بناءا على رغبة الجماهير........آخر موديلات الاطباق بالكويت

اطباق عالم حواء

مرحبا طباخات حوا انا وحده متابعة لكم وما قط نزلت مواضيع لاني وحده عجازة مااحب سوالف كتابة المواضيع وطبعا ما اقايش يم الاخوات الي يطبخون ويصورون مع اني والحمدلله طباخه بحكم السن وكثرة التجارب......... ممكن ادخل موضوع ارد واعطي رايي ايوا انزل مواضيع لأ قلبت نانسي اعوذ بالله المهم مالكم بالطويله دخلت موضوع للاخت زوجة الحنون وكانت طالبه مساعدة باطباق وعطيتها قائمه بالانواع والمسكينه ارسلت خاص تبي المقادير والطرق بالتفصيل واختكم بالله ماانتبهت الا بعد اسبوع ان عندها رسائل بصندوق الوارد ادري طولتها المهم سالتني هي ووحده من الاخوات عن بعض الوصفات فحبيت احطهم عالعام طبعا بعد cut &paste لاني تعبت وانا اكتب

سلطة التفاح: وهاذي عجيبه كل من ذاقها سالني عنها

3حبات تفاح اخضر (الحامض)
3حبات خيار
1شدة جرجير
نص شدة نعناع
التتبيله:
نص فنجان خل
نص فنجان زيت زيتون
ملح
فلفل اسود ناعم
الطريقة:
قطعي الجرجير والنعناع .....والخيار قطعيه مثلثات صغيره يعني بالطول اول وبعده كل شريحه طويله بالنص طوليا ثم قطعيهم مثلثات
التفاح خليه آخر شي قبل التقديم قطعيه نفس الخيار وتبلي التفاح على طول بنص مقدار التتبيله ثم ظيفيه على باقي المقادير هو وباقي التتبيلة

رول الصاج بالدجاج طبق غريب بالشكل والطعم جربي واحكمي

دجاج مسلوق بدون ملح ومسحب قلبيه مع بصل ومكعب ماجي خضار
جبن سايل كرافت او اي نوع تحبي
كريمه
خبز صاج الخفيف

الطريقه
قطعي خبز الصاج شرائح نفس جحم وشكل عجينة السمبوسه
حطي شريحه وحده وادهنيها ب1 ملعقه كبيره جبن وحطي 1ملعقه كبيره حشوة الدجاج على طول الشريحه لفيها مثل العود يعني تجي قدامك كانها عود خيزران ابدي من الطرف اليمين حطي شوي جبن عشان تلزق ولفيها دائري لحد الطرف الاخير راح يصير شكلها مثل الحلزون شيليها وحطيها بصينية الفرن ونفس الطريقة ورصيهم جنب بعض لحد ماتتملى الصينيه صبي عليها علبة الكريمه ودخليها الفرن ربع ساعة .........
وانا حاضرة لاي سؤال
كرات البطاط بالكريمة\ برضو الشكل غريب والطعم روعة وانا عيالي ماياكلون الاشياء الغريبه بس هذا الطبق المفضل واسويه اسبوعيا

6 حبات بطاط متوسطة الحجم مسلوقه
1 علبة جبن كرافت شيدر الزرقاء حجم الوسط
ملح فلفل اسود
بقسماط

4 حبات جزر مبشور
ربع حبة كرنب مقطع شرائح طوليه رفيعه جدا
زبدة
مكعب ماجي خضار

اعلبة كريمه
اعلبة قشطه كي دي دي
2 ملعقة كبيرة مليانه جبن كرافت سايل

الطريقه
اهرسي البطاط ناعم وابشري عليه جبن الشيدر وضيفي الملح وقليل من الفلفل الاسود واخلطي كويس
كوري دوائر بحجم اكبر من البيضه شوي وغطيها بقسماط وخليها على جنب
ذوبي 2 ملعقة زبدة على نار هاديه في مقلى كبير وضيفي الكرنب وقلبي ثم ضيفي الماجي والجزر المبشور وعلي النار شوي وقلبي لحد مايذبل الكرنب ويقل الحجم ....
خطي خلطة الكرنب والجزر بصينية الفرن وحطي الكور فوقها ...........
بالخلاط اخلطي الكريمه والقشطه والجبن السايل وصبيه على الصينيه وحطيها بالفرن نص ساعه من تحت وبعدها شبي الفرن من فوق يتحمر الوجه

