مرحبا يا قمرات
طبعا اليوم كان خفيف علي عشان جذي قدرت اصور ما كان في تعقيدات ولا صواني صعبه لان الاغلبيه معزومه
تنغصت لكم هالشغلات من فطورنا وسامحوني على القصور
وطبعا وصفه جديده من اختراعي و ان شاء الله بتعجبكم وبتدعون لي بهالشهر الفضيل
اولا
البسبوسه الكذابه
علبة كيك روبن هود او اي نوع الذهبي مو ابيض
كوب سميد ناعم
قالب زبده سايح او نص كوب سمن سايح
بيضتين
كوب ماي - ملعقة شاي هيل ناعم
للتسقيه
3/4 كوب قطر دافي
علبة صغيره حليب نستله محلى 90 جم
رشة هيل ناعم وفستق
تنخلط العجين تمام وتدخل الفرن بس تدهني الصينيه زيت او سمن وترشين سميد
تنخبز الى ان تتشقر زين
بس تطلع اسقيها ورشيها بالنستله و انسيها نص ساعه قصيها وزينهيا بالفستق وعوافي
بس لا تعطين الطريقه لا احد
الفطور
سبرينغ رول دجاج مسخن
كبة بطاط وعيش محشية باللحم
خبز عروق بس مشوي على المقلاة
كبة باللبن(انا استخدم لبن خاثر كل ليتر معاه ملعقة كبيره نشا والتقليه ثوم وكزبره خضرا ونعناع ناشف)
صينية بطاط بالصلصه سويت شوي(حمري البطاط بعد تشريحه وحمري بصل جوانح مع ثوم ومكعب ماجي وبهارات واضيفي الصلصه وبس تتسبك اضيفي ماي حسب ما تبين واضيفي البطاط ونزليه بماعون فرن ودخليه يتسبك وهو مسكر بقصدير ربع ساعه واكشفيه يتحمر ربه ساعه
رز بالمعكرونه الحروف طبعا مصري عشان يضبط- حمري المكرونه او الشعريه بالسمن والزيت واضيفي الرز ومكعب ماجي ابيض وقلبي واضيفي ماي حسب الحاجه
تشريب دجاج باللوبا والقرع- دجاج ينحمس مع بصل وثوم وبهارات وطماطم مفرومه وبس يتسبك اضيف له ماي مغلي وبس يستوي للنص اضيف القرع واللوبا واللومي واخليهم يتسبكوا
اسقي فيه خبز الرقاق او القرصان
شوربة ماجي الكويكر بالدجاج
سلطه خضرا- مضاف لها جرجير وبربير ونتفة دبس رمان مع الصوص
مهلبيه وحلو مانجا - حلو المنجا طبقتين الطبقه الولى 6 حبات كيري علبة قشطة نستله- بكت دريم ويب علبة جيلي مانجه او مشمش كوب عصير مانجه بالخلاط واصبه في الاكواب الصغيره اللي نسوي فيها حلو الشتلات افضل من بايركس وبس تصك
الطبقه العلويه كوب عصير مانجه مع كوب ماي حار مغلي وبكت جيلي مانجه او مشمش بس ذوبي الجلي بالماي المغلي اول وبس يبرد اضيفي العصير وصبيه على الوجه وعوافي ممكن تحطين نتفة كيك او سويسرول تحت
وعوافي
161894
161895
161896
161897
161898
ماكو اسامي @mako_asamy
كبيرة محررات
يلزم عليك تسجيل الدخول أولًا لكتابة تعليق.
CryinG_Blue_EyEs
•
ماشاء الله باهنا و العافية عليكم يارب
ماشالله تبارك الله عليك عزيزتي أحلى الأسامي سفرة طيبة و باالعااافية على قلووبكم تسلم ايديك يارررب
مشكووووووووورة :26::26:
مشكووووووووورة :26::26:
الصفحة الأخيرة