أسعد الله أيامكم بكل خير ...وأسأله أن يوفق أبنائنا ويجعل التفوق حليفهم ...
بالنسبة لي السنة هذي جهاد عندي غندورتين إختبارات ..ثاني متوسط وأولى متوسط ...
يعني لو ماركزت معاهم من بدري ماأقدر أوفي بينهم ...
بنتي الكبيرة ماشاء الله من صغرها مرتبة ومنظمة ومعتمدة على نفسها ...
الثانية كاااانت لعااابة كااانت ...والسنة مع الإختبارات >>>طبعا بعد سنوات مع التقويم ...مجمعة لي قلق وتوتر الدنييا كلووو والله مرررة أحزن عليها ...
المهم خطواتي معاهم ...
أول شيء رفع المعنويااات بقوووة ...
أغير لهم مكان المذاكرة بدل مايذاكروا بغرفة المكتب أو غرفتهم ...أغير لهم جووو مرررة وأخليهم يذاكروا بالصالون ...
طبعا لابد من تدليع زيادة حبتين عشان النفسية >>حرااام مرة أحزن عليهم وأشيل هم الإختبارات
وأنا طبعي قلوقة فما أبغى أوترهم وهما مو ناقصين
أجيب لهم طاولة ...وأحط عليها غلاية ...وكوفي سريع التحضير ..ومستلزماته من سكر أكواب ...وحليب ....كم نوع شوكولا ...>>مضاااد للإكتئاب هههه
ولو حسوا نفسهم طفشانين يشربوا لهم كوب ...وياخذوا قطعة شوكولا ...
المهم في الموضوع مو شرب قهوة ماأحب يتعودوا عليها ....بس تغيير جو ...وتعديل نفسية >>مو بس ندلع بهالرجال وننسى عيالنا هههه
العصر وجبة خفيفة ...دونات وقهوة ..أو كيك وعصير ....
أول شيء قبل الإختبارات بعشرة أيام تقريبا ...نبدأ التهيئة
التهيئة عبارة عن ...مذاكرة المواد ...بالذات مواد الإسبوع الثاني ...لأن يكون حيلهم خلاااص ومالهم نفس بالمذاكرة ...فنركز عليها تماااام ...
من أيام السنة مركزة عليهم ...أي تعريف أو سؤال تركز عليه المعلمة تكتبوه في الكتاب لأن أكيييد راح تكون الأسئلة منه ....
باقي المواد لازم يمروا على الجزء الأخير اللي ماإختبروا فيه ...عشان يستوعبوا المادة تمام ...
بعد المذاكرة ...أبوهم يساعدهم في مواد الدين .....وأنا بباقي المواد ...ولو إنضغطت ..أستعين بصديق هههه
أختي ربي مايحرمني منها ....
بالنسبة للأيام هذي نلاحظ الوقت الطووويل في النهار عكس الشتاء ...تكون مذاكرة بالنهار ...والليل أحسسهم إن الوضع عادي >>عشان التوتر ...
بعد مايخلصوا المادة >>لازم يقولوا ..((اللهم إني إستودعتك ماحفظته وفهمته فذكرني منه مانسيته ورده لي وقت الحاجة ))
أهيء لهم غرفتهم يكون التكييف شغااال من بدري ...أحط في الفواحة (لافندر ) يرخي الأعصاب ويريح
طبعا أيام الإختبارات ...يجوا بدري ...أحط لهم فطووور مميز ..وأحيانا يحبوا يروحوا مع أبوهم ويجيبوا فطور من برا ...أو يفطروا معاه ويدلعوا عليه شووويه
ويتسلوا شوية ...بعدها بساعة يمسكوا الكتب ...إذا كانت المادة سهلة أحيانا يخلصوا بالنهار
والليل بس مراجعة ...بعد مايصلوا الظهر يكملوا ..بعدها يتغدوا وغالبا يكون مالهم نفس عشان فطروا متأخر يكون بعد مايصحوا ...
وهما خارجين للمدرسة ماأخليهم ياخذوا ولا شيء معاهم لا كتاب ولا ملخص لأنهم راح يتشتتوا ....وماأخليهم يروحوا بدري حتى ماتتشوش أفكارهم مع
مراجعة صاحباتهم ....ولااازم أودعهم عند الباب مع دعوات تريحهم كثير ...يارب تسعد بناتي وتوفقهم وتنور لهم دروبهم وتيسر أمورهم يااارب اليوم ثلاثين (الدرجة)
>>>ههه يتفااائلوا بالدعوة هذي
والله لما يخرجوا أتوضأ وأصلي الضحى وأدعي لهم بالتوفيق وأقول يارب ودعتك كل ماذاكروا وفهموا وقرؤا يارب ردها لهم عند الحاجة ...وعيني عالساااعة
وقت فتح الورقة بالذات أدعي لهم وأسأل الله التوفيق
مفهمتهم أول مايمسكوا الورقة يقروا آية الكرسي والفاتحة ويستعينوا بالله ويتوكلوا عليه ...ويبدأوا يقروا سؤال ويجاوبوا ومايقروا الأسئلة كلها >>كنت أسويها وإذا شفت شيء ماأعرفه خررربت الدنيا ...
قاعدة عندي >>الأسئلة الموضوعية بالذات الصح والخطأ ...مايرجعوا يراجعوه >>لأن غالبا المراجعة تجيب العيد ...
ولله الحمد ماشاء الله بناتي مميزات ومتفوقات ومعلماتهم دائما يثنوا عليهم ...يارب تفرح قلبي فيهم وتفرحكم بأولادكم ...ويعيننا على تربيتهم ويوفقنا لما فيه صلاحهم