دجاج البشاميل بالسبانخ وكمان طبق روعة وبشهادة كل اللي ذاقوه
دجاج مسلوق بدون ملح ومسحب
بصله مقطعه جوانح رفيعه
زبدة
1علبة مشروم صغيره مقطع
2 علبة سبانخ او كيس مثلج
1كاس صغيرجبن كرافت سايل
1علبة قشطة
2 كيس خلطة البشاميل كنور

يقلب البصل عالنار بالزبدة ثم يضاف مكعب الماجي والمشروم والدجاج ويقلب حتى يختلط ثم نضيف السبانخ بعد عصره من الماء جيدا
يرفع من النار ويضاف الجبن والقشطه ويخلط مع بعض ويصب المقدار في صينية الفرن
سوي البشاميل بنفس الطريقه اللي على الكيس وحطيه على خلطة الدجاج وقطعي زبدة عالوجه وحطيه بالفرن نص ساعه من تحت وبعدها شبي الفرن من فوق عشان تتحمر وبالعافية

وعندي اطباق ثانيه وانواع حلو بارد بس آخذ لفة بعالم حوا وارجع ثاني

انا بحط الاطباق الزياده بالمشاركة الاولى عشان البنات مايحوسون يدورون باقي الاطباق

تشيز كيك احلى من تشيز كيك نيويورك الاصليه
وهاذي من اسراري الخاصة لعيون بنات حوا انشرها
المقادير.:
2 جبن فيلادلفيا 200 غرام
بيضتين
3|4 كوب سكر
1 روب نادك

1 عبوة بسكوت دايجستف الحجم الكبير
1|2 قلب زبدة سايح
خلطة بلو بيري جاهزة او اي نوع تحبين
الطريقة:
حطي البسكوت بكيس نايلون دقيه اما بيد الهاون ولا بشوبك فرد العجين ضيفي عليه الزبده واخلطيه وفتتيه عشان مايتكتل .رصيه بصينية الفرن الي لهاقاعدة متحركه وحطيها بالفريزر

بالخلاط اخلطي الجبن والبيض والروب والسكر.........لحد ما الجبنه تختفي راح يصير عندك خليط سائل عادي طلعي الصينيه من الفريزر وصبيه عالبسكوت وحطيه بفرن متوسط الحرارة اول شي لمدة خمس دقائق وبعدها وطي عليه
وخليه لمدة ساعة كامله بنار هاديه لحد مايتجمد الخليط شغلي الفرن من فوق عشان تنشف الطبقه من اعلى طلعيها من الفرن وخليها تبرد شوي وبعدين دخليها الثلاجه عالاقل ساعتين وعند التقديم صبي عليها خلطة البلوبيري قبل لاتفتحين الجوانب...وقدميها لضيوفك بالعافيه
58
6K

يلزم عليك تسجيل الدخول أولًا لكتابة تعليق.

تسجيل دخول

هوازن الليل
هوازن الليل
تسلمين يالغلا
mama_k_2008
mama_k_2008
يم يمي شكله يشهي
اشراااقة أمل
اشراااقة أمل
اطباقك حلوة بالمرة مانقصها الا الصور

تشكرات
أمنية عمري
أمنية عمري


ماشاء الله .. تبارك الله

كل طبق أحلى من الثاني


يعطيك ألف عافية


ومشكووووورة على الأطباق الحلوة ..
عذووب
عذووب
مشكووره حبوبه على الوصفات ... كل وصفه احلى من الثانيه ......