اللي يحب الحلوى البحريني يدخل. بصراحة اول مره اجربها امس

بصراحة امس قمت وسويت الحلوى البحرينية على الرغم احنا على طول نشتريها جاهزه ما نسويها في البيت لانها جنان والحلوى البحريني معروف عند اهل الخليج. المهم امس قررت اني اسويها لاني بصراحة كان ودي اعرف طريقتها من زمان ولقيت هالطريقة من زمان لكني ما كنت متأكده من المقادير ولا كنت اعرف هل احد جربها ولا لا وبصراحة كنت مدونة مقاديرها من احدى المنتديات من زمان وطلعت الدفتر ولقيت الطريقة وقررت اسويها وعقب ما سويتها عطيتها اهل زوجي وطلعت من البيت :
وهذي هي طريقة عملها:

زعفران حسب الرغبة منقوع مع كأس كبير ماء ورد(استخدمت كاس جبن كبير).
كأس كبير دهن.
3 أكواب سكر
7كاسات ماء
نصف قاروره لون صناعي (أحمر أو أخضر)
هيل مطحون
كاس صغير ساغو منقوع
كاس صغير نشا ( طحين الذره)

يسيح السكر على نار هادئة حتى يصبح لونه ذهبيا وبعد ذلك نضع المقادير كلها وتحرك جيدا نتركها على نار هادئة ونحركها بين الحين والاخر إلى ان تتماسك وتصبح كالحلوى.

المهم بعد ما رجعنا من بره طاحوا في زوجي طيح وقالوا له اشلون زوجتك سوتها والكل انبهر فيها ويبون مقاديرها وبعد ما رجع قالي اش سويتي فيهم جننتينهم من كثر الطرق اللي تخترعينها وتسوينها المهم هذي مو اول مره كل مره اجرب اشياء اسويها وتصير لية هالسالفة
واي استفسار اني حاضره
وبالهناء والعافية