيد أغلبهم طيبات وخدومات) 5- هل تنصحني ببنك الرياض أو الراجحي أو الأهلي ؟ (بخصوص المحافظ لأن مسبقاً عندي حسابات جارية ) 6- هل فيه محافظ مجانية بدون رسوم ؟ و لا لازم أدفع ؟ أتوقع فيه محفظة مجانية بس ان فيها عيب الي هو لازم تروح الموقع وتشوف الاسهم بعدين ترجع وتبيع او اظن العيب هو ان الاسعار متأخرة ! تخيل تبيع عساس انك ربحان وتطلع خاسر ! فتنصحني بأي نوع من المحافظ ؟ 7- أنا حساباتي زمان كان بإدارة الوالدة الله يشفيها .. ويوم فتحت حسابي لقيت أنها مكتتبة لي بسهمين واحد إسمه الوطنية والثاني سوليدير أو شي زي كذا .. تعرف عنهم شي ؟ تنصحني أبيعهم ولا أخليهم ؟ 8- معاي 1000 ريال الآن وبشتري إعمار و الراجحي و الإنمـاء ويمكن البلاد كيف تنصحني أوزع الفلوس ؟ اي سهم يكون اكثر ؟ 9- مافهمت النقطة الي شرحته لي سابقاً : الي هي لما يرتفع السهم و انا تاركته بمحفظتي ومابعته اكون ربحانه ..رغم اني لابعته واستفدت من الفرق لأن الوالدة كانت مشتركة بصافولا وناسيتها سنين ! ويوم جات تبيعها لقتها يمكن بـ 500 او 700 شي زي كذا ولا في بمحفظتها ربح .. مع ان كثيرين يمدحون صافولا .. هل خسارة امي بالطريقة ذي لأنها ما ضاربت بالسهم بس اشترته وتركته بمحفظتها ؟ مع العلم انها دافعه مبلغ جامد يمكن 25 الف او شي زي كذا الموضوع الثاني : هذي العناوين ماعرفت لها .. آخر صفقة .. التغيير .. تراكمي .. أفضل طلب .. والعناوين الباقية ممكن الله يعافيك تنزل لنا شرح بسيط عنها ياليت لو تشرح لي عن طريق مثال أنا حطيت هنا بنك الرياض لأني دايم أفتح تداول واوقف قدام الجدول ما اعرف بالضبط كيف أشتغل .. الله يجزاك خير رد على راحتك متى مابغيت رد أعرف أن أسألتي كثيرة و غثيثة و متكرره و بفضل الله سبحانه وتعالى ثم بفضل جهودك بديت أعرف كثير الله يجزاك خير

السلام عليكم ورحمة الله و بركاته ,:) أخي أرزاق مقسومة بارك الله فيك , وجعل كل ريال أكسبه صدقة لك...

أرزاق مقسومة :

أختي الكريمة .. كيف تقولين ان فهمك قليل ، وأنتي ما شاء الله تبارك الله استوعبتي الموضوع كاملا ، ؟؟!! بالعكس أنت تبارك الله جيدة ومثابرة وأعجبني أنك منظمة ومرتبة ، وفقك الرحمن وسدد خطواتك هذه بعض الأشياء أخذتها من موضوع إحدى الأخوات هنا جزاها الله خيرا ( نسيت اسمها )

أختي الكريمة .. كيف تقولين ان فهمك قليل ، وأنتي ما شاء الله تبارك الله استوعبتي الموضوع كاملا...