حلاوة العيد ما احد اكلها في بيتي تدرون ليش ؟؟؟

السلام عليكم يا اخواتي وكل عام وانتم بخير

اعاده الله علينا وعليكم بالصحة والعافية

انا يا بنات مقهورة حدي وطفششانه فوق ما تتخيلوا

وما عندي احد افضفض له غيركم

انا يا بنات متزوجة من 4 سنين وساكنه بنفس العمارة اللي فيها اهل زوجي

واهلي بعيدين عني في مدينة تبعد عنا 800 كيلو

المهم انا الحمد لله اجتماعية واحب الناس والجمعات

بس المشكلة كاني ساكنه لحالي يعني ما حد من اهل العمارة يزورني الا نادرا

ما عدا وحدة بس الله يسعدها هي اللي تجي وتروح علي

وانا والله شاهد علي اني ازورهم ولا اقطع احد ابدا

تصدقون يا بنات اننا اجتمعنا صباح العيد في بيت جارتي وبعدين رحت معاهم نعيد

على الباقيين وانا الوحيدة اللي ما اندخل بيتي !!!!

وكمان عندي سلفة جديدة توها لها شهرين من تزوجت اول ما جيت من ديرتنا زرتها

يعني قبل شهر وشوية

تصدقون انها زارت الكللللللللللللللل ما عدا انا

بس خلاص لما شفتها ما دخلت بيتي من يوم تزوجت ما رحت لها مرة ثانية

مع ان علاقتنا طيبة ببعض وهي من نفس ديرتي

انا من النوع اللي ما احب اعاتبهم ليش ما زرتوني ؟؟

اذا يبغون يزوروني الله يحييهم ما يبغوا الله يستر علي وعليهم

ولا عندي صديقات هنا ولا شي لاني تزوجت وانا خلاص على وجه تخرج

انا حولت هنا لكلية جدة على اخر ترم سنه رابعة ما

امداني اكون صديقات ولا شي يا دوب كم وحدة بس وضاعت ارقامهم

انا بشهادة الكل طيبة وعلى نياتي

واهل زوجي كمان طيبين ودايما ازورهم وعلاقتنا سمن على عسل

بس ما ادري ليه ما يزوروني واخوات زوجي طيبين ولما نلتقي علاقتنا ممتازة

بس ما ادري ليش اذا ولدت ما يتحمدون لي بالسلامة الا متاخرين اخر الناس ذايما

والله اخت زوجي الكبيرة لما ولدت ببنتي الاولى عند اهلي ما كلمتني نهائيا

الا لما رجعت بيتي بعد 45 يوم تقريبا ولما جبت بنتي الثانيه كنت انا هنا في جدة

وهي في مع زوجها في مدينه ثانية ولا كلمتني ولا حتى رسالة الا لما جت تزور اهلها

جلست 4 ايام وبعدين زارتني بعد ما كملت اسبوعين من ولادتي مع اننا في عمارة وحدة

الشي الغريب ان فيه لنا جارة راعيت مشاكل وسوء ظن وحسد اعوذ بالله وما حد سلم منها

والكل عارف هالشي عنها لكن مع ذلك ما شاء الله اخوات زوجي يسهرون عندها ويزورونها باستمرار وانا لا

شي محير فعلا

انا اللي قاهرني كل ما ادخل المطبخ اشوف حلاوة العيد حقي اللي ما احد اكلها

ياليت عندي اهل هنا والا صحبات عشان يزوروني ويعيدون علي وياكلون حلاوتي ويشربون قهوتي)

احيانا اقول يمكن سكان العمارة يغارون مني لاني ما لقيت اي سبب او تقصير مني يخليهم يعاملوني بهذا الجفاء

انا زوجي الحمد لله لا قوة الا بالله حنون جدا جدا ومدلعني

صحيح هو سفراته كثييييييييييير بسبب طبيعة عمله وهذا اللي يخليني احس بالوحدة والملل لحالي

بس الشهادة لله انه موفر لي اشياء ما هي عند باقي حريم العمارة

احيانا تكون اشياء مكلفة واحيانا تكون عادية بس ممكن يحسدوني على تعامل زوجي معي

مع انهم يطلعوا ويتمشوا وانا ناااااااااااادرا لو خرجت بسبب غياب زوجي المتكرر

يعني ما شافوا الملل والطفش اللي انا فيه

ما اهتموا الا بالجوانب الايجابية في حياتي عشان يحسدوني عليها

عجزت كيف اتعامل مع جيراني واهل زوجي ؟

لا تقولوا طنشي واجلسي في بيتك لاني امل واطفش لحالي

هذا اللي كان في خاطريي وما ارتاح افضفض الا في عالمي عالم حواء